سه‌عید مسته‌فا: بلان تیڤی به‌ری هه‌ر كه‌ناله‌كی ده‌رگه‌هێ دراما خومالی یا كوردی ڤه‌كر
هه‌رهین محه‌مه‌د:
زارڤه‌كه‌ر و ده‌رهێنه‌ر سه‌عید مسته‌فا د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: كه‌نالێ بلان تیڤی شیا ب پشته‌ڤانیا بلان بازار و خه‌لكی دراما خومالی چێكه‌ت و وی ده‌رگه‌هی ڤه‌كه‌ته ڤه و ل ده‌ستپێكێ ژی ئه‌كته‌رێن خودان شیان یێن كۆما وژدان كو ئه‌و پازده سال بوو ژكارێن هونه‌ری دووركه‌فتین و چو كار ئه‌نجام نه‌داین، به‌لێ بلان تیڤی جاره‌كا دی ئه‌ڤ ئه‌كته‌ره كۆم ڤه كرنه ڤه و به‌رنامه و دراما خودیك دروستكر بۆ ده‌مێ شه‌ش هه‌یڤان و ڤێ درامایێ گه‌له‌ك بینه‌رێ خوه هه‌بوو و ئه‌و ئارمانجا بلان تیڤی هه‌ی و كار بۆ كری و ب ده‌ست خوه ڤه ئینا و كو ب هه‌موو سیماێن خوه ڤه كه‌ناله‌كێ كوردی بیت ژیانا كورد و كوردستانێ تێدا دیار بكه‌ت.
ناڤهاتی گۆت ژی: گرتنا كه‌نالێ بلان دێ كارتێكرنا خوه هه‌بیت ل سه‌ر دراما كوردی یا خومالی، چونكو هه‌ر بلان تیڤی بوویه كو به‌ری هه‌ر كه‌ناله‌كێ دی ده‌رگه‌هێ دراما خومالی یا كوردی ڤه‌كری و ل سالێن نوتان ژی دراما كوردی دهاته چێكرن رێز بۆ هه‌ر لایه‌نه‌كی یێ ده‌ستپێكی دراما كوردی چێكری، به‌لێ دڤان سالان دا ئه‌ڤ ده‌رگه‌هه ب ته‌مامی هاتبوو گرتن و چ هاریكاری بۆ چێكرنا دراما كوردی نه‌بوو، به‌لێ بلان تیڤی رابوو ب چێكرنا دراما خودیك و ئه‌ڤ ده‌رگه‌هه ڤه‌كر.
سه‌عیدی ئه‌و چه‌نده ژی گۆت: دشێم خوه د هه‌ر دو رولان دا بینم چ كومێدی بیت، یان تراژیدی بیت، به‌لێ گه‌له‌ك حه‌ز ژوان رولان دكه‌م یێن كێشه‌یان چاره بكه‌م و كارێن باش بكه‌م و كه‌سانان پێك بینم و نه‌یێ به‌لبه‌لێ و تێدانێ بم و هه‌ڤالێن من من دوان رولان دا دبینن و خه‌لكی دیده‌ڤانه دشێم رولێن تراژیدی و كومێدی ب گێرم و من خوه ئاڤا كری د هه‌ر روله‌كی دا، نه‌كو دچارچوڤه‌كێ ده‌سنیشانكری دا.
ل دووماهیێ ناڤبری گۆت: نوكه هه‌ر كه‌سه‌ك مژوولی ب رێڤه‌برنا ژیانا خوه یا رۆژانه یه و هنده‌ك ئه‌ندامێن كومێ نوكه یێ كاره‌كی دكه‌ن پێكڤه دكه‌ن و هه‌ر بۆ كه‌نالێ وار تیڤی یه، به‌لێ من ژی به‌رنامه‌ك هه‌یه جاره‌كا دی كاربكه‌م و هه‌موو ئه‌ندامێن كومێ خرڤه‌كه‌مه‌ڤه جاره‌كا دی ده‌ست ب چێكرنا زارڤه‌كرنا بكه‌ینه ڤه و دراما و گه‌له‌ك جاران من كارێ ئه‌كته‌ری و ده‌رهێنان و وێنه‌گری ژی ل گه‌ل ئێك كرینه و ئه‌ڤه حه‌زا منه و خوه گه‌له‌ك زه‌حمه‌ت ده‌م دا كو ده‌رحه‌ق ده‌ركه‌ڤم و ده‌رهێنه‌ریێ دا كێم جارا من رولێ سه‌ری دایه خوه هه‌كه ده‌ق و سیناریو بخازیت و ئه‌و روله ل گه‌ل كه‌سایه‌تیا من ب گونجیت و گه‌له‌ك جاران هه‌ڤالان رول بۆ من ده‌ستنیشانكر وان گۆت ئه‌ڤ روله ل گه‌ل كه‌سایه‌تیا ته دگونجیت و ل دووڤ شیانێن خوه من بزاڤ كریه خزمه‌تا دراما خومالی یا كوردی بكه‌م د هه‌ر واره‌كی دا بیت.
