سه‌رۆك كۆمارێ توركیا: هه‌ده‌پێ قۆناغا ئاشتیێ ژناڤبر
ب، سه‌رجان مه‌حمود:
سه‌رۆك كۆمارێ توركیا ل باژێرێ ئامه‌دێ راگه‌هاند كو وان گه‌له‌ك كارێن مه‌زن بۆ كوردان ل توركیا كرینه كو ئێك ژ وان ژی قۆناغا ئاشتیێ بوو، لێ په‌كه‌كێ و هه‌ده‌پێ قۆناغا ئاشتیێ ژناڤبرن و ئه‌و بوونه به‌لا و نها ژی ل گه‌ل پارتا كۆماریا گه‌ل ل دژی ئاكپارتیێ كار دكه‌ن.
ره‌جه‌ب ته‌یب ئه‌ردۆغان ل باژێرێ ئامه‌دێ كۆمبوونه‌كا جه‌ماوه‌ری سازكر و راگه‌هاند كو ئه‌و چو ده‌مه‌كێ ناخوازیت دایك بگرین و تووره ببن و بۆ كو خوون نه‌هێته رێتن و ئالۆزی نه‌مینیت وان ده‌ست ب قۆناغا ئاشتیێ كرن و گۆت: (من باش دزانی ده‌ستپێكرنا قۆناغا ئاشتیێ بۆ مه مه‌ترسیێ دروست دكه‌ت لێ دیسان ژی بۆ كو رۆندكێن دایكان نه‌رژن و خوونا دهێته رێتن بهێته راوه‌ستاندن مه ده‌ست ب قۆناغا ئاشتیێ كر لێ هه‌ده‌پێ بهایێ ئاشتیێ نه‌زانی و ب فێل و پلانێن خوه یێن كرێت قۆناغا ئاشتیێ ژناڤبر و بوو ئه‌گه‌رێ كوشتنا ب سه‌دان كه‌سان و خوا‌ست دوباره ره‌وشا توركیا ب گشتی ئالۆز بكه‌ت، دڤێت هه‌ر كه‌س بزانیت یێ كو قۆناغا ئاشتیێ ژناڤبریه هه‌ده‌په یه).
سه‌رۆك كۆمارێ توركیا هه‌روه‌سا راگه‌هاند ژی كو هه‌ده‌په، په‌كه‌كه و یه‌په‌گه ئێكن و چو جوداهی د ناڤبه‌را وان دا نینه و ئه‌رك و كارێن وان ب تنێ كوشتن و تێكدانه و گۆت: (هه‌ده‌په زارۆیێن كوردان فرێ دكه‌ته چیا و زارۆیێن خوه ژی ره‌وانه‌ی ئورۆپا دكه‌ن و به‌حسێ ئازادیێ دكه‌ن و هه‌م ل توركیا و هه‌م ل سووریێ سه‌ده‌مێ تێكدان و كریارێن تیرۆرستی هه‌ده‌په، په‌كه‌كه و یه‌په‌گه نه و ئه‌و تیرۆرستن و چو ده‌مه‌كێ خزمه‌تا جڤاكێ كورد نه‌كرینه و یێن كو خزمه‌تا هه‌موو توركیا دكه‌ت ئه‌مین و د سه‌رده‌مێ ده‌ستهه‌لاتا مه دا ره‌وشا دیاربه‌كرێ و باژێرێن رۆژهه‌لات و باشورێ توركیا باش بوویه و ئه‌ز ئاشكرا دبێژم ده‌مێ مه دیت باژێرڤانیێن هه‌ده‌پێ پاره بۆ په‌كه‌كێ ره‌وانه دكه‌ن و وه‌ك چه‌كدارێن وان كار دكه‌ن مه ژی هه‌موو باژێرڤانی ژ ده‌ستێ وان ده‌رخست).
د پشكه‌كا دی یا ئاخڤتنا خوه دا ژی سه‌رۆك كۆمارێ توركیا راگه‌هاند كو هه‌ده‌په نها ل گه‌ل پارتا كۆماریا گه‌ل (جه‌هه‌پێ) پێكڤه كار دكه‌ن و هه‌ڤپه‌یمانیا ڤان هه‌ر دو پارتان ب ته‌مامی ل دژی گه‌لێ كورد و گه‌لێ توركه و گۆت: (حوكمه‌‌تا مه د دیرۆكا توركیا دا هه‌ری زێده خزمه‌تا كوردان كریه و ئه‌م د رژدین كوردان ل ژێر زۆرداریا هه‌ده‌پێ ده‌رخینین و نها هه‌ده‌په ل گه‌ل پارتا كۆماریا گه‌ل پێكڤه كار دكه‌ن و ده‌ردێ وان ب تنێ ئه‌ڤه كو وه‌لاتیێن كورد و هه‌موو جڤاكێ توركیا ژ هه‌ڤدو جودا بكه‌ن لێ ئه‌م ناهێلین ئه‌و بگه‌هنه مه‌ره‌مێن خوه یێن كرێت).
ل هه‌مبه‌ر ئاخڤتنا ئه‌ردۆغانی په‌روین بولدان هه‌ڤسه‌رۆكا هه‌ده‌پێ راگه‌هاند كو ئه‌ردۆغان ب چ روویه‌كێ سه‌ره‌دانا ئامه‌دێ دكه‌ت، ئه‌ردۆغان سه‌ده‌مێ سه‌ره‌كی یێ كوشتنا لاوێن تورك و كورده و گۆت: (ئه‌ردۆغان بۆ كو ده‌ستهه‌لاتا وی به‌رده‌وام بكه‌ت رۆژ ب رۆژێ هه‌موو توركیا دكه‌ته گۆلا خوونێ و ب فه‌رمانا ئه‌ردۆغانی قۆناغا ئاشتیێ هاته تێكدان و ب هزاران كه‌س ژ سیاسه‌تمه‌دار، ره‌وشه‌نبیر، سه‌ركرده‌ێن هه‌ده‌پێ هاتنه زیندانی كرن و توركیا د هه‌ر واری دا ژناڤ بریه و ب ئاشكرا دوژمناتیا گه‌لێ كورد و دیموكراسیخواز و ئالیێن ئۆپۆزسیۆنێ دكه‌ت و ب هه‌ڤپه‌یمانیا ل گه‌ل داعشێ به‌رده‌وام بزاڤان دكه‌ت ده‌ستكه‌فتێن كوردان ل سووریێ ژناڤ ببه‌ت، لێ نه‌شێت بگه‌هیته ڤێ ئارمانجا خوه یا كرێت و هه‌ر كه‌س باش دزانیت زولم و زۆرداریا د ده‌مێ ده‌ستهه‌لاتا ئه‌ردۆغانی دا هه‌ی د چو ده‌مه‌كێ د دیرۆكا توركیا دا نه‌هاتیه دیتن و بلا ئه‌ردۆغان دلنیا بیت ب د‌ره‌وێن خوه ئێدی نه‌شێت زارۆیان ژی ب خاپینیت).
