سه‌فه‌ر جه‌عفه‌ر: رێڤه‌به‌ریا وه‌رزشی ب سه‌ركه‌فتیانه هه‌لبژارتن ب دووماهی ئینان
ئه‌ڤرۆ،
د داخویانیه‌كێدا سه‌رۆكێ لژنا هه‌لبژارتنێن یانێن وه‌رزشی ل پارێزگه‌ها دهۆكێ بۆ رۆژناما ئه‌ڤرۆ دیاركر كو رێڤه‌به‌ریا وه‌رزشی ل پارێزگه‌هێ شیا هه‌لبژارتنێن یانێن وه‌رزشی ب سه‌ركه‌فتیانه ب دووماهی بینت بیێ هه‌بوونا چو ئاریشا و سكالایان.
زێده‌تر سه‌فه‌ر جه‌عفه‌ر گوت: پشتی بۆ ماوێ دو حه‌فتیان 12 یانێن وه‌رزشی ل سنورێ پارێزگه‌ها دهۆكێ هه‌لبژارتنێن خوه یێن ده‌ستنیشانكرنا ده‌سته‌كا نوو یا كارگێریێ ئه‌نجامداین، ب سوپاسی ڤه باشترین شێوه و بیێ چو ئاریشه و ب دیموكراتی برێڤه‌چوون ئه‌ڤچه‌نده ژی ب هه‌ماهنگی و هه‌ڤكاریا یانێن وه‌رزشی بوو و هه‌روه‌سان لدووڤ رێنومایێن ژلایێ رێڤه‌به‌ریا گشتی یا وه‌رزشی ل هه‌رێما كوردستانێ ڤه هاتینه ده‌ركرن و هه‌موو پشكدار د هه‌لبژارتنان دا پێگیری دكر.
ژلایه‌كێ دووڤه ناڤهاتی رولێ هه‌ردو رێڤه‌به‌رێن وه‌رزشی یا گشتی ل هه‌رێما كوردستانێ و یا پارێزگه‌ها دهۆكێ ب بلند دانا و گۆت: هه‌ر ژ به‌ری ده‌ستپێكرنا هه‌لبژارتنا ته‌كه‌ز ل سه‌ر چه‌سپاندنا یاسایێ و رێنمایا دهاته‌كرن و هه‌ر تشته‌كێ پێدڤی بۆ سه‌ركه‌فتنا هه‌لبژارتنان هاته‌كرن هه‌روه‌سان یانێن وه‌رزشی ژی هه‌موو ل گه‌ل مه هاریكار بوون.
دووماهیێ سه‌فه‌ر جه‌عفه‌ر ب ناڤێ رێڤه‌به‌ریا وه‌رزشی ل پارێزگه‌ها دهۆكێ پیروزباهیا هه‌موو یانێن وه‌رزشی ل سنورێ پارێزگه‌هێ كر و هیڤی خواست چار سالێن بهێت بشێن خزمه‌تا وه‌رزشا پارێزگه‌هێ گشتی و یا یانێن خوه تایبه‌تی ب كه‌ن.
بۆ زانین ئه‌و یانێن هه‌لبژارتنێن خوه ئه‌نجامداین ئه‌وژی، دهۆك، سێمێل، گاره، ئاكرێ، ته‌ناهی، ئافره‌تێن دهۆكێ، شێخان، سه‌نحاریب، پۆلیته‌كنیك، میدیا، به‌رده‌ره‌ش و فروكه‌ڤانی.
