سووریێ بەر ب چارەنڤیسەکێ نەدیار ڤە دچیت
بەرپرسەکێ وەزارەتا بەرگریێ یا سووریێ بۆ ئاژانسا رویترز دیار کریە، دەستهەلاتا نها یا شامێ دەستهەلاتەک توندرەوە و ئەحمەد شەرع نەشیا ل گەل هەموو پێکهاتەیێن ل سووریێ پرسێن هەی چارەسەر بکەت و رەوشا سووریێ ئارام بکەت، بەری نها چەندین جاران بزاڤا تیرۆرکرنا ئەحمەد شەرعی هاتیە کرن و نها ژی مەترسیا کوشتنا وی هەیە، هەکە تشتەک وەسا روو بدەت دێ شەڕێ ناڤخوەیی ل سووریێ روو دەت، مخابن هندەک وەلاتان نەهێلان خەلکێ سووریێ بریارەکا دروست بدەن و پرسێن هەی چارەسەر بکەن.
هەمان بەرپرسی ئەو یەک ژی دیار کریە، ئسرائیل ژ بۆ پاراستنا خوە دێ هەر کارەکێ کەت، ئالۆزیێن ل سووریێ مەترسینە ژ بۆ ئسرائیلێ، ژ بەر ڤێ یەکێ ژی نها ئسرائیلێ هێزێن خوە ل هندەک دەڤەران ستراتیژی ل سووریێ بجه کرینە و ئەو هێز دێ بۆ دەمەکێ درێژ ژی ل ئاخا سووریێ مینن، چونکی هەتا چارەنڤیسێ سووریێ ئێکلا نەبیت و رەوشا وی وەلاتی ئارام نەبیت مەترسی ل سەر ئسرائیلێ دێ هەبن و ئسرائیل ژی نەچارە هەر کارەکێ ژ بۆ پاراستنا خوە بکەت، ژ بەر ڤێ یەکێ ژی د رەوشا نها دا گەلەک زەحمەتە ئسرائیل هێزێن خوە ژ ئاخا سووریێ ڤەکێشیت.
ئەو یەک د دەمەکێ دایە کو بەری دو رۆژان بەرپرسەکێ وەزارەتا دەرڤە یا سووریێ ژی دیار کربوو نها ئسرائیل رۆلەک گەلەک خراب ل سووریێ دگێریت و ئسرائیلێ نەڤێت رەوشا سووریێ ئارام بیت، دڤێت ئسرائیل هەموو هێزێن خوە ژ ئاخا سووریێ ڤەکێشیت و رێزێ ل سەروەریا ئاخا سووریێ بگریت، هەکە ئسرائیل بەردەوام بیت ل سەر زێدەگاڤیێن خوە ل سووریێ دێ رەوشا دەڤەرێ ب گشتی تێک چیت، چونکی سووریێ نەڤێت شەڕێ ئسرائیلێ بکەت و د هەمان دەمی دا دڤێت ئسرائیل ژی دەست ژ ئێرشێن خوە یێن ل سەر سووریێ بەردەت و نەبیتە ئەگەرێ ئالۆزیێن زێدەتر ل سووریێ.
