سه‌مفونیه‌كا بێ سیتافك
دیاری یه بۆ ه‌ه‌ڤالێ شه‌لوالێ وی مایه ب تێلێن دیوارێ به‌لاروسیا ڤه
عه‌لی به‌ندی
هێ هێ دلۆ دێ كیڤه چی
سمبێل بۆقۆ
تو دێ چ كه ی،
ته چ ل به‌ره
چ وه‌غه‌ره
تو دێ چی یێ.. بۆ كیش واری
دێ وه‌غه‌ركه ی
ڤان ده‌ڤبه‌شا
ڤان سه‌ركوتكا بۆ كێ هێلی
ئه و چ به‌هه‌شته دێ چی یێ
خوه د ناڤ قوتی،
ڤان چڤینا تو دبێژی كێ
نا بێژیه من
ڤان جه‌مبازیا تو ل كێ دكه‌ی
چ گه ها حیز و بێ ئیفله‌حه
چ سیبه‌ره ته خودای به‌ر
ڤێ قه‌وانا به‌روڤاژی
ڤێ سه‌مفونیێ
بۆ كیش خه‌مێ تو دێ لێده‌ی
هه‌می هیڤی ل ده‌ف ته دخرشن
ژ خوه ب گۆمانی
هه‌می ده‌ما مرۆڤه‌كێ
شه‌رۆكه‌یی و نه گوهدێری،
ل خوه بزڤره، هاش خوه هه‌به
ئه‌و رێكا دچی یێ سه‌ربرگه‌ه
مان و نه مانه
شیرێ شێرا د مه‌شكا شێرا
ژ ته ناهێت
بوزێ ره‌وان ل حه‌فت به‌حرانێ
ل پشت چیایێ قاف
یێ شه‌مبوزه، چ ژێ دبێژن
هێش وێڤه‌یه
ئێلچیێن د رێ دا
دبێ سیتاڤكن
ڤه‌جنقیكن
دان و دندان د ناڤبه‌را
به‌لاروسیا و پوله‌ندا
ب تلسما د گرێداینه
دبه خرینه
دێ هنگێڤی ل ته تشقلن
ته كه‌ن برمیت و هلكێشن
تو ناگه‌هیه ده‌همه‌ن پیسا
د خه‌ونێن ته دا دبیته مێڤان
خوه ب شه‌لینی،
لێبنێره ستێرێ درژن
سه‌یێ دره‌ون
ئه‌و دێهلا هه یا ل بایه
گورگێن هه‌نێ هه‌ڤالبه‌ندن
تایتانیك چ ب سه‌رهات
ب چ سه‌رچوو
سه یدایێ دوازده علم
ل سه ر مینبه‌رێ
د میحرابێ دا ده‌نگێ
وی كه‌فت
سیسه‌بانێ بۆ كێ دبێژیت
دایكا ته چاڤێن كلداین
شالا حه‌جێ
ل سه‌ر به‌ژنا خوه كریه كه‌مه‌ر
ژمێژه‌یه د به‌ر خوه را دچیت
یا ب تشته، یا گرانه
یا ئاڤسه
یێ دبێژن ها نێزیكه
دێ به‌رهاڤێت
چار خاتوون د لاندكه‌كێ دا
كه‌زیا شه دكه‌ن
ئه‌وی كولێ ژ ئاڤرمووشێ
گول گولی، ژ چار ره‌نگا
هاتیه رستن، دێ برسقیت
دێ بیت زه‌مانێ محه‌مه‌د مه‌هدی
گورگ و بزن پێكڤه چه‌رن،
ئه ڤجا وه‌ره
ل وارێ خوه ببه سۆرگول
ببه كه‌نی
ببه بلبل، به ئه‌زبه‌نی
ببه كلیل بۆ قه‌ید و
زنجیرێن خوینه‌لۆ
ئه‌ڤ ئێتیمێن
باب لێ به‌رزه
ل هیڤیا یێن وه‌كی ته نه
مزگینیێ بده ڤان
ده‌ڤبه‌شا
شیرێ بادێ ڤێرا بگه‌هه
ئه‌م د هه‌وجه‌ینه..
