سه‌رۆك و راهێنه‌رێ یانا زاخۆ: ره‌فتارا برۆنۆیی دێ تووشی سزایێ كه‌ت
ئه‌ڤرۆ، عه‌لی حاجی:
د داخویانیه‌كێ دا بلند شه‌فیق سه‌رۆكێ یانا زاخۆ بۆ رۆژناما ئه‌ڤرۆ گۆت: ئه‌و ڕه‌فتارا پیشه‌كارێ تیما مه یا ته‌پا پێی یێ به‌رازیلی برۆنۆ ئۆلیڤێرایی هه‌مبه‌ری دو یاریزانێن جه‌ویه كری د یاریا شه‌ڤا ئه‌ینیا بوری دا ئه‌وا ب گۆله‌كێ تووشی خوساره‌تیێ بووین كو ل یاریگه‌ها شه‌عب ل باژێرێ به‌غدا ژ چارچووڤێ گه‌ڕا 34ێ یا خولا پلا نایابا ئیراقێ هاتیه كرن یا ئێكێ نینه به‌لكۆ بۆ جارا سێیێ یه و گۆمان بوو مه په‌یداكریه ژبه‌ركو ئه‌ڤ ره‌فتاره دووره ژ یاریزانه‌كێ پیشه‌كار و دووره ژ گیانێ وه‌رزشی و لسه‌ر وێ چه‌ندێ رازی نینین ژبلی پێنگاڤا راهێنه‌ری كارگێریا یانێ دێ كۆمبوونه‌كێ كه‌ت و پێرابوونێن دژوار و كارگێری هێنه وه‌رگرتن، ژبه‌ركو نابیت یاریزانه‌ك ب درێسێ یانا زاخۆ ڤی كاری بكه‌ت، دێ هنده‌ك سزا هه‌بن و دووركرنا وی ب زه‌حمه‌ته ژبه‌ركو یاریزانه‌كێ خودان شیانه.
ژلایێ خوه‌ڤه راهێنه‌رێ تیما زاخۆ یێ سۆری فیراس ئه‌لخه‌تیب ئه‌گه‌رێ خوساره‌تیا تیما خوه ل گه‌ل یانا جه‌ویه ب ستۆیێ پیشه‌كاری خوه یێ به‌رازیلی برۆنۆ ئۆلیڤێرایی گرت و گۆت: ئه‌و خه‌له‌تیا برۆنۆیی كری جهێ قه‌بوولكرنێ نینه و دووره ژ ره‌وشتێ وه‌رزشێ، ب مخابنی ڤه سه‌ره‌ده‌ریا وی ل گه‌ل روودانێن یاریێ كو بوو ئه‌گه‌رێ خوساره‌تیێ، سه‌رباری هنده‌ك یاریزانێن جه‌ویه سڤكاتی پێ دكر دوور ژ چاڤێن دادڤانێ یاریێ، دێ پێرابوونێن دژوار دژی یاریزان برۆنۆ ئۆلیڤێرایی هێنه كرن، هه‌رچه‌نده تیما مه گه‌له‌ك باشتر بوو و ئه‌م نێزیكی سه‌ركه‌فتنێ بووین لێ ره‌فتارا پیشه‌كارێ مه دڕبه‌ك ب تیمێ دا و پشتا تیمێ شكاند.
