سه‌رۆكێ ئێكه‌تیا عه‌ره‌بی: قه‌ردارێن هه‌رێما كوردستانێ نه و شیانێن نێڤده‌وله‌تی هه‌نه
ئه‌ڤرۆ،
پشتی بو ماوێ پێنچ رۆژان ل ئێك شه‌مبیا بوری قاره‌مانیا عه‌ره‌بی یا یاریا كیك بۆكسینگێ ب سه‌ركه‌فتیانه ب مێڤانداریا پارێزگه‌ها دهۆكێ ب دووماهی هات ئه‌وا ب پشكداریا زێده‌تری 200 یاریزانان ژ 11 هه‌لبژارتی و 24 یانێن عه‌ره‌بی و هه‌رێما كوردستانێ بۆ 12 كێشا سه‌رئاستێ پێشكه‌فتیا، لاوان و كچان یا سیسته‌مێ، فۆل كۆنتاك، كه‌ی وان و سیمی كۆنتاك ل هۆلا زانكۆیا دهۆكێ هاتیه كرن.
یاریزانێن چه‌ند یانێن پارێزگه‌هێ بناڤێ یانا دهۆكێ پشكداری قاره‌مانیێ بوون و شیان ئه‌نجامێن دلخوشكه‌ر تۆماربكه‌ن، سه‌ر ئاستێ لاوان یانا دهۆكێ بۆ سه‌رجه‌مێ گشتی ناسناڤێ قاره‌مانیێ ب ده‌ستڤه‌ئینا پشتی یاریزانێن وێ رێزێن ئێكێ و دویێ هاتین و بڤی ره‌نگی، هه‌ر ئێك ژ یاریزان دلۆڤان جه‌مال، محه‌مه‌د حه‌كیم و یونس ئه‌حمه‌د میدالیا زێری، بیرهات سه‌ردار، بارز محه‌مه‌د، مسته‌فا فه‌رسه‌ت و عه‌لی جه‌لال میدالیێن زیڤی ب ده‌ستڤه‌ئینان.
سه‌ر ئاستێ پێشكه‌فتیان بۆ سیسته‌مێن فۆل كۆنتاك سێ یاریزانا ئه‌نجام هه‌بوون ئه‌وژی شێروان یوسف و دیار سامر میدالیێن زیڤی ئینا هه‌روه‌سا میڤان عه‌بدولكه‌ریم و حه‌مه‌د هه‌ژار میدالیێن برونزی، بۆ سیسته‌مێ كه‌ی وان یاریزانا حه‌سه‌ن مسته‌فا میدالیا زیڤی ئینا و هۆگر ئه‌مین میدالیا برونزی ، بۆ سیمی كۆنتاك به‌نگین ئه‌حمه‌د و دلبرین هاشم هه‌ر ئێك میدالیا زیڤی ب ده‌ستڤه‌ئینا، ژلایه‌كێ دیڤه شه‌ش یاریزانێن یانا دهۆكێ بۆ هه‌لبژارتیێ ئیراقێ یاری كربوون و شیان ئه‌نجامێن سه‌ركه‌فتی ب دسه‌تڤه‌بینن ئه‌وژی سه‌ر ئاستێ كچان جیهان عه‌بدوللا زیڤ، سیدرا سه‌عید برۆنزی، بۆ كوڕان هه‌ر ئێك ژ عه‌لی عزه‌ت، به‌نگین ئه‌حمه‌د، زانا سالح میدالیێن برونزی بۆ كێشێن جودا ب ده‌ستڤه‌ئینابوون، ژلایه‌كێ خوه‌ڤه ئه‌حمه‌د ئیدریس د ناڤ قاره‌مانیێ دا ڤه‌ده‌رمه‌ندیا خوه راگه‌هاند ژ یاریێ و هاته خه‌لاتكرن ژلایێ سه‌رۆكێ ئێكه‌تیا عه‌ره‌بی و بفه‌رمی وه‌كو راهێنه‌ر هاته په‌سه‌ندكرن.
د داخویانیه‌كا تایبه‌ت دا د. باسم ئه‌لشاعر سه‌رۆكێ ئێكه‌تیا كیك بۆكسینگا عه‌ره‌بی بۆ رۆژناما ئه‌ڤرۆ دیاركر كو رێكخستن و مێڤانداریا كوردستانێ و پارێزگه‌ها دهۆكێ بۆ مه‌زنترین قاره‌مانیێن مه یێن سه‌ر ئاستێ عه‌ره‌بی جهێ ده‌ستخووشیێ یه و سۆپاسیا سه‌رۆكێ حوكمه‌تا هه‌رێمێ رێزدار مه‌سرور بارزانی و پارێزگارێ دهۆكێ عه‌لی ته‌ته‌ری و و هه‌ر كه‌سه‌كێ پشته‌ڤانیێن مه بووین، ئه‌م قه‌ردارێن هه‌رێما كوردستانێ نه كو ئه‌م مێڤانكرین ب جوانترین شێوه و رێكخستنه‌كا سه‌ركه‌فتی، ژ راستی دا دیاربوو كو خه‌لكێ هه‌رێمێ و كورد مێڤاندارن و كه‌سانێن حه‌زا وه‌رزشێ یا هه‌یی ئه‌ڤچه‌نده دێ بیته ده‌رگه‌ه قۆناغێن بهێت پشتبه‌ستنێ ل سه‌ر هه‌رێمێ بكه‌ین بۆ قاره‌مانیێن داهاتی ژوانا یێن نێڤده‌وله‌تی، دووباره سۆپاس بۆ كوردستانێ و پارێزگه‌ها دهۆكێ.
ژلایێ خوه‌ڤه سالح كه‌كو راهێنه‌رێ تیما یانا دهۆكێ و هه‌لبژارتیێ ئیراقێ گوت: وه‌كو ئه‌نجام هه‌رچه‌نده مه زێده‌تر دڤیان لێ ده‌ستخووشیا هه‌موو یاریزانا دكه‌ین تایبه‌ت یێن لاوان كو بوینه قاره‌مانێن سه‌ر ئاستێ عه‌ره‌بی و ناڤوده‌نگیا خوه بلندكری هه‌روه‌سا ئه‌و یاریزانێن ئاستێن جودا شیاین میدالیێن زێری، زیڤی و برونزی ب ده‌ستڤه‌بینن، هه‌موو یاریزان جهێ شانازیێ نه و ده‌ستخووشیا وان دكه‌ین و سۆپاسیا حوكمه‌تا هه‌رێمێ و هه‌موو به‌رپرسێن خوه یێن وه‌رزشی و پارێزگارێ دهۆكێ دكه‌ین كوب ووینه خالێن سه‌ركه‌فتنێ بۆ قاره‌مانیێ و روویێ وه‌رزشی و گه‌ش یێ كوردستانێ نیشا وه‌لاتێن عه‌ره‌بی یێن پشكدار دایی.
