سوشیال مەدیایێ وەکی ڤایرۆسی کارتێکرن ل جڤاکى کریە
هیڤی کەریم:
د جیهانا ئەڤرودا، خراب بکارئینانا سوشیال میدیایێ ژلایێ بکارهێنەرێن وێڤە وەک مەزنترین گەف لسەر مروڤایەتیێ هاتیە قەبویلکرن و بکارئینانا سوشیال میدیایێ وەک ڤایروسی کارتێکرن لسەر جڤاکى و مروڤایەتیێ کریە.
دلژین عەبدلستار کچەکا گەنجە، دیار کر کو سوشیال میدیا هەتا ڕادەیەکێ باش شیایە پەیوەندیێن جڤاکی پێشڤە ببەت و هەڤنیاسینێ دروست بکەت ئەڤەژی کارەکێ باشە، بەلێ مخابن لایەنێ نەرێنى ژى سوشیالێ هەیە، ب تایبەت تورا تیکتوکی و گۆت؛ ژبەرکو کەسێن ئاست نزم بو پەیداکرنا کوژمەکێ پارەی هەر چ تشتێ کرێت و نەگونجایە دگەل جڤاکى دکەن، ئەڤێ ژی کارتێکرنەکا نەرێنى لسەر جڤاکی هەیە.
ئاخينك عارف پارێزەرە، بۆ رۆژنامەیا ئەڤرۆ دیار کر کو خراب کارئینانا موبایلێ وەک تاوان هاتیە نیاسین و پەرلەمانێ کوردستانێ د یاسایا ژمارە (٦) یا سالا ٢٠٠٨ و د ماددێ (١) دا کو یاسایا خراب بکارئینانا ئامیرێن پەیوەندیێ یە، بەحس ل هندەک کریاران کریە کو ئەنجامدانا وان دبیتە تاوان و گۆت؛ بۆ نمونە گەفکرن یان ناڤزراندن یان گوتنا ئاخفتنێن نەگونجایی چ برێکا تێلەفونێ یان سوشیال میدیایێ و تورێن جڤاکی و هەر ئامیرەکێ دی یێ پەیوەندیێ کو ببیتە ئەگەر کەرامەت و رێزا کەسێن بەرامبەر بهێتە شکاندن.
ئاخینکێ د بەردەوامیا ئاخفتنێن خۆدا دیار کر کو د ماددێ (٢) دا و د هەمان یاسا دا ئاماژە پێکریە کو هەر کەسەکێ ئامیرێن پەیوەندیێ خراب بکاربینیت بو مەرەما گەفکرنێ یان شکاندنا کەرامەت و کەسایەتیێ یان بەلاڤکرنا وێنە و ڤیدیویێن کەسەکێ، دێ هێتە سزادان ب ئێک ژ ڤان دو سزایان غرامە کو ملیونەکێ کێمترنەبیت و ژ پێنج ملیونان پتر نەبیت، یان سزایێ زیندانکرنێ کو ژ شەش هەیڤا کێمتر نەبیت و ژ پێنج سالان پتر نەبیت و گۆت: پێدڤیە خەلک خۆ ژ خراب بکارئینانا سوشیالێ دویر بکەن و ب شێوەیەکێ شارستانى بکاربینن.
هەنا ئەسعەد چالاکڤانە د بیاڤێ جڤاکی دا، سەبارەت هەمان بابەت دیار کر کو د جیهانا ئەڤرودا، خراب بکارئینانا سوشیال میدیایێ ژلایێ بکارهێنەرێن وێڤە وەک مەزنترین گەف لسەر مروڤایەتیێ هاتیە قەبویلکرن و گۆت؛ بکارئینانا سوشیالێ وەک ڤایروسی کارتێکرن لسەر جڤاکى و مروڤایەتیێ کریە، هەروەسا کارتێکرنەکا نەرێنى لسەر ساخلەمیا مرۆڤى یا دەروونى و لەشى کریە و لایەنێ مرۆڤایەتى لاواز کریە و دەمێ مرۆڤى ژى ب هەروە دبەت.
هەنایێ گۆتژى؛ دەمێ مروڤ تەماشەی سوشیالێ دکەت گرنگە بزانیت کیژ مروڤن یێن مفایی دگەهینن و کیژن یێن بزاڤا خرابکرنا دابونەریت و هزرا مروڤی دکەن و گۆت؛ ژبەرکو مەرەما وان بتنێ ئەوە دەمێ مروڤی ب هەروە ببەن و هزرێن مروڤی مژوولی تشتێن خراب و نەباش بکەن و مفایی ژ مروڤی دبینن و دەمێ مروڤی بێ بها دکەن.
چالاکڤانا جڤاکى د بەردەوامیا ئاحفتنێن خۆدا گۆت: ئەڤجا گرنگە مروڤ تەماشەی مروڤێن شارەزا و خودان هزرێن باش بکەت ژلایێ (ساخلەمى و جڤاکى و ئابوری و وەرزشی و سیاسی و…) ژ بو بهێزکرن و ئاڤاکرنا کەسایەتیا مروڤی.
