سه‌رۆكێ ئاژانسا نێڤده‌وله‌تی یا ئه‌تۆمی: ل ئیرانێ بنگه‌هێن نهێنی یێن ئه‌تۆمی هه‌نه
ب، سه‌رجان مه‌حمود:
رافائیل گرۆسی سه‌رۆكێ ئاژانسا نێڤده‌وله‌تی یا ئه‌تۆمی د داخۆیانیه‌كێ دا ل ئیسپانیا راگه‌هاند كو ئه‌و ل گه‌ل ئیرانێ دانوستاندنان دكه‌ن دا كو ئیران هنده‌ك چالاكیێن خوه یێن ل دۆر به‌رنامێ ئه‌تۆمی بده‌ته راگرتن و گۆت: (د هنده‌ك واران دا دانوستاندنێن مه ل گه‌ل ئیرانێ به‌رده‌وام دكه‌ن لێ مخابن زانیاریێن ل به‌ر ده‌ستێن مه سه‌باره‌ت ب به‌رنامێ ئه‌تۆمی یێ ئیرانێ گه‌له‌ك كێمن و هه‌تا نها ده‌وله‌تا ئیرانێ ب دروستی زانیاریان ل سه‌ر به‌رنامێ خوه ناده‌ت و ده‌رگه‌هێن بنگه‌هێن ئه‌تۆمی ڤه‌ناكه‌ت و ئه‌و یه‌ك گۆمانان ل سه‌ر ئیرانێ دروست دكه‌ت، ئه‌م وه‌سا دبینین هژماره‌ك زێده بنگه‌هێن نهێنی یێن ده‌وله‌مه‌ندكرنا ئورانیومێ ل ئیرانێ هه‌نه و ب ره‌نگه‌كی نهێنی به‌رده‌وامیێ دده‌نه كارێن خوه و نه دووره د ده‌مه‌كێ نێزیك دا ئیران ببیته خوه‌دانا چه‌كێن ئه‌تۆمی و بۆ ڤێ چه‌ندێ گۆمانێن مه یێن مه‌زن ل سه‌ر ئیرانێ هه‌نه).
ناڤهاتی هه‌روه‌سا راگه‌هاند كو ڤه‌كۆلینێن وان ل سه‌ر ئیرانێ به‌رده‌وام دكه‌ن و هه‌تا نها ل دووڤ زانیاریان سێ بنگه‌هێن ڤه‌شارتی یێن ئیرانێ هه‌نه و به‌رپرسێن ئیرانێ ب دروستی زانیاریان ل سه‌ر به‌رنامێ ئه‌تۆمی ناده‌نه ئاژانسا ئه‌تۆمی و گۆت: (ژ بۆ كو ئه‌م ل گه‌ل ئیرانێ بگه‌هینه رێككه‌فتنه‌كا دروست دڤێت ده‌وله‌تا ئیرانێ ده‌رگه‌هێن هه‌موو بنگه‌هێن بۆ دروستكرنا چه‌كێن ئه‌تۆمی بۆ ئاژانسا مه ڤه‌كه‌ت و د مژارا به‌رنامێ ئه‌تۆمی دا ل گه‌ل مه د ناڤ هه‌ماهه‌نگیێ دا بیت، هه‌كه وه‌سا نه‌بیت گه‌له‌ك زه‌حمه‌ته ئه‌م ل گه‌ل ئیرانێ بگه‌هینه رێككه‌فتنه‌كا دروست و ئه‌م نه‌چارین ل دژی ئیرانێ هنده‌ك بریارێن نوو وه‌ربگرین).
ناڤهاتی د دووماهیا ئاخڤتنا خوه دا راگه‌هاند كو ژ رۆژا هه‌شتێ حزیرانێ ڤه ئه‌و چاڤه‌رێی به‌رسڤه‌كا دروست یا ئیرانێ نه لێ مخابن ده‌وله‌تا ئیرانێ دخوازیت مه مژوول بكه‌ت و گۆت: (ئه‌م هه‌ر د ناڤ بزاڤان داینه دا كو د زووترین ده‌م دا چاره‌یه‌كا گونجای بۆ به‌رنامێ ئه‌تۆمی یێ ئیرانێ ببینین و هه‌كه ئیران ده‌ست ژ بزاڤێن خوه یێن نهێنی به‌رنه‌ده‌ت وی ده‌می دێ ده‌رگه‌هێ دانوستاندنان هێته داخستن و بێگومان وی ده‌می دێ گه‌له‌ك سزایێن نوو ژی ل سه‌ر ئیرانێ هێنه سه‌پاندن).
ئه‌و یه‌ك د ده‌مه‌كێ دایه كو حه‌فتیا بۆری كه‌مال خه‌رازی شیره‌تكارێ رێبه‌رێ شوره‌شا ئیسلامی یا ئیرانێ راگه‌هاند كو ئیرانێ ئه‌و شیان هه‌نه كو دشێت چه‌كێن ئه‌تۆمی دروست بكه‌ت و گۆت: (دوژمنێن ئیرانێ به‌ری نها گه‌له‌ك بزاڤ كرن كو ته‌كنولوجیا دروستكرنا چه‌كێن ئه‌تۆمی ل ئیرانێ ژناڤ ببه‌ن لێ د بزاڤێن خوه دا سه‌ركه‌فتی نه‌بوون و نها ئیران دشێت چه‌كێن ئه‌تۆمی دروست بكه‌ت).
