سۆپەرا كوردستانێ دێ ل پارێزگەها دهۆكێ بیت
د داخویانیەكێ دا ئەندامێ ئێكەتیا تەپا پێی یا كوردستانێ دیار كر پشتی چەژنا قۆربانیێ دێ ژڤانێ یاریا سۆپەرا كوردستانێ هێتە دەستنیشانكرن ئەوا بڕیارە د ناڤبەرا قارەمانا خولا نایاب و كۆپا كوردستانێ ل یاریگەها سەرەكی یا یانەیا دهۆكێ هێتە كرن.
زێدەتر ئازاد محەمەد گۆت: دەستپێكا مەها بهێت دێ ئێكەم كۆمبوونا خوە یا پشتی چەژنا قۆربانیێ ئەنجامدەین ژبۆ گەنگەشێ و بڕیار و راسپاردەیان، ئێك ژ ئەوا بڕیاران دیاركرنا ژڤانێ یاریا دووماهیێ یا سۆپەرا كوردستانێ كو دهێتە چاڤەڕێ كرن دناڤبەرا قارەمانا خولا نایابا كوردستانێ یا وەرزێ بۆری پێشمەرگەیا هەولێر و قارەمانا كۆپا كوردستانێ، ژبەركو قارەمانا كۆپایێ هەر یانەیا پێشمەرگەیە ل دووڤ رێنمایان دێ مافی دەینە خودانا تیما دویێ ئەوژی یانەیا دهۆكە، ئەڤ یاریە دێ بشێوەكێ رێكخستی و جوان هێتە بڕێڤەبرن.
ژلایەكێ دووڤە ناڤهاتی گۆت: ب پشتەڤانی و بەرهەڤبوونا مەسرۆر بارزانی سەرۆكێ حوكمەتا هەرێما كوردستانێ دێ ژڤانێ دانانا رێورەسمێن خەلاتكرنێ بۆ ئەوان یانەیێن ناسناڤ ب دەستڤە ئیناین و رێزێن دویێ هاتین، ئەو ژی یانەیا پێشمەرگەیا هەولێر قارەمانا خولا نایاب و یانەیا ئارارات خودانا رێزا دویێ، یانەیا هەولێر قارەمانا پلا ئێك و یانەیا رانیا خودانا پلا دویێ، دیسان یانەیا دهۆك خودانا رێزا دویێ یا كۆپا كوردستانێ، ل سەر ئاستێ فوتسالا كچان یانەیا ئافرەتێن هەولێر خودانا ناسناڤی و فوتسالا یانەیا زاخۆ ئەوا رێزا دویێ هاتی، هەروەسان بڕیارە تیما باسكێت بۆلا یانەیا زاخۆ ژی بهێتە خەلاتكرن.
