سوپایێ توركیا خاله‌كا نوو یا سه‌ربازی ل هنداڤی گوندێ هرۆرێ دانا
به‌رواری بالا، زنار تۆڤی:
سوپایێ توركیا دوهی خاله‌كا دی یا سه‌ربازی ل گرێ كه‌ڤۆتا ب كه‌زی ل هنداڤی گوندێ هرۆرێ ل سنوورێ ناحیا كانی ماسێ دانا و ئه‌ڤه خالا دویێ یه سۆپایێ توركیا ل هنداڤی وی گوندی ددانیت.
ئه‌یاد ئه‌دیب، وه‌لاتیه‌كێ خوه‌جهێ گوندێ هرۆرێ یه ل ده‌ڤه‌را به‌رواری بالا، بۆ رۆژناما ئه‌ڤرۆ دیار كر، ژ ئه‌گه‌رێ شه‌ڕێ د ناڤبه‌را سۆپایێ توركیا و گه‌ریلایێن په‌كه‌كێ دا، كو ئه‌ڤه چه‌ند هه‌یڤه به‌رده‌وامه ل سنورێ ناحیا كانی ماسێ و ژ بۆ به‌رسنگ گرتنا گه‌ریلایێن په‌كه‌كێ سۆپایێ توركیا خاله‌كا خوه یا سه‌ربازی دانابوو كه‌ڤره سۆرێ ل هنداڤی گوندێ هرۆرێ، دوهی ژی 15/6/2021 سوپایێ توركیا خاله‌كا دیتر یا سه‌ربازی ل گرێ كه‌ڤۆتا ب كه‌زی دانایه، كو ئه‌و جهه نێزیكی 500 مه‌تران ژ مالان دووره، ئه‌ڤ چه‌نده ره‌وشا خه‌لكێ گوندی ئالۆزتر لێدكه‌ت و ئێدی خه‌لكێ گوندی نه‌شێن بچنه ناڤا زه‌ڤی و ئاقارێ خوه، دیسا نوكه ژی خه‌لكێ گوندی نه‌شێن بچنه ته‌بالا و زه‌ڤیێن خوه ئاڤ بده‌ن.
وی وه‌لاتی گۆت: “نوكه ژی رۆژانه تۆپخانێن سۆپایێ توركیا ده‌ردۆرێن گوندێ هرۆرێ تۆپباران دكه‌ن، دیسا فرۆكێن هه‌لیكۆپته‌ر ژی شه‌ڤانه ده‌وروبه‌رێن گوندی بۆمبه باران دكه‌ن، هه‌ر چه‌نده ئه‌ڤه ده‌مه‌كێ درێژه گوندێ مه دهێته تۆپباران كرن، لێ مه گوندێ خوه چۆل نه‌كرییه و مه ل به‌ر نینه گوندێ خوه ژی چۆل بكه‌ین”.
