سه‌میر سه‌دیق دێ به‌رهه‌مه‌كێ نوو به‌لاڤ كه‌ت
ئه‌ڤرۆ، هه‌رهین محه‌مه‌د:
هونه‌رمه‌ند سه‌میر سه‌دیق، د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیاركر ئه‌ڤه بۆ ده‌مه‌كی َدرێژه ئه‌و مژوولی به‌رهه‌مه‌كێ هه‌شت تراكیه و چار ستران ژ وان د نوو نه و چارێن دی سترانێن وی یێن كه‌ڤنن نوو كرینه، لێ ژ به‌ر ڤان كاودانا هه‌تا نوكه به‌لاڤ نه‌بوویه و ژڤانه ل سالا نوو بهێته به‌لاڤكرن.
سه‌میری گۆت: ستران گۆتنێ هه‌ست دایه من ئه‌ز سترانێ پێ دبێژم و ئه‌و ده‌مێ ئه‌ز ب ده‌مه سترانێ ژده‌رهه‌ق نه‌ده‌ركه‌فتیمه و ده‌رهه‌قێ سترانێ دا دبیت یێ خه‌مساربم و دبیت ئه‌ڤ چه‌نده ژ به‌ر هنده‌ك كاودانێن تایبه‌ت بیت و ده‌مێ ئه‌ز دبینم گه‌نج و سترانبێژ سترانا من (چ رۆژا ئه‌ز ته‌نه بینم) دبێژن هه‌ست ب هندێ دكه‌م كو من تشته‌ك كریه و من تشته‌ك پاشخوه ڤه یێ هێلای و ب ڤێ چه‌ندێ گه‌له‌ك دلخوه‌ش دبم و نه‌بتنێ ب وێ سترانێ دلخوه‌ش دبم ده‌مێ ژ ده‌ڤێ سترانبێژه‌كی گوه لێ بم هه‌ر سترانه‌كا من بیت ئێك بیژیت هه‌ست ب خوه‌شیێ دكه‌م و سترانا من یا بناڤێ (ژ ئه‌لماس و زێرا) هونه‌رمه‌ند (كاروان كامل) ئێك ژ سترانبێژێن نێزیكی منه و ده‌مێ من ئه‌و به‌رهه‌م تۆماركری هه‌ر ل وی ده‌می دلێ كاروانی كه‌فت بوو وێ سترانێ و داخواز ژ من كر وێ سترانێ بێژیت و من كره دیاری بۆ وی و گه‌له‌كێ دلخوه‌شم وی ئه‌و ستران گۆتی و گه‌له‌ك خوه‌ش یا گۆتی و ئه‌و ستران ل سالا 1994 من توماركربوو و ئه‌وی ب شێوازه‌كێ نوو گۆتیه و دبینم كاروانی ژ من خوه‌شتر گۆتیه.
ل دووماهیێ ناڤهاتی گۆت ژی : من سترانا دوقۆلی گۆتیه ب ناڤێ (سه‌ركه‌فتن بلنداهیا شاخ و چیایی) ل گه‌ل سترانبێژ (كاژینێ) و من لبه‌ره ژی سترانه‌كا دی ژی یا دوقۆلی چێكه‌م، به‌لێ هێشتا من ئه‌و ده‌نگه نه دیتیه ل گه‌ل ده‌نگێ من ب گونجیت.
