سه‌رۆكێ یانا زاخۆ: گۆهوڕین بێ مفا بوون و دێ پێڕابوون هه‌بن
ئه‌ڤرۆ، عه‌لی حاجی:
د داخویانیه‌كێدا سه‌رۆكێ یانا زاخۆ یا وه‌رزشی دیاركر ئه‌و گوهۆڕینێن دناڤ رێزێن تیما وان یا ته‌پا پێی ئه‌وا پشكدار د خولا پلا نایابا كوردستانێ دا هاتینه كرن بێ مفا بوون و ئاست و ئه‌نجامێن یاریا باشتر نه‌كرینه.
زێده‌تر بلند شه‌فیق تایبه‌ت بۆ رۆژناما ئه‌ڤرۆ گوت: ژبۆ باشتكرنا ئاست و ئه‌نجامێن تیما مه یا ته‌پا پێی د خولا كوردستانێ دا تایبه‌ت بۆ قۆناغا دویێ گوهۆڕین و ئینانا راهێنه‌ره‌كێ نوو ل گه‌ل چه‌ند یاریزانا بۆ تیمێ پێخه‌مه‌ت ڤه‌گه‌ڕیانا بهێز یا زاخۆ د خولێ دا لێ ئه‌و پێشبینی و گوهۆڕینێن هاتینه كرن به‌روڤاژی ده‌ركه‌فتن و بێ مفا بوون به‌لكو ئاست و ئه‌نجامێن لاواز به‌رده‌وام بوون و ئه‌م ژ ڤێ چه‌ندێ رازی نینن تایبه‌ت ئه‌و رێزبه‌ندیا نوكه تیما زاخۆ تێدا كو ل دووماهیێ دهێت و دێ پێڕابوون هێنه‌كرن بۆ چاره‌سه‌ركرنا ئه‌وان ئاریشا، له‌ورا ل گه‌ل كادرێ راهێنانێ كۆمبوونه‌كا نه ئاسیایی ئه‌نجامدایه ل سه‌ر ئه‌گه‌رێن ڤان ئه‌نجامان و دێ ل گه‌ل هه‌موو یاریزانان ژی ڤی بابه‌تی ب ته‌سه‌لی هێته گه‌نگه‌شه‌كرن، ژبه‌ركو ئه‌ڤه نه هیڤی و ئارمانجێن مه‌نه و نابیت ئه‌ڤ ئاست و ئه‌نجامه به‌رده‌وامبن.
ناڤهاتی ئه‌وچه‌نده ژی دیاركر كو ره‌وشا نوكه یا تیم تێدا مه‌ترسیداره تایبه‌ت گه‌فێن داكه‌فتنێ بۆ پلا ئێك ل سه‌ر هه‌نه له‌ورا ژبۆ چاره‌سه‌ریا ڤێ ئاریشێ دێ بزاڤا كه‌ین هنده‌ك یاریزانێن تیما مه یا پشكدار د خولا ئیراقێ دا مفایی ژێ وه‌ربگرین و گوت: سه‌رباری وێ یه‌كێ ره‌وشا تیمێ به‌ری یانێ وه‌ربگرن یا باش نه‌بوو لێ دڤێت ئه‌م هه‌موو بزاڤا بكه‌ین ژێ ئاریشێ قۆرتالبكه‌ین پێخه‌مه‌ت مانا وێ د خولێ دا و بۆ وه‌رزێ بهێت بهێز ڤه‌گه‌ڕیێن.
