سه‌رۆكێ لژنا سۆته‌مه‌نیێ: حوكمه‌تێ چو كونترۆل ل سه‌ر بهایێ پانزینێ نینه
دهۆك، له‌زگین جۆقی:
سه‌رۆكێ لژنا سۆته‌مه‌نیێ ل جڤاتا پارێزگه‌ها دهۆكێ دیار كر، د ڤی ده‌می دا دهۆك رۆژانه پێدڤیا ب ملیۆنه‌ك و 500 هه‌تا 700 لیترێن پانزینێ هه‌ی و دبێژیت: مه چو مایتێكرن د بهایێ پانزینێ دا نینه، چونكو د ده‌ستێ كۆمپانیان دایه.
عه‌بدولسه‌مه‌د تێلی، سه‌رۆكێ لژنا سۆته‌مه‌نیێ ل جڤاتا پارێزگه‌ها دهۆكێ بۆ رۆژناما ئه‌ڤرۆ راگه‌هاند، چاره‌سه‌ریا كونترۆلكرنا بهایێ پانزینێ ئه‌وه كو حوكمه‌تا هه‌رێما كوردستنانێ ل گه‌ل به‌غدا بگه‌هیته رێككه‌فتنێ، عیراق پانزینێ بۆ پارێزگه‌هێن هه‌رێما كوردستانێ ژی دابین بكه‌ت، وه‌كو هه‌موو پارێزگه‌هێن دی یێن عیراقێ، داكو كونترۆل ل سه‌ر بهایی بهێته كرن یان ژی حوكمه‌تا هه‌رێما كوردستانێ نه‌فتا خام بۆ پارزینگه‌هان دابین بكه‌ت، داكو پانزین ل ناڤخوه بهێته به‌رهه‌مئینان و ب رێیا رێڤه‌به‌ریێن نه‌فت و گانزایێ پانزین ل پارێزگه‌هان بهێته به‌لاڤكرن.
عه‌بدولسه‌مه‌د تێلی گۆت: “نوكه ل دهۆكێ بهایێ پانزینێ گران بوویه یا نورمال ژ 700 دیناران ده‌رباز بوویه، هه‌روه‌سا یا محه‌سه‌ن ژی ل هنده‌ك ویستگه‌هێن پانزینێ گه‌هشتیه 825 دیناران، ب راستی مه كونترۆل ل سه‌ر نینه، بهایێ پانزینێ د ده‌ستێ حكومه‌تێ دا نینه، چونكو كه‌رتێ تایبه‌ت پانزینێ دابین دكه‌ت”.
گۆتژی: “ئه‌گه‌رێن گرانبوونا بهایێ پانزینێ ئه‌وه بهایێ نه‌فتا خام ل جیهانێ بلندبوویه، هه‌روه‌سا ژی دینارێ عیراقی ژی به‌رامبه‌ر دۆلارێ ئه‌مریكی بێ بها بوویه، ئه‌ڤه بووینه ئه‌گه‌ر بها گران ببیت”.
