سه‌میان فه‌تحی:جڤاك ل شاشیا زه‌لامان دبورن به‌لێ یا ئافره‌تێ نه
ئه‌ڤرۆ، نه‌وزاد هلۆری:
بێگومان هه‌ر جڤاكه‌كێ داب و نه‌ریتێن تایبه‌ت ب خوه‌ڤه هه‌نه، هنده‌ك ژ وان د ئه‌رێنی نه و هنده‌ك ژی نه‌رێنی، به‌رپرسه‌كا ئافره‌تان ژی دده‌ته دیاركرن كو ده‌مێ دروستبونا شاشیان پتریا جاران خێزان و جڤاك ل ئافره‌تێ نا بورن و هه‌تا ب چاڤه‌كێ كێم ژی سه‌ح دكه‌نێ.
سه‌میان فه‌تحی، به‌رپرسا ئه‌نجۆمه‌نێ ئافره‌تێن گرده‌سین دیار كر كو شاشی هه‌ر شاشیه، چو زه‌لام بكه‌ت چ ئافره‌ت و گۆت: (جهێ داخێ یه د جڤاكێ مه دا ده‌مێ زه‌لام د كه‌ڤیته د شاشیه‌كێ دا هه‌موو كه‌س لێ دبورن و شاشیا وی نائینه به‌رچاڤێن خوه، ژبلی ڤێ یه‌كێ خێزان و مال و هه‌ڤال و هه‌تا جڤاك بخوه ژی پشته‌ڤانیا وی دكه‌ن و شاشیا وی ڤه‌دشێرن هه‌تا هه‌كه چه‌ند مه‌زن و كارتێكه‌ر بیت، به‌لێ ده‌مێ ئافره‌ته‌ك شاشیه‌كێ بكه‌ت هه‌تا هه‌كه چه‌ند یا بچووك بیت، هه‌موو كه‌س ب تایبه‌تی خێزان و مال و هه‌ڤال و جڤاك ژی دژی وێ رادوه‌ستن و پشتا خوه د ده‌نێ و ل شاشیا وێ نابورن، زێده‌باری ڤێ یه‌كێ دهێته سزادان ژی، ل ڤێره ب دیتنا من چون جوداهی نینه ل هه‌مبه‌ر ئافره‌تێ یان زه‌لامی ده‌ما د كه‌فته شاشیه‌كێ).
به‌رپرسا ئه‌نجۆمه‌نێ ئافره‌تێن گرده‌سێن زێده‌تر گۆت: (د چو قانوون و ده‌ستورێن دنیایێ و ئاینان دا نه‌هاتیه كو سه‌را شاشیان تنێ ژن بهێنه سزادان، هه‌كه شاشیا ئافره‌تێ ل سه‌ر نامووسێ بیت دڤێت بهێته كوشتن ب بهانه‌یا پاقژكرنێ، به‌لێ هه‌مان بابه‌ت ل گه‌ل زه‌لامی ناهێته كرن، لێ ئه‌ڤێ یه‌كێ كارتێكرنه‌كا نه‌رێنی ل سه‌ر ئافره‌تێ و خێزانێ ژی هه‌یه، كارتێكرن ل سه‌ر وان زارویان ژی هه‌یه یێن كو دناڤبه‌را وان ئافره‌ت و زه‌لامان دروست بوینه، له‌وا گرنگه جڤاكێ مه خوه ژ ڤان ره‌فتارێن نه شارستانی و قانوونی بپارێزن و مودێلا ئه‌ڤێ یه‌كێ نه‌ما و دڤێت ب قانوون ره‌فتار ل گه‌ل هه‌ر شاشیه‌كێ بهێته كرن كا ژلایێ كیژ ره‌گه‌زی دهێته كرن).
مه‌لا جیهاد زێباری، گوتاربێژ ل ئێك ژ مزگه‌فتنێن شێلادزێ ل سه‌ر بابه‌تی گۆت: (ئافره‌ت و زه‌لام د ئایینی دا به‌رپرسن ژ وێ شاشیا دكه‌ن، ئه‌ڤجا ل سه‌ر مافێ كه‌سی بیت یان ژی گشتی، هه‌ر ئێك ژ وان ل گوره‌ی قه‌بارێ شاشیا خوه دڤێت بگه‌هیته سزایێ خوه، به‌لێ هه‌كه چاڤپوشی ل هنده‌ك ژ وان شاشیان بهێته كرن ل وی ده‌می دێ به‌ره‌لایی كه‌ڤیته دناڤ جڤاكی دا، جاره‌كێ ل سه‌ر ده‌مێ پێغه‌مبه‌ری سلاڤ لێ بن ئافره‌ته‌كا خودان به‌رپرسیاره‌تی دزیه‌ك كر، هنده‌ك ژ مرۆڤێن وێ چونه نك ئوسامه‌ی و داخواز ژێ كر كو ئه‌و بچیته لنك پێغه‌مبه‌ری و داخوازێ ژێ بكه‌ت كو ئه‌و ل وێ ئافره‌تا دزی كری ببوریت ، به‌لێ پێغه‌مبه‌ری بو وان دیاركر كو فاتما كچا وی دزیێ بكه‌ت دێ هێته سزادان، ل ڤێره بو مه دیار دبیت كو نابیت شاشیا چو كه‌سان بهیته ڤه‌شارتن به‌لكو دڤێت هه‌ر كه‌سه‌ك سزایێ شاشیا خوه وه‌ربگریت).
مه‌لای زێده‌تر گۆت: (پشتی په‌یدابوونا قانوون و ده‌ستور و دادگه‌هان و دامه‌زراوه‌یان، جوره رێكخستنه‌ك كه‌فتیه دناڤ جڤاكی دا و ئه‌ڤ داب و نه‌ریته به‌ر ب نه‌مانێ ڤه دچن، به‌لێ دڤێت زێده‌تر كار بۆ هشیاریا جڤاكی بهێته كرن كو ب قانوون كار بۆ چاره‌سه‌ركرنا پرسێن جڤاكی و شیاشیان بكه‌ن نه‌ك ب داب و نه‌ریت و فه‌رزكرنا شیانێن زه‌لامان ل سه‌ر ئافره‌تان شاشی بهێنه چاره‌سه‌ركرن).
