سه‌رۆك وه‌زیرێن ئیسرائیلێ ب توندی هۆشداری دا ئیرانێ
ئه‌ڤرۆ:
بنیامین نه‌تانیاهۆ سه‌رۆك وه‌زیرێن ئیسرائیلێ راگه‌هاند كو ئه‌و پشته‌ڤانیێ ل دانوستاندنێن د ناڤبه‌را ئه‌مریكا و ئیرانێ دا ل دۆر كاراكرنا رێككه‌فتنا ئه‌تۆمی ناكه‌ن و داخواز ژ ئه‌مریكا كر كو شاشیێن سه‌رده‌مێ باراك ئۆبامای دوباره نه‌كه‌ت و گۆت: (ئیرانێ دڤێت مفای ژ رێككه‌فتنا ئه‌تۆمی وه‌ربگریت و پێگه‌هێ خوه ل ده‌ڤه‌رێ ب هێز بكه‌ت بێگومان ئه‌و یه‌ك دێ بیته ئه‌گه‌رێ هندێ كو ئیران پتر ژ جاران ده‌ستێوه‌ردانێ د كاروبارێن وه‌لاتێن رۆژهه‌لاتا ناڤین دا بكه‌ت، ئه‌و یه‌ك ژی ب چو ره‌نگه‌كێ ناهێته قه‌بوول كرن).
سه‌رۆك وه‌زیرێن ئیسرائیلێ ئه‌و یه‌ك ژی دیار كر كو هه‌كه ئیرانێ بڤێت مفای ژ كاراكرنا رێككه‌فتنا ئه‌تۆمی وه‌ربگریت و مه‌ترسیێ بۆ به‌رژه‌وه‌ندیێن ئیسرائیلێ دروست بكه‌ت، مه ئه‌و شیان هه‌نه كو بشێین دربێن كوژه‌ك ل ئیرانێ بده‌ین، ئیسرائیل ل هه‌مبه‌ر زێده‌گاڤیێن ئیرانێ بێده‌نگ نابیت و گۆت: (داخواز ژ ئه‌مریكا دكه‌ین كو ل گه‌ل ئیرانێ ده‌ست ب دانوستاندنان نه‌كه‌ت، چونكو ژ به‌ر رێككه‌فتنا ئه‌تۆمی یا سالا ٢٠١٥ ئیرانێ شیا پێگه‌هێ خوه ب هێز بكه‌ت و پتر ده‌ستێوه‌ردانێ د كاروبارێن وه‌لاتێن رۆژهه‌لاتا ناڤین دا بكه‌ت و ره‌وشا ده‌ڤه‌رێ گه‌له‌ك ئالۆزتر لێ هات، ژ به‌ر هندێ ژی ئه‌م دبێژین كو دانوستاندن ل گه‌ل ئیرانێ چو ئه‌نجامێن خوه نابن و دڤێت ئه‌مریكا سزایێن ل سه‌ر ئیرانێ توند بكه‌ت).
