سوبه‌هی نوونه‌رێن پارێزگه‌هێ دێ هه‌مبه‌ری یانێن هه‌ولێرێ بن
ئه‌ڤرۆ، زنار زوبێر:
چاڤه‌رێ دهێته كرن سوبه‌هی رۆژا پێنج شه‌مبی یاریێن گه‌را شه‌شێ ژ قوناغا دویێ یا خولا هه‌رێما كوردستانێ بۆ یاریا فوتسالا كچان سه‌ر ئاستێ یانێن پلا نایاب بهێنه ئه‌نجامدان، نوونه‌رێن پارێزگه‌هێ یانا ئافره‌تێن دهۆك دێ به‌ره ب سۆران چیت و شێخان و گاره ل هۆلا كولیژا په‌روه‌ردا وه‌رزشی دێ مێڤانداریا یانێن ره‌واندوز و ئافره‌تێن هه‌ولێر كه‌ن.
ل دۆر یاریا ئافره‌تێن دهۆك ئه‌وا دێ بیته مێڤانا یانا سنور ل باژێرێ سۆران رۆژین سه‌عید كاپتنا ئافره‌تێن دهۆك بۆ رۆژناما ئه‌ڤرۆ گۆت: تنێ بۆ سه‌ركه‌فتنێ دێ چینه ڤێ یاریێ ژ به‌ركو چو ده‌لیڤێن دی نینن ژبلی ڤێ چه‌ندێ ژبه‌ركو قه‌ره‌بوویا ژ ده‌ستدانا خالان ناهێته كرن زێده‌باری ڤێ چه‌ندێ هه‌ڤركی ل سه‌ر رێزێن پێشیێ د نوكه دا بهێزه بۆ ڤێ قوناغێ هه‌موو تیم دێ بهێزتر یاریێ ژ قۆناغا ئێكێ كه‌ن تایبه‌ت یانا سنور د نوكه دا دو پیشه‌كارێن ئیرانی بۆ تیما خوه ئیناینه پێخه‌مه‌ت باشتركرنا ئه‌نجامێن خوه ژ قۆناغا بوری.
ژلایێ خوه ڤه د هه‌مان ده‌م دا تیما فۆتسالا شێخان ل هۆلا كولیژا چاندنێ دێ مێڤانداریا یانا ره‌واندز كه‌ت، نوكه شێخان خودانا نه‌ه خالانه ل رێزا سیێ یا كۆما ئێكێ دهێت، ل دۆر ڤێ یاریێ ئاشتی كه‌ریم راهێنه‌رێ یانا شێخان بۆ رۆژناما ئه‌ڤرۆ گۆت: بۆ ڤێ قوناغێ دێ بهێزتر هێنه یاریێ دا و ئارمانجا مه هه‌ڤڕكیه بۆ ده‌ربازبوونێ ژبلی ڤێ چه‌ندێ پێدڤیه مفای ژ هول و جه‌ماوه‌رێ خوه بینن و سه‌ركه‌فتنا خوه دوپات بكه‌ین نه‌كو پاشڤه زڤرین و هه‌موو یاریزانێن تیما مه به‌رهه‌ڤن بۆ ڤێ یاریێ و سێ خالان.
ژلایه‌كێ دی ڤه ل ده‌مژمێر سێ ئێڤاری ل هه‌مان هۆل تیما گاره ئه‌وا هه‌تا نوكه چو خال ده‌ستڤه نه‌ئیناین و تووشی پێنج خوساره‌تیان بوی ل سه‌ر ئێك دێ یاریه‌كا بزه‌حمه‌ت به‌رامبه‌ر مێڤاندارا خوه و سه‌ركێشا كومێ یانا ئافره‌تێن هه‌ولێرێ كه‌ت، ل دۆر ڤێ یاریێ ئاراز سالح راهێنه‌رێ تیمێ دیاركر یاریه‌كا ب سانه‌هی نابیت هه‌مبه‌ری تیمه‌كێ یا لێگدایی و كۆمه‌كا باشترین یاریزانان هه‌یی ژوانا پیشه‌كار و هه‌ڤڕكا ناسناڤی هه‌مبه‌ری وێ تیما مه ب یاریزانێن كچ یێن ژیێ بچووك و نافخۆیی و كێم شاره‌زاهی له‌ورا ئه‌ركێ مه ب سانه‌هی نابیت لێ دێ هه‌موو بزاڤا كه‌ین و یا دشیان دابیت بۆ ئه‌نجامه‌كێ باش.
