سه‌لمان شێخ مه‌می: نه هه‌رسترانبێژه‌كێ هه‌لبه‌ستا من گۆت دێ پێشكه‌ڤیت
ئه‌ڤرۆ هه‌رهین محه‌مه‌د:
هه‌لبه‌ستڤان سه‌لمان شێخ مه‌می دیداركێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: نوكه مژوولی هنده‌ك هه‌لبه‌ستا مه بۆ سترانبێژا رۆژئاڤایێ كوردستانێ نارین فه‌قی و ده‌نگه‌كێ خوه‌ش هه‌یه و دیسان من هه‌لبه‌سته‌ك دایه دلو دوغان سترانبێژێ رۆژئاڤایێ كوردستانێ، و هه‌روه‌سا ئه‌لبووما نوو یا هونه‌رمه‌ند بلند ئیبراهیم هه‌كه هاته بلاڤه‌كرن دو سترانێن وێ ئه‌لبوومێ ژ هه‌لبه‌ستێن وی نه.
ناڤبری گۆت: هه‌رسترانبێژه‌كێ داخازێ ژمن بكه‌ت بۆ هه‌لبه‌ستێ ئه‌ز ره‌ت ناكه‌م و من چو ره‌ت نه‌كرینه ژی و هندی ئه‌ز یێ ساخ بم دێ هه‌ر هه‌لبه‌ستا ده‌مه هونه‌رمه‌ند بلند ئیبراهیم و هه‌ڤال ئیبراهیم، چونكو من ل گه‌ل وان كاركریه و پتریا وان هه‌لبه‌ستێن من داینه سترانبێژان پتریا وان ده‌رحه‌قێ هه‌لبه‌ستێ ده‌ركه‌تینه و هنده‌ك ژی نه سترانبێژ بخوه سترانبێژه و نه‌شێم كه‌سێ بكه‌م سترانبێژ و نه هه‌رسترانبێژه‌كێ هه‌لبه‌ستا من گۆت دێ پێشكه‌ڤیت،چونكو هه‌كه سترانبێژ یێ زیره‌ك بیت و هونه‌رمه‌ند بیت باوه‌ردكه‌م هه‌رهه‌لبه‌سته‌كا بێژیت دێ یێ پێشكه‌فتی بیت و یا پێدڤیه هنده‌ك خاسله‌ت ل ده‌ڤ هونه‌رمه‌ندی هه‌بن و ساخله‌تا هه‌ره‌باش دڤێت هونه‌رمه‌ند یێ ره‌و شه‌نبیر بیت و ئامیرێن مۆزیكێ ژی ب زانیت و هه‌كه ئامیره‌كێ مۆزیكێ ژی نه‌زانیت گوهێ مۆزیكێ هه‌بیت ل وی ده‌می دێ بیته سترانبێژه‌كێ ئاڤاكه‌ر یێ دروست و ئو سترانبێژ نك من سترانبێژه یێ سترانێ بۆ پێنجی ملیون كه‌سان سترانێ بێژیت نه‌كو ل هولا ده‌واتا سترانا بێژیت، یان بۆ رۆینشتنه‌كێ و ده‌مێ سترانبێژ سترانێ دبێژیت دڤێت هزرا ملله‌تێ خوه بكه‌ت و په‌یامه‌كێ ب گه‌هینت
شێخ مه‌می ئه‌و چه‌نده ژی گۆت: هه‌ر هه‌لبه‌سته‌كا ئه‌زچێدكه‌م باوه‌رناكه‌م ژپێنچ خوله‌كان زێده‌تر مابمه پێڤه و هه‌ر هه‌لبه‌سته‌كا دنڤیسم ب دووماهی دئینم و نه‌كو هه‌ر پارچه‌كێ ل ده‌مه‌كی دنڤیسم، به‌لێ هوزانا ئازاد گه‌له‌ك دمینمه پێڤه و گه‌له‌ك جاران به‌نده‌كا كاغه‌زان من مه‌زاختیه هه‌تا كو شیایم هه‌لبه‌سته‌كێ بنڤیسم و جودایه ژ هه‌لبه‌ستا دبیته ستران و هه‌لبه‌ستا ئازاد به‌رفره‌هتره و چیرۆكێن وێ پتر دهێته گۆتن.
ل دووماهیێ گۆت: من هه‌موو جورێن هه‌لبه‌ستان نڤیسینه و بووینه ستران و پتریا هه‌لبه‌ستان من ل سه‌ر ئه‌ڤینیێ چێكرینه، چونكو نامریت، به‌ه‌لێ سترانێن شوره‌ش جگێری ناڤ و ده‌نگه‌كێ مه‌زن دئینن ، به‌لێ ژیێ وان یێ كورته.
