سۆشیال میدیایێ ڤالاتی د خێزانان دا پەیداكریە
ئاواز یوسف:
ڤەكۆلەرەكێ جڤاكی دیار كر كو سۆشیال میدیایێ كاریگەری ل ئەندامێن خێزانێ كریە و دووراتی دناڤبەرا واندا پەیدا كریە و گۆت: ئەڤجا داكو مە خێزانەكا ساخلەم هەبیت دڤێت هندەك یاسا دناڤ خێزانێ دا بهێنە پەیرەو كرن، پێدڤیە دایك و باب سوشیال میدیایێ كێم بكاربینن و ڕولی پتر بدەنە روونشتنێن خێزانی.
ڤەكولەرێ جڤاكی، عەبدولجەبار عەبدولرەحمان بۆ رۆژنامەیا ئەڤرۆ دیار كر، سوشیال میدیایێ دوو لایەن هەنە باش و خراب، كارتێكرنا خراب ئەوە هەر ئەندامەكێ خێزانێ ب موبایلا خۆڤە یێ گرێدایە و هەر ئێك یێ د جیهانا خۆدا، پەیوەندیێن جڤاكی و یێن خێزانی یێن لاواز كرین و گۆت: (كارتێكرنا باش ژی ئەوە دناڤ سوشیال میدیایێ دا گروپێن خێزانی یان یێ هەڤالان یێن دروست بوین و ب رێكا ڤان گروپان رۆژانێن ئێكودوو دزانن).
ئەڤین عەلی، ماموستایە و دوو زارۆك هەنە سەبارەت بابەتی گۆت: (نوكە دایك و باب پێدڤی ب هندەك رێنمایانن داكو بشێن كونترۆلێ ل سەر زارۆكێن خۆ بكەن، ژبەركو ئێدی هەموو مالان ئەنترنێت هەیە و ڤێ ئەنترنێتێ و سوشیالێ زارۆك ژ دەستێن دایك و بابان ئیناینە دەر و ئێخستینە بن گڤاشتنێن خۆ، هەتا وی رادەی ئێدی ئەم هەست ب هەبوونا زارۆكێن خۆ ناكەین).
خالیدا میرزا فەرمانبەرە و دایكا 4 زارۆكایە و گۆت: (سوشیالێ زارۆكێن من یێن داگیر كرین، بەری سوشیالێ زارۆكێن من ل قوتابخانێ نمونە بوون، بەلێ نوكە تەمبەل بۆینە و ئیدمان بو وان ب ئامیرێن تەكنولوژیایێ چێبۆیە، هەتا وی رادەی ئەو دوور كەفتینە ژ پەیوەندیێن خێزانێ و حەزژێكرن و دلوڤانی لدەف وان گەلەك یا سار بوی).
ڤەكولەر عەبدولجەبار دیار كر كو سۆشیال میدیایێ كارتێكرنەكا مەزن ل سەر شێوازێ پەروەردەكرنا زارۆكان ژی هەیە، ژبەركو د خێزانێ دا دایك و باب بەهرا پتر دەمێ خۆ ب سۆشیال میدیایێ ڤە دبورینن و گەلەك كێم دەمێ خۆ ددەنە پەروەردەكرنا زارۆكان و زارۆكێن خۆ یێن پشتگوه هاڤێتین و ب ڤی رەنگی ڤالاتی دناڤ خێزانێ دا پەیدا دبیت.
ڤەكولەرێ جڤاكی د بەردەوامیا ئاخفتنێن خۆدا گۆت: (ئەڤجا داكو مە خێزانەكا ساخلەم هەبیت، دڤێت هندەك یاسا دناڤ خێزانێ دا هەبن و بهێنە پەیرەو كرن ژ وان ژی پێدڤیە دایك و باب و خێزان بگشتی سوشیال میدیایێ كێم بكاربینن و ڕولی پتر بدەنە روونشتنێن خێزانی و پتر هایژ ئێكودوو هەبیت).
