سۆشیال میدیا مەژیێ قوتابیان ماندی دكەت
سالار محەمەد دۆسكی:
پتریا گازندێن دایك و بابا ئەون كو سوشیال میدیایێ كارتێكرنەكا خراب ل زارۆكێن وان كریە، بتایبەت ب وانا بیركاریێ و ئەڤە دبیتە ئەگەر هەردەم نمرێن قوتابی د كێم بن و گەلەك جاران وانا بیركاریێ دبیتە ئەگەرێ مانا قوتابی ل هەمان قوناغ.
مامۆستا رەمەزان ئەمین ئیبراهیم، پتر ژ بیست سالانە مامۆستایێ وانا بیركاریێ، لدور بابەتی بۆ رۆژنامەیا ئەڤرۆ دیار كر، گەلەك ئەگەر هەنە كو قوتابی ب بابەتێ بیركاریێ یێ لاواز بیت و ئێك ژ ئەوان ئەگەران دووڤچوون ژلایێ سەمیانێن قوتابیان ڤە نینە و گۆت: (خالا دووێ ئالوگوری دناڤبەرا قوتابیان بخۆ ژی نین).
مامۆستا رەمەزان دیار كر ژی كو ل بەرێ قوتابیان مفا ژ شیان و هزر و بۆچوونین ئێكودو وەردگرت، بەلێ نوكە ئەڤە گەلەك یا كێمە دناڤا قوتابیان دا، دیسا سوشیال میدیایێ گەلەك كارتێكرن ل سەر قوتابیان هەیە و مەژیێ قوتابیان گەلەك ماندی دكەت و ئەڤێ چەندێ ژی كارتێكرن ل سەر قوتابیان هەیە و گۆت: (یا ژ هەموویێ گرنكتر ژینگەها قوتابی گەلەك كارتێكرن ل سەر هەیە و هەكە ئەو ژینگەهـ یا ئاڤاكری بیت گومان نینە دێ كارتێكرن ل سەر قوتابی هەبیت).
مامۆستا رەمەزان ئەو چەندە ژی ئاشكرا كر كو قوتابخانە جهێ خواندنێ یە و دڤێت قوتابی دەمێ خۆ ب خواندنێ ڤە بورینیت و خو ب چ تشتێن دیڤە مژوول نەكەت، هەروەسا پێدڤیە مامۆستا هەموو بزاڤا بكەت قوتابی حەز ژ قوتابخانێ و وانێ بكەت و گۆت: (دڤێت رێزگرتن دناڤبەرا مامۆستا و قوتابیان دا هەبیت و پاراستنا ژینگەها پولێ و قوتابخانێ ژ پێدڤیێن گرنگە).
لدور هەمان بابەت، مامۆستا حەربیا ئیسماعیل، ل قوتابخانا ئێكەتی ل دهۆكێ، بۆچوونەكا جوداتر ژ مامۆستا رەمەزان هەبوو گۆت: (خوشیا بیركاریێ ژ قوناغا بنەرەتی دەستپێ دكەت، ژبەركو مامۆستا ل پولێن ئێك و دو و سێ ب چاڤێ دلوڤانیێ تەماشەی قوتابی دكەت دا حەز ژ بیركاریێ بكەت و هەكە قوتابی حەز ژ مامۆستایێ خۆ كر دێ حەز ژ وانا بیركاریێ ژی كەت).
مامۆستا حەربیایێ ئاماژە ب وێ چەندێ ژی كر كو دڤێت مامۆستا رێیێن كورت و ب ساناهی بۆ قوتابیان شرۆڤە بكەت و نیشا بدەت دا ل بەر قوتابیان ب ساناهی بكەڤیت و حەز و ڤیانا قوتابی زێدەتر بیت و گۆت: (گرنگە بهێن فرەهی د وانا بیركاریێ دا هەبیت و هەموو وانە گۆتن نەبیت، چونكە بو وانا بیركاریێ زێدەتر مەژی كارێ خو دكەت و هەكە قوتابی بهێنا خۆ نە ڤەدەت دێ ماندی بیت).
ئەڤێ مامۆستایێ د بەردەوامیا ب ئاخفتنێن خۆ دا دیار كر كو ئێك ژ ئەگەرێن نەخوشیا بابەتێ بیركاریێ بۆ قوتابیان زێدەبوونا پرۆگرامێن خواندنێ یە، لەوما گرنگە پرۆگرامێن وانا بیركاریێ د كێم بانە دا زێدەتر بۆ قوتابی یا خوش بیت و دا زێدەتر وەرگریت.
