سه‌مپۆزیۆما كوردایه‌تیێ یا ناڤنه‌ته‌وه‌یی ل زانكۆیا وانێ هاته برێڤه‌برن
ئه‌ڤرۆ، وانێ:
ل رۆژێن 28-30 گولانا 2022ێ، ل زانكۆیا وانێ سه‌مپۆزیۆما هۆزانڤانێ كورد (فه‌قیێ ته‌یران) ب پشكدارییا كۆمه‌كا نڤیسكارێن كورد ژ باژێرێن باكور و رۆژهه‌لات و باشۆرێ كوردستانێ هاته گێڕان، تێدا هژماره‌كا سمیناران ب شێوه‌یه‌كێ كورت هاتنه پێشكێشكرن.
ل رۆژا 28ی گولانێ، ب به‌رهه‌ڤبوونا هژماره‌كا به‌رپه‌رسێن شاره‌دارییا وانێ و ئه‌ندام په‌رله‌مانێ توركیا و سه‌رۆكێ زانكۆیێ و خانم گولشه‌ن ناجی به‌گ، ئه‌نداما به‌رێ یا په‌رله‌مانێ توركیا و نوكه ڕاوێژكارا سه‌رۆكێ توركیا، كو هه‌ر ئێك ژ وان په‌یڤه‌ك خواند و د په‌یڤێن خۆ دا به‌حسێ گرنگیا ئه‌ڤان چالاكیان و هۆزانڤان فه‌قیێ ته‌یران كرن. هه‌ژی گۆتنێ یه بۆ برێڤه‌چوونا كۆنفرانسی، هنده‌ك لیژنه هاتبوونه دانان بۆ رێكخستنێ، وه‌ك؛ (لیژنا شه‌ره‌فێ، لیژنا لدارخستنی، لیژنا زانست و شێورێ). پاشی روونشتنا ئێكێ ده‌ست پێ كر و تێدا چار سمینار هاتنه پێشكێشكرن.
به‌رنامه‌یێ رۆژا ئێكێ، ده‌ست پێ كر ب ئاخفتنا پرۆتۆكۆلێ كۆنفرانسی، هه‌روه‌سا مێهڤانێ شه‌ره‌فێ (محه‌مه‌د خالد یاڵچن/ سادینی) و كورتییه‌ك ژ ژیانا وی هاته خواندن و بۆ كارێ وی و چاپكرنا دیوانا فه‌قیێ ته‌یران و هاریكارییا وی بۆ زانكۆیا وانێ ژ بۆ رێكخستنا كۆنفرانسی هاته خه‌لاتكرن و ده‌لیڤه دایێ چه‌نده‌كێ ل سه‌ر خه‌بات و بزاڤا كارێ خۆ یا ئه‌ده‌بی باخڤیت.
پشتی بێهنڤه‌دانه‌كێ، روونشتنان ده‌ست پێ كر، ل رۆژا ئێكێ ب پێنج په‌نه‌لا ده‌ست پێ كر و تێدا بیست سمینار هاتنه پێشكێشكرن، هه‌روه‌سا ل رۆژا 29ی گولانێ، ب شه‌ش په‌نه‌لا ده‌ست پێ كر و تێدا پتر ژ بیست و پێنج سمیناران هاتنه خواندن، د ئه‌ڤان سمیناران دا ل دۆر به‌رهه‌مێ فه‌قیێ ته‌یران دانوستاندن دكرن، ڤه‌كۆلینێن تێر و ته‌سه‌ل ل دۆر به‌یتا شێخی سه‌نعان و كه‌لا دمدم و ئه‌ی ئاڤ و ئاڤ هاتنه خواندن، هه‌روه‌سا به‌یتا شێخ سه‌نعان و به‌رسیسی عابد هه‌لبه‌ستێن دیتر ژ دیوانێ كه‌فتنه به‌ر ڤه‌كۆلینان، هنده‌ك ڤه‌كۆله‌ر ل وێ باوه‌رێ بوون كو به‌یتا د‌مدمی نه ژ ڤه‌هاندنا هۆزانڤانی یه، ب به‌هانه‌یا كو ناڤێ هۆزانڤانه‌كێ دی ل دووماهییا به‌یتێ هه‌یه.
هه‌ژی گۆتنێ یه كو دیوانا فه‌قیێ ته‌یران هه‌تا نوكه ل باكور نێزیكی یازده جاران هاتییه چاپكرن و چاپه‌كا نویتر چاڤه‌ڕێی چاپكرنێ یه. چاپا ده‌هێ ل سه‌ر مێهڤانا هاته به‌لاڤكرن كو ل وێرێ ب پیتێن لاتینی دهێته وه‌شاندن.
د ناڤ موفكێن په‌نه‌لا دا، خانم گولشه‌نێ ب ده‌نگێ خۆ یێ نازك، هه‌لبه‌سته‌كا مه‌لایێ جزیری و ئێكا فه‌قیێ ته‌یران ب سه‌لیقه خواندن، هه‌روه‌سا ل رۆژا دووماهیێ مه‌لا سالحێ دهی، ئه‌وی ژی هۆزانه‌ك ب فه‌قی خواند.
ژ نڤیسكارێن ژ باشوورێ كوردستانێ پشكداری تێدا كری، نێزیكی سێزده كه‌سان بابه‌ت پێشكێش كرن، ئه‌وژی (محه‌مه‌د عه‌لی قه‌ره‌داغی، ته‌حسین دۆسكی، ئیسماعیل بادی، شیمال خه‌مۆ، د. هێمن عومه‌ر خۆشناو، پ. د. زرار صدیق توفیق، د. دره‌خشان، دوو گه‌ڵاوێژ، رزگار جه‌باری، پ. د. یادگار ره‌سوول حه‌مه‌ده‌مین، ژێگر نه‌جیب عه‌بدولره‌زاق، جه‌میل شێلازی و هێرش كه‌مال رێكانی). هه‌روه‌سا سه‌یدا مصدق تۆڤی و حه‌جی جه‌عفه‌ر وه‌كو مێهڤان تێدا پشكدار بوون، كو پترییا وان ژ باژێرێ دهۆكێ بوون.
ل رۆژا 30 گولانێ، مێهڤانێن كۆنفرانسی به‌ره‌ف وارگه‌هێ فه‌قیێ ته‌یران ب رێكه‌فتن و ل موكسێ ژ لایێ قایمقام و سه‌رۆكێ شاره‌داریێ و نه‌جیب به‌گێ ڤه، پێشوازی ل مێهڤانان كر و ل هۆله‌كا به‌رفره‌هـ چه‌ند په‌یڤ هاتنه خواندن و سه‌یدا ته‌حسین دۆسكی ژی هه‌لبه‌سته‌ك ب گولشه‌نا فه‌قیێ ته‌یران خواند.
د ڤان هه‌می سمیناران دا، ل موكسێ ژبلی هۆزانا دۆسكی، یێن دی هه‌می ب زمانێ توركی بوون، ل وانێ ژی دو – سێیه‌ك ب زمانێ توركی هاتنه پێشكێشكرن. پشتی فراڤین خوارنێ به‌ره‌ف مه‌زارێ فه‌قی ل گوندی وه‌ره‌زۆرێ ب رێكه‌فتن و سه‌ره‌ك ل خانی و مزگه‌فتا وی ژی دان كو وه‌كو هێمایه‌ك بۆ هاتینه چێكرن. پاشی به‌ره‌ف سه‌ره‌كانیا روبارێ مه‌زن چوون ئه‌وێ هۆزانڤانی هۆزانا ئه‌ی ئاڤ و ئاڤ لێ ڤه‌هاندی. پشتی ئه‌ڤ مه‌راسمه ب دووماهی هاتین، ڤه‌گه‌ڕیانه باژێرێ وانێ ڤه و سه‌مپۆزیۆم ب دووماهی هات.
هه‌روه‌سا د بێهنڤه‌دانێن شه‌ڤێ دا، ب ده‌نگێ سترانبێژ ئیسماعیل مه‌رگه‌هی و مه‌سعود نێروه‌یی شه‌ڤبێری ب ره‌وشتر لێهاتن. دیسان لبه‌ره ئه‌ڤ مژارێن هاتینه پێشكێشكرن، ب درێژاهی، هه‌می د كتێبه‌كێ دا بهێنه چاپكرن.
