سیاسەتا برسیكرنێ
خورشید تەوفیق باكۆزی
ئەڤە سیاسەتەكا كەڤنە د دیرۆكا مرڤایەتیێ دا. وەكۆ چەكەكێ كاریگەر ژلایێ وەلاتێن زلهێز و مێتنكار و داگیركەرڤە دژی گەلێ ژێردەست و ئازادیخواز بكارئینان. ژبۆ رۆخاندنا وڕە و لاوازكرنا ئیرادێ و خۆرادەستكرنا وان. دیسا گەلەك رژێمێن دكتاتۆر و فاشت ژی ئەڤ سیاسەتا برسیكرنێ و خۆسەپاندنێ ل سەرگەلێ خوە پراكتیزەكرینە و وەكو كارتەكا فشارێ دژی گەلێ خوە بكارئینایە داكو پابەندی بریار و پرەنسپێن خوە بكەن مینا ڕژێما ئیراقێ، هەر ژ دەمێ رژێما پاشایەتی و قاسمی و عەبدولسەلام عارف و هەتاكو گەهشتییە بەعسیێن فاشست، هەردەم ئەڤ كارتە ل دژی مللەتێ مەیێ كورد و شۆڕشێن كوردی بكارئینایە. مینا پرۆسا هەڵوەشاندنا ژێرخا ئابووری و سیاسەتا ئەردشەواتێ و سۆتنا دەخل و دانێ وەلاتییان و سۆتن و وێرانكرنا گوندان و گرتنا رێك و رێبارێن هاتن و چوونێ. هتد. ئەڤە ژی داكو كوردان تەنگاڤ بكەن خۆ رادەستی سیاتا رەگەزپەرستی یا رژێمێ بكەن.
وەكو وێ مەتەلا دبێژیت (گەلێ خوە برسیبكە داكو خۆ بۆ تە بچەمینت). حوكمەتا ئیراقا فیدرال ژی مینا رژێمێن پێشی خوە دژی خەلكێ هەرێما كوردستانێ، درێژەپێدانێ ب ڤێ سیاسەتا رەگەزپەرستی ددەن، تەیف سامی و پاڵدەر و پشتەڤانێن وێ ژی هەموو ل دویڤ ئەجیندا و بریار و فەرمانێن دێوێن دەولەتەكا كوورا مەسەبی كاردكەن. بۆ شكاندنا ئیرادەیا گەلێ كورد و لاوازكرنا قەوارەیێ هەرێما كوردستانێ.
بەلێ وەكو دبێژن: تو دشێی ئیرادەیا زارۆكەكی ب برسیبوونێ ژێ بستینی، بەلێ ئیرادەیا مللەتەك و نەتەوەیەكی ب برسیكرنێ بهێزتر دكەڤیت، ئیرادەیا مللەتێ مە ژی د ناڤ هەرەشە و كوشتن و توقاندنێ دا ژدایكبوویە. دوژمنێن گەلێ مە و رژێمێن فاشست هەموو رەنگ و ئاوایێن دۆژمنكاریێ مینا: گرتن، كوشتن، كۆمكوژی، ئەنفال، كێمیاباران ل سەرگەلێ مە یێ ستەمدیدە و زۆرلێكری پراكتیزەكرن. بەلێ گەلێ مە هەرما خوەدی هێز و ئیرادە و خوە بۆ زۆلم ستەما وان نەچەماند، ئەڤرۆ ژی، ب سایا خۆراگری و هەلوەستێن نەگوهۆرێن پارتی دیموكراتی كوردستان و سەرۆكێ مە جەنابێ (مەسعود بارزانی)، رۆژ بۆ رۆژێ و ڕەو ئیرادەیا گەلێ مە بهێزترەو هەموو ئێش و ئازارو نەهامەتییەك ب سەربەرزی و سەرفەرازی دەربازكرینە و هەموو نەخشە و پلانێن دۆژمن و داگیركەران رسوا و شەرمزار كرینە.
