سهرۆكێ ئێكهتیا زهلامان سالا بۆری 534 سكالا ژلایێ زهلامان هاتینه تۆمار كرن
ههولێر، قائید میرۆ:
ل گورهی ئامارهكا ئێكهتیا زهلامێن كوردستانێ ل سالا بوری 534 سكالا ژلایێ زهلامانڤه هاتینه تۆمار كرن و سهرۆكێ ئێكهتیا زهلامان ژی ئاشكرا كر، پێنج زهلام ژلایێ ههڤژینێن وانڤه هاتینه كوشتن و 65 زهلامان ژی خوه كوشتیه و ههشت ژ وان ل پارێزگهها دهۆكێ بووینه، ههروهسا دیاردهك ل سالا بۆری پهیدا بوویه ئهوژی گهفكرن ل زهلامان ب رێیا تۆڕێن جڤاكی و سۆشیال میدیایێ.
بورهان عهلی، سهرۆكێ ئێكهتیا زهلامێن كوردستانێ بۆ رۆژناما ئهڤرۆ دیار كر، ل سالا بۆری 2022ێ ل سهرانسهری ههرێما كوردستانێ 534 حالهتێن تۆماركرنا سكالایان هاتینه تۆمار كرن ژلایێ زهلامانڤه، كو بن پێكرن ل ههمبهر مافێن وان هاتیه كرن و 65 زهلامان دووماهی ب ژیانا خوه ئینایه و ههشت ژ وان خهلكێ پارێزگهها دهۆكێ نه و گۆت: (مخابن ههر سالا بۆری پێنج زهلام ژلایێ ههڤژینێن وانڤه هاتینه كوشتن و دهستێن كهسێن دیژی تێدا ههبوویه، ههروهسا سالا بۆری 37 حالهتێن دهركرنا زهلامێن دانعهمر ژلایێ خێزانێن وانڤه هاتینه تۆمار كرن، بتایبهتی ل سالێن دووماهیێ دهمێ زارۆك مهزن دبن دچنه بهرهیێ دایكێ و كار بۆ دهركرنا بابێ خوه دكهن، دیاردهكا دی سهرههلدایه ئهوژی دهست ب سهردا گرتنا مووچێ زهلامانه ژلایێ ههڤژینێن وانڤه بتنێ سالا بۆری ههشت حالهتێن دهست ب سهر داگرتنا مووچێ زهلامان هاتینه تۆماركرن).
سهرۆكێ ئێكهتیا زهلامێن كوردستانێ گۆتژی: (ههر ل سالا بۆری 12 حالهتێن دهستدرێژیێ بۆ سهر زهلامان هاتینه تۆمار كرن و دیاردهیهكا مهترسیدار ژی سالا بۆری پهیداب وویه ئهوژی گهف كرن ب رێیا سۆشیال میدیایێ و تۆڕێن جڤاكی، كو بهری ژن و زهلام جودا ببن لهوانهیه ب رێكا تۆڕێن جڤاكی پهیوهندی ههبن یان وێنهیێن نه ههژی و ڤیدیۆ ههبن پشتی تهلاقێ ژلایێ ژنانڤه هاتینه بكارئینان وهكی گهف بۆ پهیداكرنا پارهی یان ههر ئهگهرهكێ دی).
بورهان عهلی ئاماژه پێ كر، ئهگهرێن توندوتیژیێ ههمبهری زهلامان زۆرن، بهلێ هندهك ئهگهرێن سهرهكی ههنه وهكی دهستوهردانا كهس و كاران و رهوشا ئابوریا خێزانێ و سۆشیال میدیایێ، ئهڤه زێدهتر ئهگهرێن سهرهكینه بۆ ئهنجامدانا توندوتیژیێ ل ههمبهری زهلامان، چونكی ل گورهی دووڤچوونا ژلایێ رێكخراوا زهلامێن كوردستانێ بۆ هاتیه كرن دهركهفتیه دهستێن دهرڤهی خێزانێ ههبووینه بۆ ئهنجامدانا توندوتیژیێ ههمبهری زهلاما بۆ نموونه ئهو پێنج زهلامێن هاتینه كوشتن ژلایێ ههڤژینێن وانڤه ههموو ب ههڤكاریا كهسێن دی بوویه و گۆت: (ههروهسا دهمێ ههبوونا ههر ئاریشهیهكێ كهسێن دهرڤهی خێزانێ دهستوهردانێ د ئاریشهیا ناڤبهرا ژن و زهلاماندا دكهن و زێدهتر ئالۆزیان پهیدا دكهن ئهڤهژی دیاردهكا نه ههژیه و زێدهتر بوویه ئهگهرێ بلندبوونا توندوتیژیێ دناڤبهرا ههڤژینان).
