سوبه‌هی گه‌ڕا 8ێ یا فلمه فیسته‌ڤالا دهۆك یا نێڤده‌وله‌تی دێ ب دووماهی هێت
ئه‌ڤرۆ، رێوار محه‌مه‌د ره‌شید:
به‌رپرسێ به‌شێ راگه‌هاندنێ ل گه‌ڕا 8ێ یا فلمه فیسته‌ڤالا دهۆك یا نێڤده‌وله‌تی بۆ رۆژناما ئه‌ڤرۆ ئاشكرا كر كو د رۆ ژێن بوری دا ئه‌و به‌رنامێ بۆ فلمه فیسته‌ڤالێ هاتیه دانان شێوه‌یه‌كێ گه‌له‌ك باش هاته بجهئینان و سوبه‌هی رۆژا دووشه‌مبی 22/11/2021 پشتی باشترین فلم و باشترین ئه‌كته‌رێن كچ و كور دهێنه هه‌لبژارتن و خه‌لاتێ ژووری و خه‌لاتێ فیبریسكی د هێنه به‌لاڤكرن گه‌ڕا 8ێ یا فلمه فیسته‌ڤالا دهۆك یا نێڤده‌وله‌تی دێ ب دووماهی هێت.
حه‌سه‌ن عارف، به‌رپرسێ به‌شێ راگه‌هاندنێ ل گه‌ڕا 8ێ یا فلمه فیسته‌ڤالا دهۆك یا نێڤده‌وله‌تی دیار كر كو بابه‌تێ سه‌ره‌كی یێ فلمه فیسته‌ڤالا ناڤهاتی ژینگه‌ه بوو ژ به‌ر ڤێ چه‌ندێ ژی ل رۆژێن بۆری هه‌وه‌كا دارچاندنێ د ناڤ كه‌مپا زانكۆیا دهۆك دا هاته ئه‌نجامدان، هه‌روه‌سا ب مه‌ره‌ما دیتنا دیمه‌نێن جوانێن سرۆشتێ جوانێ پارێزگه‌ها دهۆكێ و جهێن شونوواری یێن پارێزگه‌ها دهۆكێ د رۆژێن فلمه فیسته‌ڤالێ دا گه‌شته‌ك ب هه‌ماهه‌نگی دگه‌ل چه‌ندین سازیێن په‌یوه‌ندیدار بۆ مێهڤانێن بیانی یێن فلمه‌فیسته‌ڤالێ ل هاڤینگه‌هێن قه‌زا ئامێدیێ هاته رێكخستن و ره‌نگه ئه‌ڤ گه‌شته ببیته ئه‌گه‌ره‌ك كو ل پاشه‌رۆژێ ئه‌ڤ فلمسازه مفایی ژ هاڤینگه‌هێن پارێزگه‌ها دهۆكێ ببینن بۆ وێنه‌كرنا فلمێن خوه.
ناڤهاتی ئاماژه دا وێ چه‌ندێ كو ل رۆژا ئه‌یینی 19/11/2021 ب ئاماده‌بوونا قۆنسلێ كۆریا ل هه‌رێما كوردستانێ و سه‌رۆكێ فلمه فیسته‌ڤالا دهۆك یا نێڤده‌وله‌تی و ژماره‌كا مه‌زن ژ حه‌زژێكه‌رێن سینه‌مایێ، بۆ جارا ئێكێ د فلمه فیسته‌ڤالا دهۆك دا فلمه‌كێ كوری ژ ده‌رڤه‌ی هۆلان هاته نیشادان و د ناڤ ترۆمبێلان دا بینه‌ریا وی فلمی دهاته‌كرن و گۆت: “دخوازین د سالێن داهاتی دا كه‌رتێ تایبه‌ت پتر رۆلێ خوه ببینیت د پشته‌ڤانیا فلمه فیسته‌ڤالێ دا ب مه‌ره‌ما پێشڤه‌برنا ئاستێ هونه‌رێ سینه‌مایێ ل هه‌رێما كوردستانێ ب گشتی و پارێزگه‌ها دهۆكێ ب تایبه‌تی”.
