سووریێ به‌ر ب گوهۆڕینێن نوو ڤه دچیت
ئه‌ڤرۆ، سه‌رجان مه‌حمود:
خه‌لیل كایا رۆژنامه‌ڤانێ كورد ل باكورێ كوردستانێ د داخۆیانیه‌كێ دا بۆ رۆژناما ئه‌ڤرۆ راگه‌هاند كو توركیا هژمارا هێزێن خوه یێن ل گرێسپی زێده‌تر دكه‌ت و ل باژێركێ ئاكچاكاله یێ سه‌ر ب روحا ژی بزاڤێن سه‌ربازی یێن تورك زێده‌تر بووینه و گۆت: (ل رۆژا 8/4/2022 شه‌ش تانك و ب ده‌هان ترۆمبێلێن سه‌ربازی و ب سه‌دان سه‌ربازێن تورك ژ باژێركێ ئاكچاكاله ده‌ربازێ گرێسپی بوون و ل دووڤ زانیاریێن كو گه‌هشتینه ده‌ستێ مه توركیا دڤێت ئه‌مریكا و رۆسیا رازی كه‌ت دا كو ئۆپه‌راسیۆنه‌كا سه‌ربازی ل دژی هێزێن كوردی ئه‌نجام بده‌ت و رێیا M4 و باژێركێ عه‌ین عیسا كۆنترۆل بكه‌ت).
ناڤهاتی راگه‌هاند كو ئه‌مریكا ژی نه‌ڤێت هێزێن خوه ژ سووریێ ڤه‌كێشیت و هه‌روه‌سا به‌حسێ هندێ دهێته كرن كو هه‌ڤدیتن د ناڤبه‌را توركیا و رژێما به‌شاری دا هه‌نه، ئانكۆ ب كورتی سووریێ به‌ر ب گوهۆڕینێن نوو ڤه دچیت.
