سه‌رۆكێ بیلارۆسیا: هه‌كه شه‌ر روو بده‌ت دێ ل گه‌ل رۆسیا بین
ب، سه‌رجان مه‌حمود:
ئالێكسانده‌ر لوكاشینكۆ سه‌رۆكێ بیلارۆسیا د داخۆیانیه‌كێ دا بۆ رۆژنامه‌ڤانان راگه‌هاند كو ئوكرانیا ب هاندانا ئه‌مریكا و ناتۆ هه‌ول دده‌ت ل هه‌رێما دۆمباس ئالۆزیان دروست بكه‌ت و گۆت: (هه‌كه ئه‌مریكا و ناتۆ ده‌ستێوه‌ردانێ نه‌كه‌ن له‌شكرێ ئوكرانیا نه‌شێت ئێرشێ هه‌رێما دۆمباسێ بكه‌ت، ژ به‌ر كو باش دزانیت دێ رۆسیا به‌رسڤێن گه‌له‌ك دژوار ده‌ت و د هه‌مان ده‌می دا ب ئاشكرا دبێژم هه‌كه ئوكرانیا ل دژی هه‌رێما دۆمباس بكه‌ڤیته بزاڤێ ئه‌م دێ وه‌ك بیلارۆسیا هه‌ر زوو به‌رسڤا وێ ده‌ین و دێ شه‌رێ ئوكرانیا كه‌ین و بۆ ڤێ چه‌ندێ من دڤێت ب توندی هۆشداریێ بده‌مه ئوكرانیا كو نه‌بیته ئه‌گه‌رێ روودانا شه‌ره‌كێ دژوار).
ناڤهاتی هه‌روه‌سا راگه‌هاند ژی كو جهێ ئوكرانیا ل گه‌ل وانه و دڤێت به‌رێ خوه بده‌ته رۆسیا و بیلارۆسیا و ده‌ست ژ هه‌ڤالبه‌ندیا ئه‌مریكیان به‌رده‌ت و گۆت: (هه‌كه ده‌ستهه‌لاتا ئوكرانیا وه‌سا هزر دكه‌ت كو هه‌كه شه‌ر روو بده‌ت دێ ئورۆپا و ئه‌مریكا هه‌ڤكاریا وان كه‌ن ئه‌و گه‌له‌ك شاشن، چونكی نه ئورۆپا و نه ژی ئه‌مریكا ئارامیا وه‌لاتێن خوه قوربانی ئوكرانیا ناكه‌ن و بۆ پاراستنا ئوكرانیا ل گه‌ل رۆسیا شه‌ری ناكه‌ن، ژ به‌ر هندێ ژی ئه‌ز دبێژم د ده‌مه‌كێ وه‌سا دا دێ ئوكرانیا بیته قوربانی و ژ به‌ر هندێ ژی باشتره ده‌ستهه‌لاتا ئوكرانیا به‌رژه‌وه‌ندیا گه‌ل و وه‌لاتێ خوه بپارێزیت و به‌رژه‌وه‌ندیا وێ نه ل گه‌ل ئه‌مریكا و ئورۆپا یه).
