سه‌رۆكێ حوكمه‌تێ به‌رێ بنیاتی بۆ سێ پڕۆژه‌یێن گرنگ ل سێمێلێ دانا
ئه‌ڤرۆ:
مه‌سرور بارزانی، سه‌رۆكێ حوكمه‌تا هه‌رێما كوردستانێ به‌رێ بنیاتی بۆ سێ پڕۆژه‌یێن گرنگ د بیاڤێ چاندن و ئاسایشا خوارنێ دا ل دهۆكێ دانا و د گۆتاره‌كێ دا گۆت: دێ هه‌موو بزاڤان كه‌ین بارێ وه‌لاتیان د ڤان قه‌یرانان دا سڤك بكه‌ین.
دوهی 7/6/2022 ب به‌رهه‌ڤبوونا مه‌سرور بارزانی، سه‌رۆكێ حوكمه‌تا هه‌رێما كوردستانێ و بێگه‌رد تاله‌بانی، وه‌زیرا چاندن و ژێده‌رێن ئاڤێ و د. عه‌لی ته‌ته‌ر، پارێزگارێ دهۆكێ و د. محه‌مه‌د شوكری، سه‌رۆكێ ده‌سته‌یا وه‌به‌رهێنانێ و په‌رله‌مانتار و سه‌رۆكێ جڤاتا پارێزگه‌ها دهۆكێ و ئه‌ندامێن جڤاتێ و دام و ده‌زگه‌هێن په‌یوه‌ندیدار و كه‌سایه‌تیێن ده‌ڤه‌را سێمێلێ، به‌رێ بنیاتی بۆ سێ پڕۆژه‌یان ب گوژمێ 98 ملیۆن دۆلاران ل سێمێلێ هاته دانان.
ئه‌و پڕۆژه‌یه ژ كارگه‌ها دستار یا ئاری، خانیێن شووشه‌ی بۆ چاندنا فێقی و كه‌سكاتی و پڕۆژێ ب خودانكرنا چێلا و پیشه‌سازیا خوارنێ پێك دهێت، پڕۆژه یێ كه‌رتێ تایبه‌ته و ژ لایێ گروپێ كۆمپانیێن كاڤین گرۆپ ڤه ل سنوورێ ده‌ڤه‌رداریا سێمێلێ دێ هێته بجهئینان.
مه‌سرور بارزانی، سه‌رۆكێ حوكمه‌تا هه‌رێما كوردستانێ د گۆتارا خوه دا گۆت: “په‌یداكرنا ده‌لیڤێن كاری بۆ گه‌نجێن وه‌لاتێ مه ژ پڕۆژه‌یێن حوكمه‌تا هه‌رێما كوردستانێ یه”.
سه‌رۆكێ حوكمه‌تێ د پشكه‌كا دی یا گۆتارا خوه دا گۆت: “هیڤیدارین ل ده‌مه‌كێ نێزیك ئه‌م بازارێن جیهانێ ب به‌رهه‌مێن ناڤخوه‌یی یێن كوردستانێ ئاشنا بكه‌ین”.
