سه‌لام عه‌لی: تازه‌پێگه‌هشتیێن زاخۆ ده‌ستپێكه‌كا نوو بۆ تایكۆاندویێ دروستكر
ئه‌ڤرۆ،
د داخویانیه‌كێدا راهێنه‌رێ تیما تایكۆاندویا یانا زاخۆ په‌سنا یاریزانێن خوه یێن تازه‌پێگه‌هشتی كرن ئه‌وێن باشترین ئاست د قاره‌مانیا ئیراقێ دا نیشان دایی ل باژێرێ به‌غدا و ئه‌ڤچه‌نده ب ده‌لیڤه‌كا باش زان كو دی هێزا خوه ڤه‌گه‌ڕینن و ده‌ستپێكه‌كا نوو دروستكه‌ن.
زێده‌تر سه‌لام عه‌لی بۆ رۆژناما ئه‌ڤرۆ گوت: بۆ جارا ئێكێ یه تیما تازه‌پێگه‌هشتیێن زاخۆ وه‌كو نوونه‌را پارێزگه‌ها دهۆكێ پشكداری قاره‌مانیا ئیراقێ بن ئه‌وا زێده‌تری 400 یاریزانا ژ 50 یانێن كوردستانێ و ئیراقێ ل باژێرێ به‌غدا پشكداربووین و ئه‌نجامێن وان د باش بوون تایبه‌ت یاریزان هارون عه‌بدوللا ئه‌وێ سه‌ر ئاستێ تاك بۆ كێشا 45كگم كو بوویه قاره‌مانێ ئیراقێ هه‌كه شێوازێ نوو یێ قاره‌مانیێ نه‌با مه شیانێن ناسناڤێ گشتی ژی هه‌بوون.
ناڤهاتی ئه‌وچه‌نده ژی دیاركر ده‌ستپێكێ ئارمانجا وی ب ده‌ستڤه‌ئینانا قاره‌مانیێ بوو ل سه‌ر ئاستێ تازه‌پێگه‌هشتیان لێ نه پشكداریا چه‌ند یاریزانان ژبه‌ر نه‌رازیبوونا خێزانێن وان گه‌شتا به‌غدا بكه‌ن و هه‌روه‌سان دانانا ئامێرێ پاراستنا له‌شێ یاریزانی ژلایێ ئێكه‌تیا ئیراقێ وه‌كو سیسته‌مێ نوو كو ئه‌ڤه مه ب كار نه ئینان بوو د ده‌مێ راهێنانان دا، ئه‌ڤ هه‌ردو ئه‌گه‌ره بوونه ئاسته‌نگ ئارمانجا خوه ژ ده‌ستبده‌ین لێ هه‌رچه‌وا بیت ژ ئاستێ یاریزانێن خوه رازیمه كو شیاین هێزا زاخۆ ڤه‌گه‌ڕینین و ده‌ستپێكه‌كا نوو بۆ تایكۆاندویا زاخۆ دروستبكه‌ن ژبه‌ركو هه‌موو د ژیێن بچووك دانه مه‌زنێ وان 13 سالی یه ئانكۆ مه بنیاته‌كێ باش هه‌یه و دێ كار ل سه‌ر كه‌ین ب باشترین شێوه بهێنه به‌رهه‌ڤكرن سه‌رباری مه یاریزانێن لاوان و پێشكه‌فتیان ژی هه‌نه خودان شیانن.
ژلایه‌كێ دیڤه سه‌لام عه‌لی ئه‌وچه‌نده ژی دیاركر كو دێ ده‌ست ب به‌رهه‌ڤیان كه‌ن بۆ قاره‌مانیا ڤه‌گه‌ری یا نێڤده‌وله‌تی سه‌ر ئاستێ تازه‌پێگه‌هشتیان ئه‌وا دێ ل ده‌ستپێكا هه‌یڤا شووباتا سالا بهێت ل وه‌لاتێ توركیا هێته ئه‌نجامدان و گه‌شبینه تیمه‌كا بهێز به‌رهه‌ڤ بكه‌ت و گۆت: سۆپاسیا كارگێریا یانا زاخۆ دكه‌ین كو ل گه‌ل مه هاریكارن و پشته‌ڤانیێ دكه‌ن ژلایێ مادی و مه‌عنه‌وی ڤه ئه‌ڤچه‌نده ژی خالا گرنگ یا سه‌ركه‌فتێ و پێشكه‌فتنێ یه.
