سپێدەهییەکا خاڤ
د. خالیدە خەلیل
ئەز پرتێن گیانێ خۆ ل سەر ریتما
پسیارا ڤێددەم
ئەرێ ئەوێ تە ھێلای، نیڤ دل بوو
یان نیڤ سێڤ؟
نیڤ ئایین ب نیڤ دیناتیێ تەڤاڤ دبیت
تە ژ جاما خۆ کرە جاما دلێ من
ئەز ب پێنگاڤێن کۆرە بەرەف کووراتییا بەرزەبوونێ دچم
و پسیار د کەم و دبێژم
ما نە ئەزم، کاروانێن تیپا
بەر ب دشتێن ھە لبە ستان دبەم
بێ دەنگی، یا بوویە سفرا من
ئەز ھەدارێ ڤەدجیم و
خەونا من یا چاڤ نقاندی یە
ئاخ، ئەو تلی چەند د خائین
ب بێھنا سێڤا!!
د خائین ب بێیریا ژڤانا و..
ھیڤیێن کەسک
ب تایا خەونان،
دە می د خاپینم و
د زانم تو یێ ژ ڤیانێ یاخیبووی
و جیھانا تە یا دوور … دوورە
من بۆ تە کیشوەرێن حەژێکرنێ دەرباز کرن
لێ تە پەڕێن خۆ بۆ ڤیانێ نە ڤەکرن
ئەز شەپرزە بووم
گەریا من ھشک بوو .
ئەز قورمێ زمانی دھەژینم
لێ نە ھێلا رتەبێت پەیڤان ل مە ببارن
من عەورەکێ ڕابۆری ژ چاڤێن تە دزی
و نیڤ سێڤ یا ل بیرا من
ئەو ژی وەکی دوورکەفتنا تە ژەنگی بوو
من تو د ڤیای
بێ گونەهـ
خودان ھیڤی
ھەمی ئاسمان تێرا تە نە کەت
لێ تە چو بۆ من نەھێلا
بتنێ بیرھاتنەک ب رەنگەکێ شەپرزە
و نیڤ سێڤ د تەلها پسیارێ دا !
