سووریێ بەر ب شەڕێ ناڤخوەیی ڤە دچیت
پشتی شەڕێ د ناڤبەرا دەولەتا سووریێ و هێزێن چەکدارێن دورزیان چاڤدێرێن سیاسی ژی وەسا دبینن هەکە یا پێدڤی بۆ ئارامیا رەوشا سووریێ نەهێتە کرن دێ سووریێ تووشی شەڕەکێ ناڤخوەیی بیت و ئەمریکا ژی هۆشداریێ ددەتە دەستهەلاتا ئەحمەد شەرعی.
پشتی شەڕێ د ناڤبەرا دەولەتا سووریێ و چەکدارێن دورزیان دا ئسرائیلێ ژی چەندین جاران ل شامێ ئێرشی هێزێن سووریێ کر و هۆشداری ژی دا هەکە هێزێن سووریێ ئێرشی دورزیان بکەن ئەو دێ ئێرشی حوکمەتا سووریێ کەن، وەزارەتا دەرڤە یا ئەمریکا ژی دوهی هۆشداری دا دەستهەتا سووریێ و دیار کر هەکە دەستهەلاتا نها ل سەر هەلوەستێ خوە یێ خراب ل هەمبەر عەلەویان، دورزیان و کوردان بەردەوام بیت وەکو ئەمریکا ئەو ب چو رەنگەکێ پەیوەندیێن خوە ل گەل دەستهەلاتا نها یا سووریێ ئاسایی ناکەن.
چاڤدێرێن سیاسی ژی دیار دکەن، رەوشا سووریێ گەلەک خرابە و مخابن هەتا نها دەستهەلاتا ئەحمەد شەرعی سۆزێن کو داینە جڤاکێ نێڤدەولەتی بجه نەئیناینە و پشتی عەلەویان نها ژی دەستهەلاتا نوو یا سووریێ دەست ب ئێرشێن دژوار ل دژی دورزیان کریە، ژ بەر ڤێ یەکی ژی مەترسیا هندێ یا هەی سووریێ تووشی شەڕەکێ دژوار یێ ناڤخوەیی ببیت و بێگومان هەکە تشتەک وەسا روو بدەت مەترسیا پارچەبوونا سووریێ ژی هەیە و ژ بەر ڤێ یەکێ ژی دڤێت دەستهەلاتا ئەحمەد شەرع دەست ژ هەلوەستێ خوە یێ خراب ل دژی عەلەویان، دورزیان و کوردان بەردەت و یا پێدڤی بۆ ئارامیا سووریێ بکەت.
سەبارەت ب ئالۆزیێن ڤێ دووماهیێ ل سووریێ سەرۆک کۆمارێ تورکیا رەجەب تەیب ئەردۆغان ژی دیار کر، ئسرائیلێ دڤێت رەوشا سووریێ ئالۆز بکەت، چونکی ئسرائیلێ دڤێت ب بەهانەیا پشتەڤانیکرن ژ دورزیان ئاخا سووریێ داگیر بکەت، نها ژی هێزێن ئسرائیلێ ل هندەک دەڤەرێن سووریێ هەنە و دڤێت ئسرائیل هێزێن خوە ژ ئاخا سووریێ ڤەکێشیت و دەستێوەردانێ د کاروبارێن ناڤخوەیی یێن وی وەلاتی دا نەکەت.
سالح موسلیم هەڤسەرۆکێ بەرێ یێ پەیەدێ ژی سەبارەت ب ئالۆزیێن ڤێ دووماهیێ ل سووریێ دیار کر، دەستهەلاتا نها یا شامێ وانە ژ دیرۆکێ وەرنەگرتیە، چونکی ل سووریێ چەندین نەتەوەیێن جودا جودا ب سالانە دژین و دڤێت دەستهەلاتا نها یا شامێ رێزێ ل داخوازیێن دورزیان و عەلەویان بگریت و شاشیێن کو بەری نها دەستهەلاتا ئەسەدی کرینە ژی دوبارە نەکەت، لێ روودانێن ڤێ دووماهیێ نیشا ددەن کو مخابن یێن ل شامێ جارەکا دی بزاڤا ڤێ یەکێ دکەن ب تنێ حوکمێ ل هەموو سووریێ بکەن، ئەنجامێ سیاسەتا وان یا شاش ژی وەسا کریە کو رەوشا هەی ئالۆزتر لێ بهێت و گۆت: (ئالۆزیێن ڤێ دووماهیێ دێ کاریگەریا خوە یا گەلەک خراب ل پاشەرۆژا سووریێ کەن، دڤێت دەستهەلاتا ئەحمەد شەرع دەست ژ ئێرشێن خوە یێن ل دژی دورزیان بەردەت و کار بۆ سیستەمەک نوو و دیموکرات ل سووریێ بکەت).
