سه‌رۆكێ كۆمه‌لا كورته‌بالایان تایێ دهۆكێ: داخوازێ ژ جهێن شۆله‌ژێ دكه‌ین پتر خوه ل كورته‌بالایان بكه‌نه خودان
ئه‌ڤرۆ، زنار تۆڤی:
سه‌رۆكێ كۆمه‌لا كورته‌بالایان تایێ دهۆكێ، د دیداره‌كێ دا بۆ رۆژناما ئه‌ڤرۆ دیار كر، ب هه‌لكه‌فتا رۆژا جیهانی یا كورته‌بالایان ل 25 چریا ئێكێ، ئه‌و حه‌ز دكه‌ن جهێن شۆله‌ژێ پتر خوه ل ڤێ ته‌خێ بكه‌نه خودان و پتر ده‌لیڤێن كاری بۆ كورته‌بالایان په‌یدا بكه‌ن.
وه‌حید سه‌عید چیچۆ، سه‌رۆكێ كۆمه‌لا كورته‌بالایان تایێ دهۆكێ گۆت: “د نوكه دا “220” كورته‌بالا ل سه‌رانسه‌ری پارێزگه‌ها دهۆكێ هه‌نه، پڕانیا وان ژی خودان مووچه نه، هنده‌ك ژ وان ژی ئه‌ڤه ژ سالا 2013 ێ هه‌تا نوكه، چو مووچه پێ نه‌هاتیه دان، هه‌ر چه‌نده مامه‌له‌یێن وان چووینه وه‌زراه‌تا دارایی ژی، لێ هه‌تا نوكه مامه‌له‌یێن وان نه‌هاتینه ته‌مامكرن و د بێ مووچه نه”.
ناڤهاتی گۆتژی: “ره‌وشا كورته‌بالایان ل پارێزگه‌ها دهۆكێ گه‌له‌ك یا باش نینه، هه‌ر چه‌نده مووچه‌یه‌ك بۆ وان دهێته دان، ئه‌و ژی “150” هزار دینارن و ئه‌و مووچه یێ كێمه و تێرا پێدڤیێن وان یێن رۆژانه ناكه‌ت، ئه‌م دخوازین مووچه‌یێ وان باشتر لێ بهێت، د هه‌مان ده‌م دا، ئه‌م وه‌كو كۆمه‌لا كورته‌بالایان تایێ دهۆكێ ب ره‌نگه‌كێ به‌رده‌وام ل سه‌ر هێلین، ژ پێخه‌مه‌ت پشته‌ڤانیێ ل كورته‌بالایان بكه‌ین و بهێنه دامه‌زراندن، چو ل كه‌رتێ تایبه‌ت بیت یا ژی ل كه‌رتێ حكومی بیت، دیسا هه‌كه شیانێن دامه‌زراندنێ هه‌بن، ب تایبه‌تی ل كه‌رتێ تایبه‌ت و ئه‌و كورته‌بالایێن شیانێن كاری هه‌ین، ئه‌م حه‌ز دكه‌ین ل ڤی كه‌رتی كار بكه‌ن و پتر ده‌لیڤێن كاری بۆ بهێنه په‌یدا كرن”.
وه‌حیدی ئه‌و چه‌ند ژی ئاشكرا كر، پارێرگارێ دهۆكێ ل دووڤ شیانان هاریكاری و پشته‌ڤانیا وان كریه و گۆت: “ل سالا 2022 ئه‌ڤ هاریكاریا پارێزگاری دێ به‌رفره‌هتر لێ هێت، دیسا ئه‌م حه‌ز دكه‌ین، بازرگان و سه‌رمایه‌دار پتر پشته‌ڤانیێ ل ته‌خا كورته‌بالایان بكه‌ن، چونكی ل پارێزگه‌هێن دیتر یێن هه‌رێما كوردستانێ كه‌سێن سه‌رمایه‌دار پتر پشته‌ڤانیێ ل كورته‌بالایان دكه‌ن، دیسا رێڤه‌به‌ریا گشتی یا چاڤدێری و گه‌شه‌پێدانا جڤاكی ل پارێزگه‌ها دهۆكێ گه‌له‌ك هه‌ڤكاریا مه دكه‌ت”.
