سه‌رۆكێ پارتا سوسیالیست یا كوردستانێ: مه دڤێت سیاسه‌ته‌كا هه‌ڤپشك یا كوردی دروست بكه‌ین
ب، سه‌رجان مه‌حمود:
مه‌سود ته‌ك سه‌رۆكێ گشتی یێ پارتا سوسیالیست یا كوردستانێ ل باكور ل گه‌ل شانده‌كێ سه‌ره‌دانا باژێرێن باكورێ كوردستانێ كر و ل گه‌ل سازیێن جڤاكێ سڤیل هه‌ڤدیتن ساز كر و ل دووڤ راپۆرته‌كا مالپه‌رێ گازه‌ته دوار یا نووچه‌یان مه‌سعود ته‌ك د چارچۆڤێ سه‌ره‌دانێن خوه دا ل باژێرێ جۆلهمێرگێ ل گه‌ل ژوورا پارێزه‌رێن جۆلهمێرگێ و كۆمه‌لا مافێن مرۆڤی و كۆمه‌لا رۆژنامه‌ڤان هه‌ڤدیتنێن جودا سازكر و تێدا راگه‌هاند كو مه وه‌ك پارتا سوسیالیست ل پرانیا باژێرێن كوردستانێ ده‌ست ب سه‌ره‌دانا سازیێن سڤیل و رێكخستنێن مافێن مرۆڤی كریه و ل گه‌ل وان پرسێن هه‌رێمی و ئاریشێن هه‌ی گه‌نگه‌شه كرینه و گۆت: (سازیێن كو مه سه‌ره‌دانا وان كری دبیت نێزیكی ئالیه‌كێ دی یێ سیاسی بن لێ ب گه‌رمی پێشوازیا مه كرن و مه شیا پێكڤه پرسێن ل كوردستانێ بئاخڤین و هه‌ڤدیتنێن مه گه‌له‌ك ئه‌رێنی بوون و مه ره‌خنه و هزرێن خوه ل گه‌ل هه‌ڤدو پارڤه كر، بێگومان تێگه‌هشتنه‌كا گه‌له‌ك باش هه‌بوو، ئه‌م سوپاسیا هه‌لوه‌ستێ وان یێ نشتیمانی دكه‌ین، چونكو ئه‌و ژی خزمه‌تا گه‌لێ مه دكه‌ن).
مه‌سعود ته‌ك هه‌روه‌سا راگه‌هاند كو مه‌ره‌ما وان د سیاسه‌تێ و سه‌ره‌دانێن ب ڤی ره‌نگی دا ئه‌وه كو هزرا پێكڤه كاركرنێ ده‌ركه‌ڤیته مه‌یدانێ و گۆت: (ل كوردستانێ پێدڤی ب بزاڤا پێكڤه كاركرنێ هه‌یه و ئارمانجا مه یا سه‌ره‌كی ژی ئه‌وه ل كوردستانێ سیاسه‌ته‌كا هه‌ڤپشك دروست بكه‌ین و پێكڤه كار بكه‌ین ژ به‌ر كو پێدڤیا مه كوردان ب ڤێ یه‌كێ هه‌یه و مه ژی بۆ ڤێ چه‌ندێ سه‌ره‌دانێن خوه ده‌ستپێكرینه، بێگومان مه دڤێت سه‌ره‌دانا پرانیا باژێرێن باكورێ كوردستانێ بكه‌ین، نها ده‌لیڤه‌كا باش هاتیه پێش دا ئه‌م ل دۆر پرسێن هه‌ی دانوستاندنان بكه‌ین و پێكڤه كار بكه‌ین).
د دووماهیا ئاخڤتنا خوه دا ژی سه‌رۆكێ گشتی یێ پارتا سوسیالیست یا كوردستانێ ل باكور راگه‌هاند كو وان ده‌ست ب بزاڤه‌كا نوو كرینه، ئارمانجا وان ئه‌وه دا كو هه‌موو پارت و ئالیێن سیاسی یێن كوردستانی ل باكورێ كوردستانێ پێكڤه كار بكه‌ن، ئه‌و یه‌ك دێ بیته ئه‌گه‌رێ بهێزبوونا پێگه‌هێ كوردان ژی و گۆت: (پێدڤی ب ئێكگرتن و پێكڤه كاركرنێ هه‌یه و كار و خه‌باتا مه یا سه‌ره‌كی ژی هه‌ر بۆ ڤێ یه‌كێ یه و ئه‌م حه‌ز دكه‌ین هه‌موو پارت و ئالیێن سیاسی بگه‌هنه ڤێ باوه‌ریێ كو ئێدی ده‌م یێ هاتی ئه‌م پێكڤه سیاسه‌ته‌كا ئێكگرتی یا كوردی ئاڤا بكه‌ین و پێكڤه كار بكه‌ین).
