سه‌رپه‌رشتێ تیما زاخۆ: راوه‌ستیانا خولێ ده‌لیڤه‌یه بۆ چاره‌سه‌كرنا كێماتیان
ئه‌ڤرۆ،عه‌لی حاجی:
د داخویانیه‌كێدا ئه‌ندامێ ده‌سته‌كا كارگێریا یانا زاخۆ و سه‌رپه‌رشتێ تیما ته‌پا پێی ئه‌وا پشكدار د خولا پلا نایابا ئیراقێ دا دیاركر دێ بزاڤێ كه‌ن د ماوه‌ێ راوه‌ستیانا خولێ دا مفایی ژێ وه‌ربگرن و بیته ده‌لیڤه ئه‌و كێماتیێن دناڤ تیمێ دا چاره‌سه‌ربكه‌ن پشتی یاریا وان یا ئه‌ڤرۆ ل گه‌ل نه‌جه‌ف ژ چارچووڤێ گه‌ڕا 25ێ ئه‌نجامبده‌ن.
زێده‌تر تاها عه‌بدولحه‌كیم بۆ رۆژناما ئه‌ڤرۆ گوت: ئه‌ڤرۆ مه یاریه‌كا گرنگ هه‌یه ل گه‌ل یانا نه‌جه‌ف كو بتنێ دناڤبه‌را مه و واندا جوداهیا گۆلان هه‌یه د رێزبه‌ندیا خولێ دا، نه‌جه‌ف رێزا حه‌فتێ دهێت ب 36 خالان و زاخۆ رێزا هه‌شتێ دهێت له‌ورا یاریه‌كا ب سانه‌هی نابیت و هه‌ڤڕكه‌كا بهێزی و دێ بزاڤێ كه‌ین تۆلێن خوه ژێ ڤه‌كه‌ین ئه‌وا د قۆناغا ئێكێ دا سه‌ركه‌فتن ل سه‌ر تیما مه تۆماركری و ئارمانجا مه دڤێت به‌رده‌وامیێ بده‌ینه پێشڤه چوونا خوه بۆ رێزێن ده‌ستپێكێ و رژدین هه‌تا دووماهی یاری ژ خولێ.
هه‌روه‌سان ناڤهاتی دیاركر ئێكه‌تیا ته‌پا پێی یا ئیراقێ بڕیاردایی یاریێن گه‌ڕا 26ێ ژ خولا پلا نایاب بهێنه پاشخستن بۆ ماودێ 20 رۆژان ئانكو پشتی ڤێ یاریێ ژبه‌ر پشكداریا هه‌لبژارتیێ ئیراقێ د ڤاڤارتنێن ئاسیا و ده‌ربازبوون بۆ مۆندیالا قه‌ته‌ر 2022، له‌ورا كادرێ راهێنانێ پلانه‌كا تایبه‌ت دانایه پێخه‌مه‌ت مفا وه‌رگرتنا ڤێ راوه‌ستیانێ كو بكه‌ڤیته د خزمه‌تا تیمێ دا و بیته ده‌لیڤه ئه‌وان كێماتیێن دناڤ تیمێ دا بهێنه چاره‌سه‌ركرن و هه‌روه‌سان ده‌لیڤه‌كا دی یه یاریزان بكه‌ڤنه د بهێنڤه‌دانێ دا پشتی گڤاشتنێن یاریان تایبه‌ت یا دووماهیێ ل گه‌ل یانا شورته و نه‌جه‌ف و دێ چه‌ند یاریێن هه‌ڤالینی د ماوێ بهێت دا ئه‌نجامده‌ین پێخه‌مه‌ت گه‌هشتنا ئارمانجا خوه.
