سه‌رۆك كۆمارێ ئیرانێ دێ سه‌ره‌دانا سنه و كرماشانێ كه‌ت
ئه‌ڤرۆ:
محه‌مه‌د ره‌شیدی ئه‌ندامێ په‌رله‌مانێ ئیرانێ راگه‌هاند كو د ده‌مه‌كێ نێزیك دا ئیبراهیم ره‌ئیسی سه‌رۆك كۆمارێ ئیرانێ دێ سه‌ره‌دانا پارێزگه‌هێن كرماشان و سنه كه‌ت و بریاره د سه‌ره‌دانا خوه دا بۆدجه‌كێ باش بۆ وان هه‌ر دو پارێزگه‌هان ته‌رخان بكه‌ت، چونكو وه‌كو نوونه‌رێن كورد یێن هه‌ر دو پارێزگه‌هێن كرماشان و سنه وان گه‌له‌ك گازنده ژ سه‌رۆك كۆماری هه‌بووینه و داخواز ژێ كرینه كو گرنگیێ بده‌ته پارێزگه‌هێن كوردی.
ل ئالیێ دی محسێن فه‌تحی په‌رله‌مانتارێ كورد ل په‌رله‌مانێ ئیرانێ ژی راگه‌هاند كو مخابن وه‌كو پێدڤی گرنگی ب پارێزگه‌هێن كوردی ناهێته دان و ژ به‌ر هندێ ژی وان به‌ری نها گه‌له‌ك گازنده ژ سه‌رۆك كۆماری كرینه و سه‌ره‌دانا ڤێجارێ یا سه‌رۆك كۆماری دێ یا گرنگ بیت.
