سه‌رۆك بارزانی ده‌نگێ زه‌لالێ ده‌وله‌تبوونێ یه
شۆره‌ش حه‌زه‌كا ده‌مده‌می نینه و نه خواسته‌كا ڤارێبوویه و نه ده‌ستبه‌ردانا ژ كابانیا ماله‌كا برجوازیه ژی كو هه‌موو ئاره‌زوویا وێ گوهوَڕینا سه‌روبه‌رێ مالێ و ناڤمالیا وێ بیت، كو ب دفن بلندی ڤی ل گه‌ل هه‌ڤالێن خوه به‌حس بكه‌ت، به‌لكی دڤێت كوده‌تایه‌كا هشیاری و ژیرانه‌بیت.
ئه‌و شوَره‌ش نه چێله‌كا بشیر بیت بوَ بڕیارێن تاك ڕوه‌یی یێن نه د ده‌مێ خوه دا دهێنه دان، چنكو ئه‌نجامێ وێ دێ سه‌رنه‌كفتنه‌كا ب ته‌مامی بیت ب هه‌موو رامانێن سه‌رنه‌كه‌فتنێ، به‌راوه‌ردی وێ دگه‌ل شوَره‌شا رزگاری خازا مه‌زن دژی داگیركه‌رێن بیانی كو ژئالیێ كه‌مینه و پڕانیا خه‌لكی ڤه كو هه‌دارا نه‌خوه‌شی و ده‌رده‌سه‌ریێ نه‌مان و په‌قین ئه‌و به‌راوه‌ردی ناهێته كرن.
مه ل ڤێره نه‌ڤێت شوَره‌شان به‌راوه‌رد بكه‌ین، چنكو كوڕێن شوَره‌شان دزانن شوَره‌شگێری نه یارایا زاروَكایه، و بهایێ وێ دێ بگرانی راوه‌ستیت، و هنده‌ك كه‌س یێن ژبیردانكێن نه‌دیتنێ ده‌ركه‌فتین و به‌ر ب سه‌ركه‌فتنێ ڤه هاتین دبنه خودان مفایێن مه‌زن، بیێ كو پشكداریێ د راستیا وێ شوَره‌شێ دا بكه‌ن، یا كو سه‌رنجا من راكێشایی بوَ ڤی بابه‌تی ئه‌و گه‌نجن یێن به‌حسێ شوَره‌شێ و گوهوَڕینێ دكرن، هه‌روه‌كی یێن د ناڤ ستادیوَمه‌كا ته‌پا پێی دا دله‌یزن و بینه‌رێن پێشبڕكیه‌كێ نه، سه‌ركه‌فتن ژی یا مسوَگه‌ره ب هه‌موو پیڤه‌رێن ژیانێ یێن هه‌ژی و نه هه‌ژی گوَتنێ و دڤێت بهێنه بكارئینان، هه‌تا وی راده‌یی كو فروَكێن سه‌ربازێن فه‌زائیی ژی بهێنه سه‌ر خه‌ت و گه‌فان بكه‌ن، ب هزران چه‌كدارێن مه هه‌نه و مه كارتێن زوَر د ده‌ستان دا ماینه و مه و مه و مه. .. . هه‌تا، شاراندن و ئازراندن و تێكه‌لكرن و هه‌ڕفاندن و یا دروست ئه‌م بێژین تێكدان ب هه‌موو رامانێن خوه ڤه، هنده‌ك تشتێن دی یێن نهێنی و ڤه‌شارتی یێن مه‌ترسیدار ل پشت په‌ردا نه و ل پشت بوون.
كاره‌كێ مه‌زنه، شوَره‌ش وه‌كی مرن، و په‌یدابوون و مه‌ترسیدارتره چنكو چاره‌نڤیسێ ملله‌تی ل پشت دهێته به‌رجه‌سته‌كرن، ب باوه‌ریا من ئه‌و هه‌موو تێكدان ئه‌نجامێ تێگه‌هێ پاشكه‌فتی و ره‌فتارێن خوه قورتالكرنێ نینه، دروَشمێن گران گران و پڕی زه‌گل بوَ ب سه‌ردابرنا خه‌لكه‌كێ ساده و هه‌ژار ب ناڤێ گوهوَڕین و شوَره‌شێن هزر و سڤیل بنگه‌هێن وێرانكرنێ و دوژمنێن ناڤخوه‌یا ملله‌تی، پێ بوینه گوڕگێ بێ گونه‌هێ به‌رامبه‌ری خوینا یوسفی، و ل سه‌ر شاشێن كه‌نالان دقه‌بن، ئه‌ڤه ژی كاره‌ساته‌كا مه‌زنه بوَ هه‌لسه‌نگاندێ د ته‌رازیا پێزانین و دوڤچوونان دا و شوَره‌ش به‌روَڤاژی پێ دهێته خادن، هزرێن گه‌نی و بێ مفا دهێنه هه‌مبه‌ری شوَره‌شێن پاك و به‌رخودانێن زه‌لال كو ب هزران خه‌لكی خوین بوَ رێتیه و خوه كرینه قوَربان دژی ده‌ستهه‌لاتێن زوَرداریێ، و نه‌مانا وه‌ریسێ سێداره‌دانا د رێیا ئازادیێ دا، لێ ب مخابنی ڤه هنده‌ك كه‌س نها سفكاتیێ هه‌مبه‌ری وان هه‌موو شه‌هیدان و خوینا پیروَزا وانا دكه‌ن و رێزێ بتنێ ژ چركه‌كا ژده‌ستانا گیانێ پیروَزێ وان ژی ناكه‌ن، هه‌ناسه‌كا به‌رته‌نگ د ناڤ چه‌په‌لیا سیخوَریێ دا به‌ری هناڤ بهێنه په‌رتاندن و جه‌رگێن دایكان جاره‌كا دی بهێنه سوَتن، كوردینی بتنێ ئاخفتن و فروَتنا گوَتنه‌كێ نینه، و نه گه‌ڕه‌كا ئاڤا گه‌نیه ماسی تێدا نه‌هێنه خودان كرن، كوردینی ره‌سه‌ناتیا ده‌نگێ كه‌وه‌كێ روباده ل چیایێ مه‌تین و گاره‌یی ب قه‌بیت، و ب دله‌كی زیندی ئاوازا ئه‌ی ره‌قیب بوَ ده‌وله‌ت بوونا كوردان بكه‌ته د ناڤ جانتا كوردینی یێ دا و ده‌رگه‌هێ وه‌لاتان ب قوتیت و بێژیته ره‌قیبی: ئه‌ی ره‌قیب ئه‌ڤه ئه‌م هاتین و دێ ده‌رگه‌هێ ده‌وله‌ت بوونێ ڤه‌كه‌ین و ئالایێ كوردستانێ ل یۆنێ دێ هه‌ژینین و ئه‌ڤ ده‌نگێ ره‌سه‌ن و زه‌لال ده‌نگێ سه‌رۆكێ هه‌رێمێ یه ده‌نگێ مه‌سعود بارزانی یه.
