سه‌رۆكێ ژوورا بازرگانی یا ئامه‌دێ: كوردان دڤێت د رێڤه‌برنا توركیا دا پشكدار بن
ئه‌ڤرۆ:
سه‌رۆكێ ژوورا بازرگانی یا ئامه‌دێ راگه‌هاند كو ژ به‌ر قه‌یرانا ئابووری ره‌وشا ناڤخوه‌یی یا توركیا ژی گه‌له‌ك خرابه، پرسا كوردی ژی نه‌هاتیه چاره‌سه‌ركرن و چاڤه‌رێی گوهۆڕینێن مه‌زن ل توركیا دهێته كرن، بێگومان كوردان دڤێت د برێڤه‌برنا توركیا دا پشكدار بن.
محه‌مه‌د كایا سه‌رۆكێ ژوورا بازرگانی یا ئامه‌دێ راگه‌هاند كو په‌یوه‌ندیێن توركیا و هه‌رێما كوردستانێ د بیاڤێ بازرگانی دا باشن لێ چه‌ند سالن د بیاڤێ سیاسی دا هنده‌ك ئالۆزی هه‌نه و وێ یه‌كێ ژی كارتێكرنا خوه ل په‌یوه‌ندیێن ئابووری یێن د ناڤبه‌را هه‌ر دو ئالیان دا كریه، نها توركیا تووشی قه‌یرانه‌كا گه‌له‌ك مه‌زن یا ئابووری هاتیه و پتر ژ هه‌ر ده‌مه‌كێ توركیا پێدڤی ب هه‌رێما كوردستانێ یه، د ناڤ توركیا دا ژی گه‌له‌ك ئاریشه هه‌نه بێگومان پرسا كوردی پرسا سه‌ره‌كی یا توركیا یه و بێی چاره‌سه‌ركرنا پرسا كوردی پرسێن دی یێن توركیا ژی ناهێنه چاره‌سه‌ركرن، توركیا هه‌تا نها مفایه‌كا گه‌له‌ك باش ژ په‌یوه‌ندیێن خوه یێن ل گه‌ل هه‌رێما كوردستانێ دیتیه، ره‌نگه هنده‌ك ئالیێن شوفینی ل دژی باشبوونا په‌یوه‌ندیێن توركیا و هه‌رێما كوردستانێ بن.
ناڤهاتی ئه‌و یه‌ك ژی دیار كر كو بێی كوردان چو ده‌ستهه‌لاته‌ك ل توركیا نه‌شێت یا سه‌ركه‌فتی بیت، چه‌ندین سالن ئاكپارتیێ ب پشته‌ڤانیا كوردان شیا ل توركیا ببیته پارتیا ئێكێ، لێ د چه‌ند سالێن دووماهیێ دا ئاكپارتیێ گه‌له‌ك تشت ل دژی كوردان كرن و نها كوردان خوه ژ ئاكپارتیێ دوور كرینه، پارتیا كۆماریا گه‌ل ده‌مه‌كه بزاڤا هندێ دكه‌ت كو بشێت ده‌نگێن كوردان بۆ خوه كۆم بكه‌ت لێ هه‌تا نها ژی باوه‌ریا كوردان ب پارتیا كۆماریا گه‌ل ناهێت و گۆت: (ئێدی هه‌ده‌په ل توركیا هێزه‌كا گه‌له‌ك مه‌زنه، بۆ هه‌ر كه‌سه‌كێ ژی ئاشكرایه د هه‌لبژارتنێن بهێت دا رۆلێ هه‌ده‌پێ دێ گه‌له‌ك به‌رچاڤ بیت، ژ به‌ر هندێ ژی هه‌كه هه‌ده‌په بشێت ده‌نگێ هه‌موو كوردان بۆ خوه ببه‌ت دێ شێت كارتێكرنه‌كا گه‌له‌ك مه‌زن ل سیاسه‌تا توركیا بكه‌ت، چونكو ئێدی كوردان دڤێت د رێڤه‌برنا توركیا دا پشكدار بن، مخابن پارتیێن شوفینی ژی هه‌رده‌م هنده‌ك كارتان ل دژی كوردان بكار دئینن و ناخوازن كورد رۆله‌كێ به‌رچاڤ د سیاسه‌تا توركیا دا بگێرن).
محه‌مه‌د كایا ئه‌و یه‌ك ژی نه‌ڤه‌شارت كو ژ به‌ر قه‌یرانا ئابووری ئه‌ڤرۆكه ره‌وشا ژیانا وه‌لاتیان ل هه‌موو توركیا گه‌له‌ك خراب بوویه، رێژه‌یا هه‌ژاریێ و بێكاریێ گه‌له‌ك زێده بوویه، رێژه‌یه‌كا به‌رچاڤ ژ وه‌لاتیان نه‌شێن وه‌كو جاران پێدڤیاتێن سه‌ره‌كی یێن ژیانێ بۆ خوه دابین بكه‌ن، ژ به‌ر هندێ ژی بابه‌تێ قه‌یرانا ئابووری دێ كارتێكرنه‌كا گه‌له‌ك مه‌زن ل ئه‌نجامێ هه‌لبژارتنێن بهێت یێ توركیا كه‌ت، لێ مخابن نه پارتیا كۆماری و نه ژی پارتیێن دی یێن ئۆپۆزسیۆنێ هه‌تا نها چو پرۆژه‌یه‌ك بۆ چاره‌سه‌ركرنا قه‌یرانا ئابووری پێشكێش نه‌كرینه.
