سهروهرییا عیراقێ د ناڤبهرا دهوحه و تههرانێ دا !
سهروهرییا ههر وهلاتهكی دابهش دبیت ل سهر: سهروهرییا ناڤخویی كو پاراستنا ئێكهتییا گهل، نیشتمان و سنورانه، و یا دهرهكی ئهو ژی ب ئاڤاكرنا پهیوهندیێن ههڤسهنگ ل گهل وهلاتان ل سهر بناغێ رێزگرتنێ و سهربخوییا بریارێ. ل ڤێره ئهم دێ بابهتێ پێشیلكرنا سهرورییا ئهرد و ئاسمان و سنورێن عراقێ دهینه رهخهكی ژ بهر یا د باررودوخێ شهری دا و ههمی كار د شهران دا د رهوانه. ژ بهر هندێ ئهگهر ئهم وان بێخینه بهرجاڤ، شهر دێ بیته بههانه بۆ ههبونا لهشكرێن بیانی و ژمارهكا هێزێن چهكدارێن نافخویی. لێ یا جهێ سهرسورمانێ و رهخنێ ئهوه كو عیراقێ سهروهرییا خو یا ژدهست دای د پهیوهندیێن خودا دا ل گهل جیهانا دهرهكی ب تایبهت د بریاردانێ دا. ئهڤرۆ تهخێن سیاسی یێن خو ب پایتهختێن جوداڤه گرێدای تا رادهیهكی كو ( دوحه و تههران ) یێن بوینه شوینگرێن بهغدا د دارێشتنا سیاسهتا عیراقێ دا.
بۆ پشتهڤانییا ڤێ گوتنێ ئهو كومبونا ل دوحه هاتیه گرێدان بو پێكهاتێ عهرهبێن سوونه ل ژێر ناڤێ كونگرێ ئاشتبونێ ل 2/9/2015. ل وێ روژێ، دهولهتا قهتهر شیا ب هنارتنا نامێن داخوازیێ سهركردێن سیاسی و لهشكریێن پارتا بهعسا قهدهغهكری ل گهل هندهك ژ سهركێشێن گورهپانێن مانگرتنێ مل ب ملێ ژمارهكا كهسایهتیێن پشكدار د پروسێسا سیاسی یا عیراقێ دا د ئێك هول دا كوم بكهت. روویدانا پتر گومانێ د ئێخیته سهر بابهتی ئامادهبونا سهروكێ جڤاتا نوینهرێن عیراقێ ل پایتهختێ قهتر د ههمان روژ دا. ههر چهنده میدییا جیهانی و عهرهبی، ب مهبهست، گهلهك گرنكی نهدا ڤێ كومبونێ لێ پشكدارییا بهعسییا پشتی دوازده سالێن قهدهغهكرنێ د كومبونهكێ دا ل قهتهر و ب ئامادهبونا بالیوزێن سعودیێ، كوێت و ئیماراتێ وهرچهرخانهكه رامانێن خوی یێن ههین.
گومان تێدا نینه كو دهولهتا قهتهر ئێك ژ پشتهڤانێن سهرهكیێن پیكهاتێ عهرهبێن سوونه ل سهرانسهرێ جیهانا عهرهبی و ههردهم هاریكارێ وانه ب دراڤی و چهكی لێ یا بێ ئومێد بوی كو سوونێن عیراقێ بشێن پروژێ وان جێبهجی بكهن و سنورهكی بو مایتێكرنا ئیرانێ ب دانن. ژبهر هندێ پهنا بو سوونێن ژ دهرڤهی دهستههلاتێ بری و ئهڤه جارا ئێكێ یه كو بهعسی ب ههردوو تایێن خوڤه، سیاسی و لهشكری، ب ئاشكهرایی پشكداریێ د كومبونهكێ دا دكهن كو پهیوهندی ب ئایندێ عیراقێ ڤه ههبیت پشتی روخاندنا رژێما وان. ئهڤ پشكداریه یا ههڤدژه ل گهل دهستورێ عراقێ و یاسا دامهزراندنا پارتێن سیاسی. یا دیاره كو نه بتنێ بابهتێن سیاسی هاتینه گنگاشهكرن بهلكو نهخشه رێكهك هاتبیته دانان بو دامهزراندنا ههرێمهكێ یان دهولهتهكا سوننا ب بریارا كهنداڤی و پشتهڤانییا ههڤپهیمانا. ههروهسا پشكدارییا ئهفسهرێن لهشكریێ یێن بهعسییا وێ ئێكێ دگههینیت كو ئێك ژ تهوهرا چهوانییا پێكئینانا هێزهكا لهشكرییا ب سهر سووناڤه بیت و پرچهككرنا وان دا بهرگریێ ژ وێ ههبوونێ بكهت. ئهڤ كاره ههموو یێن هاتینه كرن بێی ئاگههارییا حكومهتا عیراقێ كو سهروهرییا عیراقێ د ئێخیته بهر پرسیارێ. ئهڤ كومبونه یا بویه جهێ نهرحهتییا پێكهاتی شیعا و ب توندی یا رسوا كری تاكو گههشتیه رادێ بزاڤا متمانه ستاندنێ ژ سهروكێ ئهنجومهنێ نوینهران. لێ بلا شیعه گازندا نهكهن ژ بهر چهوا بریارێن سوونا ل دوحه تێنه دارێشتن، سهركردێن شیعا ژی نه بتنێ بو بابهتێن گرنگێن پهیوهندی ب ئایندێ عراقێ ڤه ههبیت سهرهدانا تههران د كهن بهلكو بو ئێكلاكرنا كێشێن ناڤخویێن شیعا ههر دهم تههران لێڤهگهرا وانه. پاشكوییا شیعێن عراقێ بو ئێرانێ گههشته رادهیهكی كو بهرپرسهكێ ئیرانێ رێكێ بدهته خو عیراقێ وهك ههرێمهكا ب سهر ئیرانێ ڤه ب ههژمێریت. ئیرانێ دهستهكێ بالا یێ ههی د دهستنیشانكرنا كهسایهتیێن شیعا د پوستێن بالا یێن عیراقێ دا.
ئهگهر ههردوو پێكهاتێن عهرهبێن عیراقێ نهشێن ل بهغدا كێشێن خو ئێكلا بكهن و بو ههر بابهتهكێ ئاست بلند یان نزم پهنایێ بو تههران و دهوحه ببهن ئهڤجا چ سهروهری عیراقێ مایه؟ ب دیتنا من ڤێ مایتێكرنا ئاشكهرا یا دهرهكی د كاروبارێن عیراقێ دا د زڤریتن بو تهخا سیاسییا بالا دهست. یان ئهو د نهچارن یان ژی د بێ بریارن و نه ل ئاستی رێڤهبرنا عیراقێ نه د ڤان كاودانێن سهخت دا و پێتڤی هێزهكا دهرهكی نه وان ئارهسته بكهت بهرامبهر جێبهجیكرنا ههر ئهجندهكا ل سهر وان بێته سهپاندن. سهرهرایی ههبونا رهوتهكێ نهرازی ل عراقێ ژ دهستدانا سهروهریێ لێ یا دیاره كو ئهڤ سهروبهرێ شێلی و ململانا شیعا و سوونا ل عراقێ دێ یا بهردهوام بیت و چارهسهری یان پارچهبونا عیراقێ یه یان ژی جهماوهرێ وێ تهخا نهرازی ههلویستهك ههبیت بو گهورینا دهسههلاتدارێن پاشكویێن هێزێن دهرهكی.
