سه‌رۆكێ په‌رله‌مانێ ئیرانێ: ئیران د ره‌وشه‌كا گه‌له‌ك خراب دایه‌ و دڤێت وه‌لاتی د هاریكار بن

ئه‌ڤرۆ:

محه‌مه‌د باقر قالیباف سه‌رۆكێ په‌رله‌مانێ ئیرانێ د روونشتنا په‌رله‌مانێ وی وه‌لاتی دا راگه‌هاند كو ئه‌مریكا ده‌ستپێكێ رێ نه‌دا كو ئیران ده‌رمانێن پێدڤی ژ ده‌رڤه‌ بینیت و ژ به‌ر هندێ ژی كۆرۆنا زوو به‌لاڤ بوو و نها ژی هه‌ر ژ به‌ر سزایێن ئه‌مریكا مه‌ نه‌شیایه‌ وه‌كو پێدڤی ڤاكسینێ بۆ وه‌لاتیێن خوه‌ دابین بكه‌ین و گۆت: (ئیران د ره‌وشه‌كا گه‌له‌ك خراب دایه‌ و دڤێت وه‌لاتی د هاریكار بن و پێگیریێ‌ ب رێنمایێن ساخله‌میێ‌ بكه‌ن).

ئه‌و یه‌ك د ده‌مه‌كێ دایه‌ كو به‌ری نها دو جاران عه‌لی خامنه‌یی رێبه‌رێ شوره‌شا ئیسلامی یا ئیرانێ راگه‌هاند كو ئه‌و ب چو ره‌نگه‌كێ رێ ناده‌ن ڤاكسین ژ ده‌رڤه‌ بۆ ئیرانێ بهێته‌ دابین كرن و ئیرانێ ئه‌و شیان هه‌نه‌ كو بشێت ڤاكسینێ كۆرۆنایێ بۆ وه‌لاتیێن خوه‌ دابین بكه‌ت.

ل ئالیێ دی به‌ری چه‌ند رۆژان ئێك ژ به‌رپرسێن وه‌زاره‌تا ساخله‌میا ئیرانێ بێی كو ناڤێ خوه‌ ئاشكرا بكه‌ت بۆ ده‌زگه‌هێن راگه‌هاندنێ دیار كر كو وان هه‌تا نها ئامارێن دروست یێ مرنا وه‌لاتیان ب كۆرۆنایێ بۆ رایا گشتی یا جیهانێ ئاشكرا نه‌كرینه‌، چونكو رێژه‌كا زۆر ژ خه‌لكی ب كۆرۆنایێ مرینه‌ و وه‌زاره‌تا ساخله‌میێ ژی گه‌له‌ك راستی ڤه‌شارتینه‌ و ئاشكرا نه‌كرینه‌.

ل گۆر ئامارێن كو ژ ئالیێ هنده‌ك ده‌زگه‌هێن راگه‌هاندنا ئیرانێ ڤه‌ هاتینه‌ به‌لاڤكرن دیار دبیت كو رۆژانه‌ نێزیكی هزار كه‌س ل ئیرانێ ژ به‌ر كۆرۆنایێ دمرن و رێژا مرن و تووشبوونا ب كۆرۆنایێ ل ئیرانێ هه‌ر د زێده‌بوونێ دایه‌ و به‌رپرسێن ئیرانێ ژی ل هه‌مبه‌ر ره‌وشا نها خه‌مسارن و چو بۆ خه‌لكی ناكه‌ن، هه‌روه‌سا ده‌رمان و پێدڤیاتێن دی ژی گه‌له‌ك گرانن و هه‌ر كه‌س نه‌شێت ده‌رمانان بكڕیت و وه‌لاتی ژ ره‌وشا نها بێزار بووینه‌.

کۆمێنتا تە