سوشیال میدیایێ كارتێكرن ل دەروونێ تاكە كەسی كریە
پەروین سەلاح:
سۆشیال میدیا بویە ئەگەرێ پەیدابونا فشارێن دەروونی لدەف تاكە كەسی سەرەرای باشیان كارتێكرنەكا خراب ژی ل خێزانێ و جڤاكی ب گشتی كریە، كەسانێن شارەزا ژی دبێژن: پێدڤیە مرۆڤ سۆشیال میدیایێ ب شێوەیەكێ درست و ب مفا بكار بینیت.
هەلكەفت عەبدلواحد رێڤەبەرێ تێلەڤزیۆنا دهوك بۆ رۆژناما ئەڤرۆ دیار كر كو سوشیال میدیایێ كارتێكرنەكا گەلەك خراب ل جڤاكی ب گشتی كریە، هەر ئامرازەكێ راگەهاندنێ یێ بشێت پتر رایا گشتی چێكەت و كارتێكرنێ ل سەر ئاراستەكرنا رایا گشتی بكەتن خەلكەك پتر بەرێ خوە ددەتە وی ئالاڤی و گۆت: (نەخاسمە سۆشیال میدیا گەلەكا بلەزە و بەرفرەهە و ئەرزانە و ب ساناهیە بۆ ب كارئینانێ و یا ئازادە و كونترۆل و فلتەر گەلەك دكێمن).
هەلكەفت گۆتژی: (ژبەر ڤێ چەندێ ژی هەر تاكەك دشێتن بكار بینیت و دەربرینێ ژ بیر و بوچۆنێن خوە بكەتن ب شێوەیەكێ ئازادانە، ژبەركو كوما سیفەت و خەسلەتێن سۆشیال میدیایێ وەكریە كو ل سەر جڤاكی زال بیت).
سەبارەت هەمان بابەت پارێزەر جەودەت دوسكی دیار كر كو بكارئینانا سۆشیال میدیایێ ب رەنگەكێ خەلەت بێگومان ژلایێ یاسایی ڤە سزا هەیە سزا زیندانە یان ژی غرامە كرنە یان هەردوكن، ئانكو لدووڤ جورێ تاوانێ دمینیت و گۆت: (سۆشیال میدیایێ كارتێكرن ل خێزانێ كریە و بویە ئەگەرێ ژێك جودابونا هەڤژینان و بویە ئەگەر كو رێژا بەردانێ پتر لێ بهێت).
ڤەكۆلەرێ جڤاكی چەكدار نەجمەدین بۆ رۆژناما ئەڤرۆ دیار كر سۆشیال میدیا بویە ئەگەرێ پەیدا كرنا فشارێن دەروونی لدەف تاكە كەسی و جڤاكی ب گشتی و گۆت: (بویە ئەگەر كو تاك حەز ژ بتنێ بونێ بكەت و بەردەوام ب سوشیالێ ڤە یێ مژویل بیت، هەتا وی رادەی كو ترس و دو دلی و خەمۆكی لدەف بكارهێنەرێن سوشیال میدیایێ پەیدا بویە، هەروەسا پەیوەندیێن جڤاكی لاواز كرینە).
چەكدار د بەردەوامیا ئاخفتنێن خودا گۆت: (پێدڤیە مرۆڤ سۆشیال میدیایێ ب شێوەیەكێ درست و ب مفا بكار بینیت، نەك دەمێ خو ب هەروە ببورینیت).
