سه‌رۆكێ رۆسیا: دڤێت هه‌موو هێزێن بیانی ژ سووریێ ده‌ركه‌ڤن
ب، سه‌رجان مه‌حمود:
ڤیلاده‌میر پوتین سه‌رۆكێ رۆسیا د داخۆیانیه‌كا رۆژنامه‌ڤانی دا راگه‌هاند كو ل پرانیا سووریێ كۆنترۆل كه‌ڤتیه ده‌ستێ حوكمه‌‌تا سووریێ و ل درعا ژی ره‌وش به‌ر ب ئارامیێ ڤه دچیت و گۆت: (د ره‌وشا نها دا ئاریشه ل ئدلبێ هه‌یه و هه‌بوونا كۆمێن چه‌كدار بۆ مه دسه‌لمینیت كو هێشتا مه‌ترسیا ل سه‌ر ئارامی و چاره‌سه‌ریا سیاسی ل سووریێ هه‌یه و ئه‌م هه‌ول دده‌ین ئالۆزیێن ل ئدلبێ ژی چاره‌سه‌ر بكه‌ین و به‌ر ب قۆناغا چاره‌سه‌ریا سیاسی ڤه بچین دا هه‌موو پرسێن ل سووریێ بهێنه چاره‌سه‌ر كرن).
سه‌رۆكێ رۆسیا هه‌روه‌سا راگه‌هاند ژی كو هه‌كه هێزێن بیانی ب ته‌مامی ژ ئاخا سووریێ ده‌ركه‌ڤن دێ ده‌لیڤا دیتنا چاه‌سه‌ریا سیاسی و جێگركرنا ئاشتیێ بهێزتر بیت و گۆت: (دیاره هنده‌ك ده‌وله‌ت ئانكۆ هێزێن بیانی ناخوازن ره‌وشا سووریێ ئارام بیت و ب ره‌وشا ئالۆز دخوازن خوه بگه‌هیننه ئارمانجێن خوه، لێ ئه‌و یه‌ك خزمه‌تا ئارامیا سووریێ و هه‌موو رۆژهه‌لاتا ناڤین ناكه‌ت و بۆ ڤێ چه‌ندێ دڤێت هه‌موو هێزێن بیانی بێی مه‌رج ژ ئاخا سووریێ ده‌ركه‌ڤن).
ژێده‌رێن رۆژنامه‌ڤانی دیار دكه‌ن كو پشتی كۆمبوونا ئاسایی یا نه‌ته‌وه‌یێن ئێكگرتی ره‌جه‌ب ته‌یب ئه‌ردۆغانێ سه‌رۆك كۆمارێ توركیا دێ سه‌ره‌دانا رۆسیا كه‌ت و دێ ل گه‌ل ڤیلاده‌میر پوتین سه‌رۆكێ رۆسیا كۆم بیت، دهێته چاڤه‌رێ كرن كو د كۆمبوونا د ناڤبه‌را هه‌ر دو سه‌رۆكان دا ره‌وشا ئدلبێ و ئالۆزیێن ڤێ دووماهیێ یێ د ناڤبه‌را هێزێن سووریێ و كۆمێن چه‌كدارێن ل ئدلبێ دا بهێته گه‌نگه‌شه كرن و ئارمانجا پوتین ژی د كۆمبوونا ل گه‌ل ئه‌ردۆگانی دا ئه‌وه كو قۆناغا بێچه‌ككرنا چه‌كدارێن ل ئدلبێ بهێته ده‌ستپێكرن و د هه‌مان ده‌می دا چه‌كدارێن بیانی ژی ژ سووریێ ب گشتی و تایبه‌ت ل ئدلبێ بهێنه ده‌رخستن.
رۆسیا د ناڤا ڤێ هه‌یڤێ دا ده‌ستپێكێ پێشوازی ل به‌شار ئه‌سه‌د سه‌رۆكێ رژێما سووریێ كر و پشتی به‌شاری ژی پێشوازی ل شانده‌كێ رێڤه‌به‌ریا خوه‌سه‌ر یا رۆژئاڤایێ كوردستانێ كر و دێ ل دووماهیا ڤێ هه‌یڤێ ژی رۆسیا پێشوازیێ ل سه‌رۆك كۆمارێ توركیا كه‌ت.
