سه‌رۆكێ گشتی یێCHP:ئه‌م دێ ل گه‌ل هه‌ده‌پێ پرسا كوردی ل په‌رله‌مانێ توركیا چاره‌سه‌ر كه‌ین
ب، سه‌رجان مه‌حمود:
كه‌مال كلچدار ئوغلۆ سه‌رۆكێ گشتی یێ پارتا كۆماریا گه‌ل (جه‌هه‌پێ) راگه‌هاند كو ل توركیا یه‌ك ژ پرسێن هه‌ری گرنگ پرسا كوردیه و ئه‌و دشێن ڤێ پرسێ ب رێیێن راست و ره‌وا چاره بكه‌ن و گۆت: (چل سالن پرسا كوردی ل توركیا هه‌یه و مخابن ده‌ستهه‌لاتێن سیاسی ل توركیا د ماوه‌یێ چل سالێن بۆری دا نه‌شیاینه پرسا كوردی دوور ژ شه‌ری چاره‌سه‌ر بكه‌ن، ئاسته‌نگیێن مه‌زن دروست بووینه و ژ به‌ر پرسا كوردی نها گه‌له‌ك پرسێن دی ژی ل توركیا هه‌نه و توركیا تووشی قه‌یرانه‌كا گه‌له‌ك مه‌زن بوویه).
ناڤهاتی سه‌باره‌ت ب چا‌وانیا چاره‌سه‌ر‌كرنا پرسا كوردی ژی راگه‌هاند كو ل توركیا په‌رله‌مان هه‌یه و بلندترین سازیا ده‌وله‌تێ و ملله‌تی یه و دڤێت هه‌موو پرسێن وه‌لاتی ل په‌رله‌مانی بهێنه چاره‌سه‌ر‌كرن و گۆت: (ئه‌ردۆغانێ سه‌رۆك كۆمارێ توركیا دو جاران ب ناڤێ ده‌وله‌تێ ل گه‌ل رێكخستنه‌كا نه قانوونی و ئیمرالیێ خوا‌ست پرسا كوردی چاره‌سه‌ر بكه‌ت لێ نه‌شیا ڤێ پرسێ چاره‌سه‌ر بكه‌ت ژ به‌ر كو نابیت ده‌وله‌ت ل گه‌ل ئالیێن نه ره‌وا ده‌ست ب دانوستاندنان بكه‌ت و د ئه‌نجام دا ژی هه‌ر دو پێنگاڤ نه‌گه‌هشتنه چو ئه‌نجامه‌كێ، هه‌كه ئه‌م وه‌كو پارتا كۆماری ل توركیا ببینه ده‌ستهه‌لات دێ ل گه‌ل هه‌ده‌پێ پرسا كوردی ل په‌رله‌مانی چاره‌سه‌ر كه‌ین، چونكو هه‌ده‌په ل په‌رله‌مانێ توركیا یه و پارته‌كا فه‌رمی و قانوونیه و ب ده‌نگێ خه‌لكی چوویه په‌رله‌مانی، ژ به‌ر هندێ ژی مه دڤێت وه‌كو پارتا كۆماریا گه‌ل ل گه‌ل هه‌ده‌پێ و ل په‌رله‌مانێ توركیا پرسا كوردی چاره‌سه‌ر كه‌ین).
پارتا كۆماریا گه‌ل پارتا پشتی ئاكپارتیێ پارتا دویێ یه ل توركیا و سه‌ركێشیا ئۆپۆزسیۆنێ دكه‌ت و ئه‌ڤساله وێ پارتیێ راپۆرته‌كا نوو بۆ چاره‌سه‌ر‌كرنا پرسا كوردی ئاماده كریه و د ڤێ چارچۆڤێ دا ل باژێرێن باكورێ كوردستانێ ل گه‌ل رێكخراو و سازیێن سڤیل كۆمبوونان دكه‌ت و دیسان بۆ جارا یه‌كێ شانده‌كا پارتا كۆماریا گه‌ل سه‌ره‌دانا هه‌رێما كوردستانێ كر و ل گه‌ل سه‌رۆكێ بارزانی، سه‌رۆكێ هه‌رێما كوردستانێ و به‌رپرسێن دی یێن هه‌رێمێ كۆمبوون و پارتێن سیاسی یێن باكورێ كوردستانێ ژی سه‌ره‌دانا شاندێ پارتا كۆماریا گه‌ل بۆ هه‌رێما كوردستانێ ب گرنگ ل قه‌له‌م دان و دیار كرن كو هه‌لوه‌ستێ پارتا كۆماریا گه‌ل گرنگه.
