سه‌رۆكێ یانا دهۆك: هارون گرێبه‌ستا دووماهیێ نابیت و رژدین بۆ ده‌ربازبوونێ
ئه‌ڤرۆ،
د داخویانیه‌كێدا سه‌رۆكێ یانا دهۆك یا وه‌رزشی بۆ رۆژناما ئه‌ڤرۆ دیاركر ستێرا ته‌پا پێی و یاریزانێ یانا دالكۆرد هارون ئه‌حمه‌د ب فه‌رمی هاتیه دناڤ رێزێن تیما وان یا ته‌پا پێی دا بۆ قۆناغا دویێ یا خولا پلا ئێكا ئیراقێ دا و ئه‌ڤه یێ دووماهیێ نابیت و دانوستاندن ل گه‌ل چه‌ند یاریزانێن دی ژوانا پیشه‌كارن دهێنه كرن.
زێده‌تر د. عه‌بدوللا جه‌لاله‌دین گوت: ژبۆ بهێزكرنا رێزێن تیما مه یا ته‌پا پێی و باشترین به‌رهه‌ڤی و چاره‌سه‌ركرنا كێماتیان مه دانۆستاندن ل گه‌ل چه‌ند یاریزانێن د خولا ئیراقێ و ده‌رڤه دا كریه و دیسان یانا دالكۆرد ئه‌وا پشته‌ڤانیا خوه بۆ مه دیاركری بۆ هه‌ر ئاسانكاریه‌كێ پێخه‌مه‌ت تیما مه بشێوه‌كێ باشتر به‌رهه‌ڤیان بكه‌ت و ده‌ربازبیته پلا نایابا ئیراقێ، پشتی دانۆستاندن هاتینه ئه‌نجامدان ب فه‌رمی یاریزانێ یانا دالكۆرد هارۆن ئه‌حمه‌د دێ بۆ ماوێ چار هه‌یڤان یاریێ بۆ تیما مه كه‌ت و هه‌روه‌سان مه دانۆستاندن ل گه‌ل هه‌ردو پیشه‌كارێن هه‌مان یانه كرینه ئه‌وژی یێ ئیرانی به‌ختیار ره‌حمانی و یێ ئه‌رجه‌نتینی ئیزیكێل مۆنتاتا كو په‌یوه‌ندیێ ب یانا مه بكه‌ن و هێشتا ب فه‌رمی چو نه هاتیه راگه‌هاندن.
ژلایه‌كێ دووڤه ناڤهاتی ئه‌وچه‌نده ژی دیاركر كو چه‌ند یاریزانه‌كێن دی ژ خولا ئیراقێ هاتینه ده‌ستنیشانكرن و دانوستاندن به‌رده‌وامن بۆ گه‌هشتنا رێكه‌فتنێ كو زووترین ده‌م بهێنه دناڤ رێزێن تیمێ به‌ری ده‌ستپێكرنا قۆناغا دویێ یا خولێ و گوت: هه‌موو ئارمانجا مه بۆ ده‌ربازبوونا تیما مه به‌ره ب خولا پلا نایابه و رژدین سه‌رباری ئاسته‌نگێن دارایی لدووڤ شیانا دێ كاركه‌ین، ب هیڤییا وێ یه‌كێ حكومه‌تا هه‌رێما كوردستانێ و به‌رپرسێن وه‌رزشی پشته‌ڤانیا دارایی بۆ یانێ بكه‌ن ژبه‌ركو یانا دهۆك ناڤه‌كێ مه‌زنه دناڤ چالاكیێن وه‌رزشی دا سه‌نگا خوه یا هه‌یی و ئه‌م بزاڤێ د كه‌ین بهێز ڤه‌گه‌ڕیێت بۆ ناڤ چالاكیێن مه‌زن دا.
لدووماهیێ سه‌رۆكێ یانێ سۆپاسیا ئه‌وان كه‌سان كر كو رێخووشكه‌ر بووینه گرێبه‌ستا یاریزان هارون بهێته ئیمزاكرن سه‌رباری هه‌بوونا گرێبه‌ستێن گرانبوها یێن چه‌ند یانێن دی یێن ئیراقی و ئاسیایی بۆ یاریزانی هاتین لێ وه‌فاداریا وی بۆ یانا دهۆكێ و خه‌مخوریا سه‌رۆكێن یانا دالكۆر كاوه عه‌بدوللا و برایێ وی سه‌ركه‌فت كو ئاسانكاری و هاریكار بووینه پێخه‌مه‌ت پشته‌ڤانیا یانا دهۆكێ بهێته كرن.
لدووڤ ژێده‌رێن تایبه‌ت كو دانوستاندن ل گه‌ل هه‌ر ئێك ژ یاریزانێ كورد یێ رۆژهه‌لاتا كوردستانێ به‌ختیار ره‌حمانی و یێ ئه‌رجه‌نتینی ئێزیكێل مۆنتانا هه‌ردو یاریزانێن یانا دالكۆر ل گه‌ل یاریزانێ یانا حدود عه‌باس عه‌لی به‌رده‌وامن و د نێزك دا دێ بابه‌تێ وان هێته ئێكلاكرن وهه‌روسان دبیت ده‌ست ژ پیشه‌كارێ خوه یێ سیرالیۆنی شیكا فۆفانا به‌رده‌ن.
