سیاسەتا قەیوومان ل تورکیا دێ ب دووماهی هێت
ب، سهرجان مەحمود:
ئەندامەکێ پەرلەمانێ تورکیا دیار کر، هەڤپەیمانیا جمهور نها پرۆژە یاسایەکێ بەرهەڤ دکەت و دێ د دەمەکێ نێزیک دا هێتە پەرلەمانی و بێگومان ب پەسەندکرنا وێ یاسایێ دێ دووماهی ب سیاسەتا قەیوومان ل تورکیا هێت.
ساروهان ئۆلوچ ئەندامێ پەرلەمانێ تورکیا سەر ب فراکسیۆنا دەم پارتی د داخویانیەکێ دا بۆ دەزگەهێن راگەهاندنا تورکیا دیار کر، سیاسەتا قەیوومان یا چەند سالێن بۆری زیانێن خوە یێن گەلەک مەزن بۆ تورکیا هەبووینە، ناڤودەنگێ تورکیا د ئاستێ جیهانی و هەرێمی دا گەلەک خراب بوو، چونکی دانانا قەیوومان ب جهێ کەسێن هەلبژارتی ب دەنگێ خەلکی کارەک گەلەک خرابە و ب تەمامی ل دژی هەلبژارتنانە، ل دژی دیموکراسیێ یە، ژ بەر ڤێ یەکێ ژی پشتی فشارێن زێدە ژ ئالیێ دەم پارتی و پارتا کۆماری ل دەستهەلاتێ هاتنە کرن، نها پرۆژە یاسایەک دهێتە بەرهەڤ کرن و گۆت: (سەردەمێ سیاسەتا قەیوومان ل تورکیا دێ ب دووماهی هێت، د ناڤ ئاکپارتیێ دا ژی گەلەک کەس ل دژی دانانا قەیوومان بوون، چونکی نابیت کەسەک ب دەنگێ خەلکی بهێتە هەلبژارتن و پاشی ژی ژ ئالیێ دەستهەلاتێ ڤە ب بەهانەیێن جودا جودا ژ کاری بهێتە دوورخستن و کەسەک ب جهێ وی وەکو قەیووم بهێتە دانان، ئەو یەک کارەک گەلەک شاشە و دڤێت دووماهی ب سیاسەتا قەیوومان ل تورکیا بهێت).
ئەندامێ پەرلەمانێ تورکیا ئەو یەک ژی دیار کر، هەتا نها گەلەک جاران پەرلەمانێ ئۆرۆپا و سازیێن مافێن مرۆڤی دژبەریا خوە ل هەمبەر سیاسەتا قەیوومان ل تورکیا دیار کرینە، براستی ژی دانانا قەیوومان کاریگەریا خوە یا گەلەک خراب بۆ تورکیا هەبوو، رەنگە بەری نها هندەک ژ بەرپرسێن ئاکپارتیێ و دەستهەلاتێ ب گشتی وەسا هزر دکرن دێ شێن وەسا دەم پارتی یان ژی هێزێن دی یێن ئۆپۆزسیۆنێ لاواز کەن، لێ سیاسەتا قەیوومان زیانەکا گەلەک مەزن گەهاندە تورکیا و گۆت: (ل چ وەلاتەکێ دیموکراتی ل جیهانێ تشتەک وەسا نینە، مخابن مە بەری نها وەکو هەدەپە و ڤێ دووماهیێ ژی وەکو دەم پارتی گەلەکە جاران مە داخواز ژ دەستهەلاتێ کربوو دووماهیێ ب سیاسەتا قەیوومان بینن، کو کارەک گەلەک خرابە و ل دژی دیموکراسیێ یە، لێ وی دەمی هەڤپەیمانیا جمهور ب بەهانەیا شەڕێ ل دژی تیرۆرێ چو نەکر، لێ نها رەوش ب تەمامی ل تورکیا هاتیە گوهۆڕین و گرنگە ئێدی سیاسەتا قەیوومان ژی نەمینیت).
هەژی ئاماژەپێدانێ یە کو هەتا نها ب دەهان هەڤسەرۆکێن باژێرڤانیان یێن سەر ب دەم پارتی ژ ئالیێ دەستهەلاتێ ڤە ب بەهانەیا کو هاریکاریا رێکخستنەکا تیرۆرستی دکەن ژ کاری هاتینە دوورخستن و ب جهێ وان دەولەتا تورکیا کەسەک وەکو قەیووم دانایە و بەری دەمەکێ دەولەت باخچەلی ژی دیار کربوو دڤێت ئێدی سیاسەتا قەیوومان ل تورکیا نەمینیت.
