سه‌رۆكێ یانا دهۆك: سكالایا مه ل دادگه‌ها نێڤده‌وله‌تی یه و چاڤه‌ڕێ به‌رسڤێ نه
ئه‌ڤرۆ،
د داخویانیه‌كێدا سه‌رۆكێ یانا دهۆك یا وه‌رزشی بۆ رۆژناما ئه‌ڤرۆ دیاركر كو ئه‌وان سكالایا خوه یا دژی ئێكه‌تیا ته‌پا پێی یا ئیراقێ برێیا باشترین تیما پارێزه‌رێن شاره‌زا بۆ دادگه‌ها ناكۆكی و كاس یا نیڤده‌وله‌تی هنارتیه و چاڤه‌ڕێ نه ڤێ حه‌فتیێ به‌رسڤا وان بده‌ن پشتی دادگه‌هێ سكالایا وان وه‌رگرتی.
زێده‌تر د. عه‌بدوللا جه‌لاله‌دین گۆت: ده‌رئه‌نجامێ بڕیارا شاش یا لژنا رێكۆپێكیێ ل ئێكه‌تیا ته‌پا پێی یا ئیراقێ دژی تیما مه یا ته‌پا پیێ ب خوساره‌تكرنا تیما مه ل گه‌ل یانا حدوود ب سێ گۆلان بێ به‌رامبه‌ر، سه‌رباری به‌لگه و نه‌رازیبوونا هاتینه ڕه‌وانه‌كرن بۆ ئێكه‌تیا ناڤهاتی لێ چو پێنگاڤ نه هاڤێتن، له‌ورا وه‌كو مافه‌كێ مه یێ سرۆشتی مه باشترین پارێزه‌رێن تایبه‌تمه‌ند ده‌ستنیشانكرینه و سكالا خوه بۆ دادگه‌ها ناكوكیێ و كاس یا نێڤده‌وله‌تی هنارتیه ژبۆ چاره‌سه‌كرنا ئاریشا مه و دووڤچوونا شاشیێن ئێكه‌تیا ئیراقێ كو دادگه‌ها نێڤده‌وله‌تی سكالا وه‌رگریته بتنێ هنده‌ك پێرابوون ماینه ژوانا دانا به‌لگێن دژی لژنا ناكوكیێ و مه باوه‌ری هه‌یه و گه‌شبینن كو دێ ئه‌ڤ كه‌یسه د به‌رژه‌وه‌ندیا تیما مه دا ب دووماهی هێت و مافێ مه هێته ڤه‌گه‌ڕاندن.
هه‌روه‌سا ناڤهاتی ئه‌وچه‌نده ژی دیاركر كو كارگێریا یانێ رژده و ده‌ست ژ مافێ خوه به‌رناده‌ن و هه‌موو بزاڤا كه‌ین هه‌تا بگه‌هینه ئارمانجاخوه و ئێكه‌تیا ته‌پا پێی یا ئیراقێ ژ بڕیارا خوه لێڤه‌بیت و گوت: مخابن چه‌ند كه‌س هه‌نه ب پلان بزاڤا دكه‌ن یانا دهۆك ده‌رباز نه‌بیته پلا نایابا ئیراقێ لێ ئه‌م جه‌ماوه‌ر و پشته‌ڤانێن یانێ پشتراست دكه‌ین هه‌تا دووماهی چڕكه ب هه‌موو شیانێن خوه دێ به‌رده‌وامبن هه‌تا مافێ خوه بستینین و زولما ل تیما دهۆكێ نه‌هێلین.
