سونه‌یان ب چه‌كێ شیعیان ئێزدی كوشتن
قه‌ده‌را ملله‌تێ كورد ئه‌و بوویه، جوكرافیا وان نێزیكی جوكرافیه‌تا شۆفینزم و ره‌گه‌زپه‌رستا بوویه، له‌و تم كورد بووینه قوربانیێن هه‌ڤركیێن وان، ئه‌م رۆهنتر بێژین د ناڤا كوردان ژی دا كوردێن ئێزدی پتر زیاندمه‌ندبووینه، لێ تشێ مرۆڤ ب سه‌رفه‌راز هه‌ر ماینه ل سه‌ر بیرو باوه‌رێن خوه و كلتۆر و زمان و دابونه‌ریتێن خوه یێن كوردی پاراستینه.
ڤان فه‌رمان و جینۆسایدا ئێزدی نه‌چاركرینه هنه‌كێ ئاینێ خوه گرتی بهێلن و نه‌هێلن خه‌لكه‌ك دن زوو ب زوو ته‌ڤلی رێوره‌سمێن وان ببت، له‌و ژی نڤیسكارێ عه‌ره‌ب سه‌دیق ئه‌لده‌ملۆجی ل نیڤا دووێ ژچه‌رخێ بۆری دبێژیت ئه‌ز ئێكه‌م كه‌سم نه‌یێ ئێزدی ته‌ڤلی رێوره‌سمێن وان دبم، ژ به‌ركو د درێژاهیا دیرۆكێ دا گه‌له‌ك جاران ب خیانه‌تێ ئێزدی دكوشتن و مال و ملكی َوان تالان دكرن، سونه‌یان ژ ڤی ئالی و شیعیان ژ ئالیێ دن شنگال وێران دكرن، لێ ڤیانا شنگالیان بۆ ئاخا وان و نه‌ته‌وا وان وه‌كر كو ئیرادا وان مه‌زنتر ببه.
داعشیان ئه‌و په‌یره‌وپرۆگرامێ بابكالكێن خوه جیبه‌جیكر و ل همبه‌ر كوردان خاین بوون، به‌ری نه‌هسه‌د سالان ژی به‌دره‌دین ئه‌للوئلوئه گۆته شێخ حه‌سه‌نێ ئادانی ئه‌م برایێن هه‌ڤن و د مالا خوه دا ب خیانه‌ت كوشت، چونكی شێخ حه‌سه‌ن میرێ ئێزدیان بوو و سیاسه‌تمه‌دار و ژخاس و بابچاكه‌كی ئێزدیان ئی ناسكری بوو، لوئلوئه‌ی وه‌سا هزركر كو پشتی شێخ حه‌سه‌ن دێ كورد ب گشتی و ئێزدی ب تایبه‌تی تووشی بێ هێڤیه‌كا مه‌زن بن، لێ شه‌ره‌فه‌دین ژ شامێ ئێكسه‌ر پێ حه‌سیا و ب سه‌به‌قه‌كا قه‌ولی گۆته ملله‌تێ كورد: جه‌وابی َبده‌نه كوردستانێ
بلا قایم كه‌ن ئیمانێ
شه‌رفه‌دین دێ بته میر ل دیوانێ
كه‌واته هه‌موو جاران ده‌ردۆرێن ملله‌تێ كورد هه‌ول داینه كوردان ژ ناڤببه‌ن و ل خالا وان یالاواز گه‌ریاینه ئه‌وژی كوردێن ئێزدی بووینه، لێ ئیرادا ئێزدیان و ڤیانا وان بۆ خاك و نشتمانا وان مه‌زنتر بوویه ژ پیلان و نیازێن دوژمنان. ل ڤێ داویێ ژی كورد كه‌فتنه به‌ر شالاوا دره‌نده‌ترین رێكخراوا تیرۆرستی یا داعش، لێ هه‌ر كه‌س دزانه هه‌كه مالكی ب شێوه‌یه‌كی جوامێرانه ئه‌و چه‌كێ مه‌زن یێ ل مووسل نه‌دابا وان، مه‌حال بوو داعش خوه ل به‌ر سینگێ پێشمه‌رگه‌ی بگرت، كه‌واته چه‌كێ مالكی یێ شیعی بوو هۆكارێ سه‌ركه‌فتنا داعشێن سونی، ب ڤێ ئێكێ ژی كورد بوونه ئارمانج. ل ده‌مێ مالكی داخوازا راگه‌هاندنا حاله‌تێ هاوارهاتنێ كری هنگێ خۆیا بوو كو ئه‌ڤ سیناریۆیه‌كا داریتێ یه و مالكێ بخوه سینارێستێ وێ یه.
دیرۆك شاهده گاڤا كو كورد نێزیكی سه‌ربه‌خوه‌بوونێ بووینه، دوژمنێن وان تلا خوه داناینه سه‌ر بریناوان، لێ مرۆڤ بۆ دیرۆكێ ژی بێژه نه‌هه‌ڤگرتنا كوردان ژی به‌لا سه‌رێ وان بوویه، هه‌كه ژبۆ كێشێن نه‌ته‌وه‌ی ل ڤێ داویێ ژی كورد ل گه‌ل هه‌لویستێ سه‌رۆك بارزانی بانه، باوه‌رم نها ده‌ستكه‌فتێن مه‌زنتر د ئارادابوون، ئانكو نه‌هه‌ڤگرتن وه‌كو كلتۆرێ لێهاتیه د ناڤ مێشكێ مرۆڤێ كورد دا.
سوننیان ئێزدی كوشتن ب چه‌كێ شیعیان، گه‌ره‌كه ئه‌و لایه‌نێن ئێزدیان ئه‌وێن خوه نێزكی لایه‌نێن عه‌ره‌بی دكن فێم بكن، ئه‌و پشته‌ڤانیا مالكی و زومرا وی د هه‌لبژارتنان دا ل وان دكر نه ژبۆ چاڤێن ره‌شێن ئێزدیان بوویه، ب تنێ ژبۆ ئالۆزكرنا ئه‌زموونا ئازادیا كوردستانێ بوویه. ئێدی ده‌م هات ئێزدی داوی بریارا خوه بده‌ن و نه‌بنه ته‌پاپێ د ناڤا یاریا عه‌ره‌بێن جوامێر و نه‌جوامێر دا، ئێدی گه‌ره‌كه بزانن، ب تنێ سه‌رۆك بارزانی و سه‌ركردایه‌تیا سیاسی یا كوردستانێ یه بكارن پێشه‌رۆژه‌كا گه‌ش بۆ ئێزدیان ل ڤی وه‌لاتێ هه‌مبێزا پێكڤه‌ژیانێ دكت گره‌نتی بكت.
