سه‌رۆک ئه‌رکانێ لەشکرێ ئه‌مریکا سه‌ره‌دانا رۆژئاڤایێ کوردستانێ کر
ئەڤرۆ
مارک میلی سه‌رۆک ئه‌رکانێ لەشکرێ ئه‌مریکا رۆژا شه‌مبیێ 2023/3/4 ب سەرەدانەکا نەچاڤەرێکری گەهشتە رۆژئاڤایێ کوردستانێ، د چارچۆڤێ سه‌رەدانا خۆ دا مارک میلی سه‌ره‌دانا بنگه‌هێ سه‌ربازی یێ هێزێن ئه‌مریکا ل رۆژئاڤایێ کوردستانێ کر.
ل دیڤ راپۆرتەکا ئاژانسا یورۆ نیوز، سه‌رۆک ئه‌رکانێ لەشکرێ ئه‌مریکا ل گه‌ل سه‌ربازێن ئەمریکی یین، کو هەشت سالن د چارچۆڤێ شەڕێ ل دژی داعشێ دا ل رۆژئاڤایێ کوردستانێ نه، کۆمبوونه‌ک ساز کر و پشتی کۆمبوونێ ژی بۆ دەزگەهێن راگەهاندنێ ئاخڤی و گۆت: (هێزێن مه یێن سه‌ربازی و هێزێن سووریا دیموکرات یێن، کو کورد سه‌رکێشیا وان دکه‌ن، د ژناڤبرنا داعشێ دا کارەک گەلەک مەزن کرینە و ئەو یەک جهێ دەستخۆشیێ یە).
سەرۆک ئەرکانێ لەشکرێ ئەمریکا ئەو یەک ژی دیار کر شەڕێ وان ل هەمبەر داعشێ ب دووماهی نەهاتیە، ژ بەر هندێ ژی هێزێن وان دێ بۆ دەمەکێ درێژ ل سووریێ مینن، چونکی هەتا نها ژی مەترسی ل سەر ئەمریکا و هەڤپەیمانێن وێ ل باکورێ سووریێ و دەڤەرێن دی یێن وی وەلاتی هەنە.
