سه‌رۆكێ لیژنا باژێڕڤانیان: چو بڕیار بۆ تاپۆكرنا مه‌زره‌عه‌یان نینن
هه‌ولێر، قائید میرۆ
ل گۆره‌ی دووڤچوونه‌كا رۆژناما ئه‌ڤرۆ، پشتی ب كاربوونا قانوونا تاپۆكرنا خانیێن زێده‌گاڤی پرۆسا وه‌رگرتنا مامه‌له‌یێن وه‌لاتیان ب سستی بڕێڤه‌دچیت و سه‌رۆكێ لیژنا باژێڕڤانیان ژی ل په‌رله‌مانێ كوردستانێ ئاشكراكر، دێ دووڤچوون بۆ پرسا وه‌رگرتنا مامه‌له‌یێن وه‌لاتیان و تاپۆكرنا خانیێن زێده‌گاڤی هێته‌كرن و نابیت وه‌لاتی ڤێ ده‌لیڤێ ژ ده‌ست خۆ بده‌ن. ل دۆر تاپۆكرنا مه‌زره‌عه‌یان ژی دبێژیت: چو بڕیار بۆ تاپۆكرنا مه‌زره‌عه‌یان نینن، ژ به‌ر كو زۆربه‌یا كه‌سێن مه‌زره‌عه هه‌ین د زه‌نگینن.
لوقمان وه‌ردی، سه‌رۆكی لیژنا باژێڕڤانیان ل په‌رله‌مانێ كوردستانێ بۆ رۆژناما ئه‌ڤرۆ دیار كر “دووڤچوون بۆ تاپۆكرنا خانیێن زێده‌گاڤی دهێته‌كرن و دگه‌ل باژێڕڤانیان و سه‌ره‌دانێن مه‌یدانی هه‌بووینه، ئه‌ركێ یه‌كه‌یێن كارگێڕیه بۆ وه‌رگرتنا مامه‌له‌یێن تاپۆكرنا خانیێن زێده‌گاڤی، چونكو پشتی راستڤه‌كرنا قانوونێ ده‌مێ تاپۆكرنا خانیێن زێده‌گاڤی هاتیه درێژكرن و به‌ری نوكه و قانوون بهێته راستڤه‌كرن ده‌مێ وه‌رگرتنا مامه‌له‌یێن خانیێن زێده‌گاڤی ب تنێ شه‌ش هه‌یڤ هاتبوونه دیاركرن، به‌لێ نوكه هاتیه درێژكرن بۆ ئێك سال.
زێده‌تر دبێژیت: د ده‌مێ ئێك سال دا وه‌لاتی دشێن مامه‌له‌یێن خۆ پێشكێشی باژێڕڤانیان و لیژنه‌یێن په‌یوه‌ندیدار بكه‌ن، پێدڤیه د ده‌مێ قانوونی دا وه‌لاتی داخوازیێن خۆ پێكشێش بكه‌ن، جاره‌كا دی قانوونا تاپۆكرنا خانیێن زێده‌گاڤی ناهێته درێژكرن و گۆهۆڕین ل بهایێ تاپۆكرنێ ناهێته‌كرن، هه‌ر كه‌سه‌كێ د ده‌مێ قانوونی دا مامه‌له‌یێن تاپۆكرنا خانیێن زێده‌گاڤی پێشكێش نه‌كه‌ت ئه‌ڤه دێ هێته بێ به‌هركرن ژ تاپۆكرنا خانیێن زێده‌گاڤی و داخوازێ ژ وه‌لاتیان دكه‌ین ئه‌ڤێن خانیێن وانا زێده‌گاڤی سه‌ره‌دانا لایه‌نێن په‌یوه‌ندیدار بكه‌ن بۆ تاپۆكرنا خانیێن خوه.
سه‌رۆكێ لیژنا باژێڕڤانیان گۆت ژی “قانوونا تاپۆكرنا خانیێن زێده‌گاڤی ل رۆژا 28ی هه‌یڤا 11 سالا بۆری ل رۆژناما فه‌رمی هاتیه به‌لافكرن و هه‌تا دووماهیا ئه‌ڤ ساله وه‌لاتی دشێن مامه‌لێن خۆ پێشكێشی لیژنێن وه‌رگرتنا داخوازیێن تاپۆكرنێ بكه‌ن، ل رۆژا ده‌رچوونا رێنمایان دێ مامه‌له‌یێن وه‌لاتیان هێنه وه‌رگرتن، ده‌لیڤه‌یه‌كا زێڕینه بۆ وه‌لاتیێن خانیێن زێده‌گاڤی هه‌نه و ره‌نگه ده‌لیڤه‌یه‌كا هۆسا ب ساناهی ب ده‌ست وانا نه‌كه‌ڤیت، ئه‌ركێ حوكمه‌تێ یه قانوونێ وه‌ك خۆ بجه بینیت.
ل دۆر تاپۆكرنا مه‌زره‌عه‌یان لوقمان وه‌ردی ئاماژه كر “هه‌تا نوكه ئه‌م نه‌چووینه ناڤا هویرده‌كاریێن تاپۆكرنا مه‌زره‌عه‌یان، ژ به‌ر كو بابه‌ته‌كێ زۆر هه‌ستیاره و ئه‌م ناڤه‌شێرین بابه‌تێ مه‌زره‌عا نه‌بوویه بابه‌تێ لیژنا باژێڕڤانی، چونكو زۆربه‌یا كه‌سێن مه‌زره‌عه هه‌ین د زه‌نگینن، خه‌لكێ هه‌ژار و كێم ده‌رامه‌ت مه‌زره‌عه نینن، له‌وڕا ژی په‌رله‌مانی له‌زكر بۆ ده‌ركرنا قانوونا تاپۆكرنا خانیێن زێده‌گاڤی كریه و زێده‌تر خه‌لكێ هه‌ژار و كێم ده‌رامه‌ت دێ مفاداربن، پرسا زێده‌گاڤیێ گرێدایی ده‌زگه‌هێن حوكمه‌تێ و یه‌كه‌یێن ئیداری، ژ به‌ر كو ده‌ركرنا قانوونا تاپۆكرنا خانیێن زێده‌گاڤی مه‌ره‌م ژێ ئه‌ڤه بوویه دووماهی ب پرسا زێده‌گاڤیان بهێت، هه‌ر ده‌ڤه‌ره‌كێ زێده‌گاڤی بهێته‌كرن ل سه‌ر ئه‌ردێ حوكمه‌تێ و گشتی ئه‌ڤه پێدڤیه ده‌زگه‌هێن سه‌ر ب حوكمه‌تێ لێپرسینێ دگه‌ل كه‌سێن سه‌رپێچكار بكه‌ن.
