سیابه‌ند عه‌گید: ده‌ست ژ هیڤیێن خوه به‌رناده‌ین
د داخویانیه‌كێدا هێرشبه‌رێ تیما ته‌پا پێی یا یانا دهۆك بۆ رۆژناما ئه‌ڤرۆ دیاركر كو سه‌رباری لاوازبوونا هیڤییان بۆ ئێك ژ پلێتێن ده‌ربازبوونا نایابا ئیراقێ، لێ ئه‌و رژدن د خولا پلا ئێك دا به‌رده‌وامیێ بده‌نه هه‌ڤڕكیا و ده‌ستا ژ هیڤیێن خوه به‌رنه‌ده‌ن.
زێده‌تر سیابه‌ند عه‌گید بۆ رۆژناما ئه‌ڤرۆ گوت: سه‌رجه‌مێ گشتی مه 12 خال ژ حه‌فت یاریان كۆمكرینه و رێزا پێنجێ دهێن ب جووداهیا حه‌فت خالان یانا سیناعه سه‌رێ لیستێ دهێت و شه‌ش یاری ماینه له‌ورا ده‌ستا ژ هیڤیێن خوه به‌رناده‌ین سه‌رباری ئه‌ركێ مه ب سانه‌هی نابیت و یاریا بهێت هه‌مبه‌ری ئه‌وان دێ یا ڤه‌بڕبیت بۆ به‌رده‌وامیا هیڤیێن خوه، یا گرنگ دڤێت یاریزان هه‌موو وه‌كو یاریا بوری هه‌مبه‌ری میسان ب ئاست و ئه‌نجام بۆ یاریا سێ شه‌مبیا بهێت ژی خوه ماندی بكه‌ن و ئێك ئارمانج بتنێ بۆ سه‌ركه‌فتنێ، ئه‌و یانا مفایی ژ ده‌لیڤێن خوه وه‌ربگریت و گۆلێ تۆماربكه‌ت دێ یا سه‌ركه‌فتی بیت.
هه‌روه‌سا ناڤهاتی ئه‌وچه‌نده ژی دیاركر كو د یاریێن بوری دا هه‌مبه‌ری ناسریه و سامرا شه‌ش خالێن نه ژ هه‌ژی ژ ده‌ستدان ژبه‌ركو ئه‌م باشتر بووین لێ خه‌له‌تیێن كه‌سوكی گۆل ل سه‌ر مه هاتینه تۆماركرن و گوت: هه‌موو یاریزانێن مه شیانێن هه‌ین لێ دڤێت زێده‌تر خوه ماندی بكه‌ن و هه‌ر یاریه‌كا بهێت هزرا دووماهیێ بكه‌ن ژبه‌ركو وه‌كهه‌ڤی و خوساره‌تی دێ هیڤیێن مایی ژی راوه‌ستینت و ئه‌ڤچه‌نده ژی دێ باجا وێ یا گران بیت و زه‌حمه‌تا مه هه‌روه چیت.
