سووارێن هه‌سپێن فال!!
ئیران ل ڤی سه‌رده‌می خوه دبینیت هێزه‌كا سه‌ره‌كی ل جیهانێ و ب تایبه‌ت رۆژهه‌لاتا ناڤین، هه‌ر وه‌سا گه‌له‌ك چاڤدێرێن سیاسی ب ڤێ دیتنێ ته‌ماشه‌ی ئیرانێ دكه‌ن.. .
به‌لێ ب دیتنا من ئیران به‌ر ب ژده‌ستدانا هێز و ده‌سكه‌فتیێن خوه دچیت و د ئه‌نجام دا دێ بیته له‌شه‌كێ لاواز، چونكی خه‌ون و پیلانێن وێ ل سه‌ر ئه‌ردی و ژیواری جوداهی هه‌یه یان ده‌مكی یه و ئارمانجێن سه‌ركرده‌یێن وێ جێ به‌جێ نابن، چونكو به‌هرا پتر ژ وان وه‌كی سووارێن هه‌سپێن فاڵن. هزر ناكه‌ن كو هه‌ڤڕكێن وان زۆرن و ژ وان ب هێزترن د هه‌می واران دا، ڤێجا ده‌مێ ب هێز كه‌ڤیت بیرا دیرۆك و شارستانیا خوه‌یا كوور دكه‌ت ل جیهانا كه‌ڤن و دبیته هانده‌ر بۆ رۆله‌كێ ب بزاڤ بێ راگرتن و حه‌كیمانه و دكه‌فته د شاشیان دا وه‌كی هزرا به‌رفره‌هكرنا سنۆرێ خوه یان زالبوونا خوه ل ده‌رڤه‌ی ئاخا خوه بسه‌پینیت بێ كو هزر بكه‌ت ئه‌ڤ رۆله پێدڤی گه‌له‌ك به‌رهه‌ڤكرنا بنیاتانه وه‌كی بهێزكرنا ئابووری و بنه‌مایێن وی، هه‌روه‌سا بلندكرنا ئاستێ زانستی و ژیانا گه‌لێ خوه و پێشكێشكرنا خزمه‌تگوزاریان بۆ وه‌لاتیێن خوه. ئه‌ڤ كێماسیه یێن هه‌ین و زێده دبن و دبنه ئاریشه بۆ ئایندێ وان و ژ هێزێن وان زێده‌تربن وه‌كی نوكه كو خه‌لكێ وان ماندی بوویه و پتر ژ (12) ملیۆن كه‌س ل بن هێلا هه‌ژاریێ یه و ب به‌رده‌وامیا ڤان خه‌ونان دێ ملله‌تێ بن بركه‌ت.
هه‌كه بهێین و نێڕینه‌كێ بۆ دیرۆكێ بكه‌ین كو هه‌می گه‌لان ده‌مه‌كی ژ كاروانێ دیرۆكێ رۆلێ خوه هه‌بوو د شارستانیا جیهانا كه‌ڤن دا وه‌كی ئاشۆری و بابلی و رۆمانی و یۆنانیان.. . هتد، هه‌روه‌سا فارسیان د ملله‌تێ فارسان دا نه‌كو ئێرانی ب تنێ بوون به‌لكو كورد و ئه‌فغان. بلۆچ.. .
هه‌ر دیسا ئیمپراتۆریا خوه ل سه‌ر كیسێن ڤان گه‌لان ئاڤا كربوون. ئیران خوه دبینیت كو میراتگرێن ڤی شاهنیشینێ نه و ئارمانجا وان بۆ ساخكرنا ڤێ ئیمپراتۆریێ و هاڤێتنا ڤان پێنگاڤان ل به‌رامبه‌ر هه‌ڤڕكێن ب هێزتر ئه‌ڤه دزڤریت ژ ئه‌گه‌را هه‌لویستێ ده‌روونی كو هنده‌كان ده‌وله‌تا فارسی یا ژناڤبرین ل ژێر په‌ردا ئیسلامه‌تیێ و ئه‌وان هه‌ر ل ژێر ڤێ په‌ردێ دڤێت رۆلێ خوه دو باره‌كه‌ت. ژبلی مه‌ره‌ما وان ساخكرنا ئارمانجێن نه‌ته‌وه‌ی یه. به‌رامبه‌ری وان ئێكه‌تیا ئه‌ورۆپا و ئه‌مریكا ده‌وله‌تێن كه‌نداڤی و مسر و توركیا پیلانا د دانن و داڤا ڤه‌دده‌ن ل سه‌ر ماتێكرنا ئێرانی ل عیراق و سووریێ و یه‌مه‌ن و به‌حرین و لبنان ئه‌ڤه‌ژی خوه‌خاپاندن و پیلانه‌كا نهێنیه دا هێزا ئیرانێ به‌لاڤ ببیت هه‌ر وه‌سا دراڤێ وێ بێته خه‌رجكرن بۆ دوراندنا ئابووری، هه‌روه‌سا زیانێن گیانی بگه‌هیننه وه‌لاتیێن وێ و رێكه‌فتنا ڤیه‌ننا یا ئه‌تۆمی لغافكرنه بۆ هه‌سپێن فال یان بڕینا په‌رێن ئه‌لهۆیانه بۆ كۆنترۆلكرنا وان ب قووناغ قووناغ ل گه‌ل خالێن لاوازكرنا مه گۆتی، هه‌روه‌سا ئارامكرنا هه‌ڤپه‌یمانێن وێ پشتی هینگی ده‌ستپێكرنا پێنگاڤێن هێرشبرنێ ل سه‌ر هیزێن دووڤه‌لانكێن وێ وه‌كی نوكه ده‌ست پێ كری ل یه‌مه‌نێ و باكۆرێ سووریێ هه‌تا ئێران بزڤریته سه‌نگا وی یا دروست و دوور نینه ئیرانێ بكه‌نه پارچه پارچه، چونكی رێژا وان ل ناڤ ده‌وله‌تێ 35% ب تنێ نه. نه‌یا دووره كو هنده‌ك هێزێن داعش بۆ وان ئاماده‌كرینه به‌لێ پشتی قووناغا بهێت.. .
و ئه‌م بینینه بیرا ملله‌تێ خوه و لایه‌نێن سیاسی ئه‌رێ كی یه تێكدانا ره‌وشا هه‌رێمێ دكه‌ت؟ یان كی بوو كۆمارا مهاباد رۆخاندی هه‌روه‌سا شۆره‌شا ئیلۆنێ. به‌رده‌وام ژی گه‌نجێن كوردان سێداره دده‌ت یان شڤانێن هه‌ژار ل سنۆرێ رۆژهه‌لاتا هه‌رێما كوردستانێ دكوژن یان كی بوو ل رۆژا 23 / حوزیرانێ ده‌ست تێوه‌ردانا ره‌وشا هه‌رێمێ ل په‌رله‌مانێ كوردستانێ كری؟َ ئه‌ڤه ژی یا فه‌ره ئه‌و هنده‌ك لایه‌ن ڤان كاران ریسوا بكه‌ن نه‌كو بێ ده‌نگ بن، ئه‌ڤجا هوشداری بۆ گه‌لێ مه كو ئێكرێزیێ بپارێزن، چونكی هه‌می نه‌ته‌وه‌یێن كوردستان داگیر كرین رێكه‌فتینه ل سه‌ر ژناڤبرنا هه‌رێمێ و هنده‌ك نه‌بنه دووڤه‌لانك یان موراهه‌نێ دگه‌ل هه‌سپێ دوراندی بكه‌ن یان ببنه په‌یده‌قێن شه‌تره‌نجێ وه‌كی وان بڤێت مه بجۆلینن یان ئه‌م ببینه نوونه‌رێن دوژمنان بۆ دوپاتكرنا په‌یمانا ئه‌رزه‌روم یا سالا 1550 زاینی و ڤێ په‌یمانێ جێگیر بكه‌ین ل دیڤ حه‌ز و پلانێن وان.
