سه‌رۆكێ یانا باتیفا: چاڤه‌رێ ب چهـ ئینانا سۆزاینه
ئه‌ڤرۆ، عه‌لی حاجی:
سه‌رۆكێ یانا باتیفا یا وه‌رزشی دیاركر ل گه‌ل هاتنا سه‌رێ سالا نوو ئه‌و چاڤه‌رێ وه‌رگرتنا كۆژمه‌كێ پاره‌یی یێ حكومه‌تا هه‌رێمێ نه بۆ چالاكیێن یانێ و سه‌رپه‌رشتێ ئیداره‌یا سه‌ربه‌خۆیا زاخۆ سۆزێن پشته‌ڤانیێ بوو مه‌داینه.
زێده‌تر ئه‌یهه‌م جامی د داخویانیه‌كا تایبه‌ت دا بۆ رۆژناما ئه‌ڤرۆ گوت: بڕیارا خه‌رجكرنا كۆژمه‌كێ پاره‌یی ژلایێ رێڤه‌به‌ریا گشتی یا وه‌رزشی ل كوردستانێ بۆ یانا مه هاتیه ده‌ركرن لێ ژبه‌ر بهێنڤه‌دانێن سه‌رێ سالێ و راوه‌ستاندنا بووجه‌یێ 2021 ئه‌و بریار دڤێت د سالا نوو دا بكه‌ڤیته د بوارێ بجهئینانێ دا، له‌ورا چاڤه‌ڕێ پارڤه‌كرنا ئه‌وی پارێ هاتیه ته‌رخانكرن بۆ یانا باتیفا و ئه‌م پێدڤی نه ژبه‌ركو ل چارشه‌مبیا بهێت دێ كه‌ڤینه د هه‌ڤڕكیێن خولا پلا دو یا كوردستانێ بۆ یاریا ته‌پا پێی دا، سه‌رباری ئه‌و پشته‌ڤانیا دهێت هه‌موو ئاریشێن مه چاره‌سه‌ر ناكه‌ت لێ سه‌رپه‌رشتێ ئیداره‌یا زاخۆ سۆزا هاریكاریێ بۆ مه دایه ژوانا مه‌زاختیێن ئاڤاهی و یاریگه‌هێ ب ستۆیێ خوه‌ڤه‌گرتیه و سۆزدایه وه‌كو یانا زاخۆ پشته‌ڤانیێ ل یانا باتیفا بكه‌ت و ئه‌ڤه ژی جهێ ده‌ستخووشیێ و سۆپاسیێ یه.
لدور به‌رهه‌ڤیێن تیما وان یا ته‌پا پێی گوت: به‌رهه‌ڤیێن مه د ئاسته‌كێ باش دانه و لایه‌نێن حكومی و حزبی ل ناحیا باتیفا پشته‌ڤانن و دێ ل گه‌ل شاندێ تیما مه ژی گه‌شتێ كه‌ن د یاریا خوه یا ئێكێ دا ئه‌ڤچه‌نده ژی پشته‌ڤانیه‌كا مه‌زنه یا مه‌عنه‌وی وه‌رزشا باتیفا بهێز كه‌ڤیت.
